១. ចំណាយពេល ៥នាទីនាំចិត្តរីករាយ៖ តាមលោកគ្រូ នឹម ឈុន្នី ជាអ្នកដឹកនាំក្រុមហ៊ុនវិបស្សា (Vipassa) ផ្នែកសមាធិបានលើកឡើងថា ពេលព្រឹកបើយើងមានអារម្មណ៍មិនល្អទេ ចូរចំណាយពេលនៅម្នាក់ឯងក្នុងភាពស្ងប់ស្ងាត់ ៥នាទីទៅ១០នាទី មានន័យថា យើងបានបើកច្រកឱ្យផ្លូវចិត្តយើងរស់នៅជាមួយបច្ចុប្បន្នភាព រស់នៅជាមួយការពិតដើម្បីរីករាយជាមួយខ្លួនឯងឡើងវិញ។ ចូលអ្នកចំណាយពេលនៅស្ងប់ស្ងាត់ម្នាកឯង រីករាយជាមួយជីវិតខ្លួនឯងឱ្យមានក្តីសុខពេលព្រឹក ចូរនិយាយជាមួយខ្លួនឯងថា ខ្ញុំមានស្នាមញញឹមជាមួយខ្លួនឯងពេលព្រឹកនេះ ខ្ញុំស្រឡាញ់ខ្លួនឯង... ពេលគិតបែបនេះ អ្នកបានដេញអារម្មណ៍អវិជ្ជមានពេលព្រឹកជំនួសដោយអារម្មណ៍វិជ្ជមានក្នុងចិត្តដោយមានអារម្មណ៍ស្ងប់ស្ងាត់ជាអារម្មណ៍ដែលមានថាមពលក្នុងចិត្តឡើងវិញ។

២. ការដឹងគុណ ប៉ូវផ្លូវចិត្ត៖ វាជាថ្នាំប៉ូវផ្លូវចិត្តរបស់អ្នកខ្លាំងណាស់។ ពេលព្រឹកនេះ សុំអ្នករើសយករឿង៣មកអរគុណបានទេ? ឥឡូវនេះតែម្តង អ្នកសាកអរគុណខ្លួនឯងដែលរឹងមាំ អរគុណឪពុកម្តាយខំចិញ្ចឹមអ្នកធំដឹងក្តី អរគុណមេឃនិងព្រះអាទិត្យបានផ្តល់ពន្លឺ និងមានរឿងជាច្រើនទៀត ការធ្វើបែបនេះចិត្តអ្នកនឹងរីករាយសូម្បីតែទៅធ្វើការនិងរកស៊ីក៏មិនសូវមានអារម្មណ៍តានតឹងដែរ។

៣. ប្រើកាយនាំចិត្តរីករាយ៖ ការធ្វើលំហាត់ប្រាណនេះ មិនត្រឹមតែជួយរាងកាយរបស់អ្នកទេ ជួយដល់ចិត្តគំនិតបានល្អទៀត។ បើសុខភាពរាងកាយអ្នកមានបញ្ហា ចិត្តគំនិតក៏ពិបាកធ្វើការដែរ។ លោកHal Elrod ជាអ្នកនិពន្ធអន្តរជាតិ បាននិយាយថា បើអ្នកចង់បានសុខភាពរឹងមាំ និងផ្លូវចិត្តមានថាមពល អ្នកត្រូវមានទម្លាប់ធ្វើលំហាត់ប្រាណជាប្រចាំពេលព្រឹក ឬពេលល្ងាច។ ហើយវាបានធ្វើឱ្យរាងកាយ និងសុខភាពរបស់ខ្ញុំ ល្អក្នុងការរស់នៅផងដែរ៕អត្ថបទដោយ៖ ទ្រ សុភាព