លុយអាចសំខាន់ក្នុងជីវិតគ្រួសារ ប៉ុន្តែមិនមែនជាអ្វីដែលសំខាន់បំផុតសម្រាប់មនុស្សស្រីទាំងអស់ទេ។ ប៉ុន្តែបុរសមួយចំនួបែរជាយល់ថា ឱ្យតែខ្លួនខំធ្វើការរកលុយឱ្យបានច្រើនគឺគ្រប់គ្រាន់ហើយសម្រាប់បង្ហាញពីក្ដីស្រលាញ់។ នចំពោះស្ត្រីជាច្រើន អ្វីដែលពិបាករកជាងលុយគឺ “ការយល់ចិត្ត” ។ ខាងក្រោមនេះគឺរឿង ៣ ដែលមនុស្សស្រីចង់បានបំផុត បុរសៗគួរតែដឹង៖
១. មនុស្សស្រីចង់បានស្ថេរភាពខាងផ្លូវចិត្ត៖ សម្រាប់មនុស្សស្រី សុខភាពផ្លូវចិត្ត និងអារម្មណ៍មានតម្លៃខ្លាំង។ មនុស្សស្រីអាចរស់នៅក្នុងផ្ទះតូច ប្រើជីវិតសាមញ្ញបាន បើនាងមានប្ដីដែលយល់ចិត្ត ចេះថ្នាក់ថ្នម និងនៅក្បែរ ពេលនាងត្រូវការការលួងលោម ឬការលើកទឹកចិត្ត។ សុភមង្គលពិត មិនអាចវាស់ ដោយទ្រព្យសម្បត្តិ ឬទំហំផ្ទះបានទេ ប៉ុន្តែវា ស្ថិតលើការរស់នៅដោយរីករាយ ជាមួយគ្រួសារ និងការយល់ចិត្តគ្នា។ ដូច្នេះសម្រាប់អ្នកជាស្វាមី កុំរំលងឱ្យសោះចំពោះការយកចិត្តទុកដាក់ចំពោះរឿងតូចៗ ធ្វើជាអ្នកស្ដាប់ដ៏ល្អ មិនធ្វើឱ្យនាងបារម្ភ ទាំងនេះជារបស់ដែលលុយមិនអាចទិញបាន។
២. មនុស្សស្រីមិនត្រូវការពាក្យផ្អែមល្ហែមពេកទេ៖ មនុស្សស្រីមិនចង់បានពាក្យស្រលាញ់ផ្អែមល្ហែមដែលគ្រាន់តែស្តាប់ហើយឆ្ងាញ់ត្រចៀកទេ។ អ្វីដែលនាងចង់ឃើញគឺទង្វើរ ព្រោះពាក្យ “ស្រលាញ់” នរណាក៏អាចនិយាយបាន។ មនុស្សស្រីភាគច្រើនពេញចិត្តចំពោះបុរសដែល “និយាយមួយ ធ្វើមួយ” និងមិនពេញចិត្តចំពោះបុរសដែលមិនអើពើនឹងអារម្មណ៍របស់នាងឡើយ។ នាងត្រូវការអ្នកដែលហ៊ាននិយាយ ហ៊ានធ្វើ មានទំនួលខុសត្រូវ និងអាចផ្តល់អារម្មណ៍សុវត្ថិភាពឱ្យនាងបាន។
៣. ធ្វើជាអ្នកផ្តួចផ្តើមគំនិត និងចូលរួម៖ ស្ត្រីចង់បានបុរសដែលមិនត្រឹមតែអាចរកលុយឱ្យនាងទេ តែនាងត្រូវការបុរសម្នាក់ដែលនាងអាចចែករំលែកជាមួយបាន ដូចជា ជួយមើលកូន ឬជួយរំលែកកិច្ចការផ្ទះតិចតួចជាមួយនាង ទង្វើរតូចៗទាំងនេះគឺជាអ្វីដែលមនុស្សស្រីជាច្រើនត្រូវការខ្លាំងបំផុត។
មនុស្សស្រីមិនស្វែងរកបុរសដែលមានលុយច្រើនបំផុត តែនាងត្រូវការអ្នកដែលចេះស្តាប់ ចេះយល់ ចេះថែរក្សា មានទំនួលខុសត្រូវ ដែលនាងអាចទុកចិត្តបាន។ ពេលបុរសយល់ពីអ្វីដែលមនុស្សស្រីត្រូវការពិតប្រាកដ ទំនាក់ទំនងនិងកាន់តែស្និតស្នាល កក់ក្តៅ ហើយអ្នកទាំងពីរនឹងរីករាយជាមួយគ្នានៅក្នុងជីវិតគូ៕
អត្ថបទដោយ៖ សារួ