ដើម្បីថែរក្សាថ្លើមឱ្យមានសុខភាពល្អ យើងត្រូវចាប់ផ្តើមពីរបៀបរស់នៅប្រចាំថ្ងៃ ដូចជា ការចាក់វ៉ាក់សាំងការពារជំងឺរលាកថ្លើម ការរស់នៅដោយមានអនាម័យ និងជ្រើសរើសអាហារដែលសម្បូរជីវជាតិ ល្អដល់សុខភាព។ ព្រោះថ្លើមអាចជួបប្រទះជំងឺជាច្រើនបានងាយ ប្រសិនបើយើងមិនប្រយ័ត្នហើយជំងឺដែលអាចប្រឈមមានដូចជា៖ ជំងឺរលាកថ្លើម ជាតិខ្លាញ់កកនៅថ្លើម បូសថ្លើម ក្រិនថ្លើម និងមហារីកថ្លើម ជាដើម។ 

អ្វីដែលគួរឱ្យកត់សម្គាល់ជាងនេះ តាមរយៈគេហទំព័រ Mayo Clinic ក៏បានបញ្ជាក់ពីរោគសញ្ញាចម្បងមួយចំនួនដែលអាចបង្ហាញថា ថ្លើមរបស់អ្នកកំពុងប្រកាសអាសន្ន ដោយសារតែជាតិពុលកកកុញច្រើនពេក។ ចំណាំរោគសញ្ញាទាំងនេះ បើមានសញ្ញាណាមួយលេចឡើងអ្នកគួរប្រញាប់ទៅពិគ្រោះជាមួយគ្រូពេទ្យជំនាញភ្លាម៖

១. ស្បែក និងភ្នែកលឿង (ខាន់លឿង)
២. មានអារម្មណ៍រមាស់ខ្លាំង
៣. ឈឺចាប់នៅផ្នែកខាងស្តាំខាងលើនៃពោះ
៤. អស់កម្លាំង គ្មានថាមពល
៥. គ្រុនក្ដៅ
៦. បាត់បង់ចំណង់អាហារ
៧. ចង្អោរ ឬក្អួត
៨. ទឹកនោមមានពណ៌ចម្លែក 

អ្នកទាំងអស់គ្នាមិនគួរមើលរំលងរោគសញ្ញាទាំងនេះទេ វាអាចជាសញ្ញាដំបូងនៃការខូចខាតនៃថ្លើម ដែលត្រូវការការត្រួតពិនិត្យជាបន្ទាន់។ ដើម្បីការពារថ្លើមឱ្យមានសុខភាពល្អ រឹងមាំ អ្នកគួរតែជៀសវាងអាហារ និងទម្លាប់ដែលធ្វើឱ្យថ្លើមរងនូវសម្ពាធ និងមានជាតិពុលកកកុញ ឧទាហរណ៍៖ ស្រា បារី អាហារកែច្នៃ អាហារខ្លាញ់ខ្ពស់ និងអាហារផ្អែមៗលើសកម្រិត។ ជំនួសវិញ បន្លែ ផ្លែឈើ អាហារខ្លាញ់ល្អ (ដូចជា អាវ៉ូកាដូ គ្រាប់ធញ្ញជាតិ និងត្រីមានខ្លាញ់ល្អ) អាហារទាំងនេះសុទ្ធសឹងតែជាអាហារ ប៉ូវដល់ថ្លើម ធ្វើឱ្យថ្លើមកាន់តែធ្វើការបានល្អជាងមុន។ 

ចំណាំថា ជំងឺថ្លើម ជាពិសេសជំងឺមហារីកថ្លើម គឺជាជំងឺមួយដែលស្ងៀមស្ងាត់ វាអាចមិនបង្ហាញរោគសញ្ញាច្បាស់ភ្លាមៗទេ។ ដូច្នេះ ប្រសិនបើអ្នកមានការសង្ស័យ ឬមានរោគសញ្ញាខាងលើ សូមទៅពិនិត្យ និងពិគ្រោះជាមួយវេជ្ជបណ្ឌិតឱ្យបានឆាប់ តាមរយៈនេះ អ្នកអាចការពារខ្លួនឯងពីគ្រោះថ្នាក់ធ្ងន់ធ្ងរនាពេលអនាគតបាន៕

អត្ថបទដោយ៖ សារួ