អ្នកមានអាយុវែងភាគច្រើនបំផុត ព្រោះគេមានទម្លាប់ល្អៗ ប្រចាំជីវិត។ មានន័យថាគេរស់នៅក្នុងទម្លាប់នេះជាប្រចាំថ្ងៃ ទាំងការគេង ការធ្វើចលនា និងការហូបអាហារជាដើម។ បុគ្គលអាយុវែងមានមានទម្លាប់ទាំង ៤នេះ មានអ្វីខ្លះ?
១. ពង្រឹងរាងកាយជាប្រចាំថ្ងៃ៖ បើយើងក្រឡេកមើលប្រជាជនដែលមានអាយុវែងជាងគេក្នុងពិភពលោកនេះគឺជប៉ុន។ មានទម្លាប់មួយដែលពួកគេធ្វើមិនត្រឹមមួយថ្ងៃ មួយសប្តាហ៍ ឬមួយខែនោះទេ ធ្វើមួយជីវិតតែម្តងគឺធ្វើលំហាត់ប្រាណ។ បើពួកគេគ្មានសកម្មភាពរាងកាយទេនាំឱ្យបាត់បង់សាច់ដុំពេលវ័យកាន់តែចាស់ទៅនោះឯង។ ដើម្បីទប់ទល់ការផ្លាស់ប្តូរនេះ មានតែការធ្វើលំហាត់ប្រាណនេះឯង។ តាមការសិក្សាជាច្រើនក៏បានបញ្ជាក់ដែរថា បុគ្គលដែលធ្វើលំហាត់ប្រាណច្រើនជួយការពារជំងឺកាំងបេះដូង និងលើសឈាមផងដែរ។ នេះជាហេតុធ្វើឱ្យពួកគាត់មានអាយុវែង ហើយរស់នៅគ្មានជំងឺកាចចូលក្នុងខ្លួនផងដែរ។
២. គេងថ្ងៃល្អដល់ខួរក្បាល៖ ការគេងពេលថ្ងៃជួយកាត់បន្ថយដាច់សរសៃឈាមខួរក្បាលបានល្អបំផុត។ តាមការសិក្សាជាច្រើនបានបង្ហាញថាបុគ្គលមានអាយុវែងតែងមានទម្លាប់គេងពេលថ្ងៃចំនួន ១០ទៅ២០នាទីដើម្បីសម្រាកខួរក្បាល និងផ្លូវចិត្តបានស្ងប់។ អ្នកមានទម្លាប់គេងថ្ងៃជាប្រចាំជួយកាត់បន្ថយការប្រឈមនឹងការស្លាប់ដោយសារជំងឺបេះដូង។ ព្រោះការគេងថ្ងៃអាចជួយសុខភាពបេះដូងដោយរក្សាកម្រិតស្ត្រេស និងភាពតានតឹងនៅទាបបំផុត។
៣. ទម្លាប់ផឹកកាហ្វេដើម្បីពង្រឹងសុខភាពកុំឱ្យភ្លេច និងសរសៃឈាម៖ តាមលោក Dan Buettner ជាអ្នកជំនាញអាយុវែងបានបញ្ជាក់ថា កាហ្វេត្រូវបានប្រើប្រាស់យ៉ាងទូលំទូលាយនៅតំបន់ Ikaria, Sardinia និង Nicoya ព្រោះវាជាភេសជ្ជៈពេញនិយមបានផ្សារភ្ជាប់ទៅនឹងអត្រាទាបការពារជំងឺផាកឃីនសុនឬជំងឺភ្លេច និងការពារការដាច់សរសៃឈាមយ៉ាងល្អ។ អ្នកអាយុវែងភាគច្រើន(អ្នកខ្លះអត់បានផឹកកាហ្វេតែចំនួនតិច) ចូលចិត្តជាតិកាហ្វេអ៊ីនដែលក្នុងកាហ្វេជាកត្តាសំខាន់ឱ្យអារម្មណ៍មនុស្សរីករាយនិងសរសៃឈាមរបស់ខួរក្បាលមានដំណើរស្រួល ការពារជំងឺដាច់សរសៃឈាមបានល្អបំផុតផងដែរ។
៤. ទម្លាប់ជួយផ្លូវចិត្តរឹងមាំ៖ អ្នកអាយុវែង គេគ្មានទម្លាប់រស់នៅអតីត និងអនាគត គឺរស់នៅក្នុងពេលឥឡូវនេះ។ មនុស្សដែលមានបញ្ហាផ្លូវចិត្តច្រើន តែងតែខ្វល់ពីអតីតកាល និងអនាគតច្រើនពេក វាធ្វើឱ្យគាត់គ្មានសតិរស់នៅពេលបច្ចុប្បន្ន។ តាមលោកវេជ្ជបណ្ឌិត Hinohara បានផ្តល់យោបល់ថា អ្នកត្រូវរស់នៅជាមួយការសប្បាយចិត្តក្នុងបច្ចុប្បន្ននេះ ពេលឥឡូវនេះ ដើម្បីធ្វើបែបនេះបាន អ្នកកុំប្រកាន់គំនិតនេះក្នុងភាពមានះខ្លាំងពេក កុំសន្យំរឿងអវិជ្ជមាន កុំភ្លេចថែរក្សាចិត្តផងដែរ គឺអ្នកត្រឹមតែរស់នៅដោយសតិបញ្ញា នៅក្នុងភាពជាកណ្តាល។” វាពិតជាមានអត្ថន័យអស្ចារ្យខ្លាំងណាស់ សម្រាប់លោកវេជ្ជបណ្ឌិតចង់មានន័យថា អ្នកត្រូវប្រឹងឱ្យអស់ពីសមត្ថភាព និងសម្រួលចិត្តដោយចិត្តនៅកណ្តាលក្នុងបច្ចុប្បន្នកាលពេលនេះ ធ្វើឱ្យចិត្តរបស់អ្នកគ្មានសម្ពាធនោះទេ៕ អត្ថបទដោយ៖ ទ្រ សុភាព