មានមនុស្សជាច្រើនរស់ជាមួយដុំសាច់ក្នុងខួរក្បាលដោយមិនដឹងខ្លួន ព្រោះដុំសាច់ខ្លះរីកលូតលាស់លឿន ដុំសាច់ខ្លះលូតលាស់យឺត ដុំសាច់ខ្លះមានទំហំតូច ហើយមិនងាយបង្ហាញរោគសញ្ញាឱ្យដឹង។ ទោះជាយ៉ាងណា ពេលដុំសាច់ចាប់ផ្តើមធំ ឬរីកលូតលាស់នៅទីតាំងសំខាន់ វាអាចបង្កឱ្យមានរោគសញ្ញាប្រែប្រួលជាច្រើនដែលគួរឱ្យកត់សម្គាល់។ យោងតាមគេហទំព័រ clevelandclinic.org  មានរោគសញ្ញាសំខាន់ៗ មួយចំនួន ដែលអាចសង្ស័យថា អ្នកមានដុះដុំសាច់ក្នុងខួរក្បាល។

ជាទូទៅអ្នកដែលមានជំងឺនេះច្រើនតែមានអាការឈឺក្បាល (ឈឺក្បាលខ្លាំងនៅពេលព្រឹក ឬពេលកណ្ដាលយប់) អ្នកជំងឺខ្លះ អស់កម្លាំងខ្លាំងខុសធម្មតា អ្នកជំងឺមានអាការពិបាកនិយាយ មានបញ្ហាស្មារតី ពិបាកយល់គ្នា អ្នកជំងឺមានអាការទន់នៅផ្នែកណាមួយនៃរាងកាយ ឬទន់មួយចំហៀងខ្លួនតែម្ដង បាត់បង់លំនឹងរាងកាយ ស្រវាំងភ្នែក ថយចុះការស្ដាប់ ស្ពឹកៗលើផ្ទៃមុខ ក្អួតចង្អោរ និងវង្វេងស្មារតីជាដើម ។ 

ជំងឺដុំសាច់ក្នុងខួរក្បាលជាញឹកញាប់ត្រូវបានគេរកឃើញថាកើតច្រើនទៅលើកុមារ និងមនុស្សវ័យជំទង់ ប៉ុន្តែវាក៏អាចកើតលើមនុស្សគ្រប់វ័យដែរ។ ទោះជាវាជាប្រភេទដុំសាច់ដែលជាមហារីក ឬមិនមែនក៏ដោយ ប្រសិនបើវាមានទំហំធំ វាអាចបង្កឱ្យមានការរំខានដល់ប្រព័ន្ធប្រតិបត្តិការសំខាន់ៗនៃខួរក្បាល និងប៉ះពាល់ដល់សកម្មភាពត្រួតពិនិត្យរបស់រាងកាយទាំងមូល។

ក្នុងករណីដែលអ្នក ឬកូនរបស់អ្នកមានលក្ខណៈរោគសញ្ញាដូចបានរៀបរាប់ខាងលើ កុំស្ទាក់ស្ទើរក្នុងការទៅជួបគ្រូពេទ្យ ពិនិត្យធ្វើរោគវិនិច្ឆ័យឱ្យបានច្បាស់ ការរកឃើញជំងឺឱ្យបានទាន់ពេល ជាឱកាសដែលអ្នកអាចតតាំងជាមួយជំងឺបាន ហើយអាចមានឱកាសព្យាបាលកាន់តែមានប្រសិទ្ធភាព មុនពេលដុំសាច់កាន់តែរីកធំ និងបង្ករឱ្យមានផលប៉ះពាល់កាន់តែធ្ងន់ធ្ងរនាំឱ្យពិបាកក្នុងការព្យាបាល៕

អត្ថបទដោយ៖ សារួ