នៅក្នុងសង្គមរបស់យើងមានបញ្ហារឿងគ្រួសារនេះ មានករណីលែងលះគ្នា និងរស់នៅមិនចុះសម្រុងនឹងគ្នា មានការបង្កើនឡើង។ ការពិត វាជារឿងតូចៗ បញ្ហាប្រចាំថ្ងៃ ប៉ុន្តែរឿងតូចៗ នេះនាំឱ្យកើតជំងឺមហារីកក្នុងចិត្តបាន។ តាមលោក Dale Carnegie ជាអ្នកគ្រូតាផ្នែកចិត្តសាស្រ្តនាំផ្នែកសុភមង្គលគ្រួសារ និងជាអ្នកនិពន្ធកម្រិតពីភពលោក បានណែនាំពីគោលការណ៍ ១នេះ នាំឱ្យគ្រួសាររស់នៅមានក្តីសុខ៖
ការរស់នៅក្នុងគ្រួសារតែងមានទំនាស់ និងការមិនពេញចិត្តណាមួយមិនខានទេ រវាងប្តីប្រពន្ធនោះ។ ប៉ុន្តែលោក ក្លេតស្ទោន ជានាយករដ្ឋមន្រ្តី ២ម្តងនៃប្រទេសអង្គគ្លេស និងមានប្រពន្ធឈ្មោះ ខេតឺរីន គាត់មានវិធីសាស្រ្តមួយ ក្នុងការរស់នៅជាមួយគ្រួសារឱ្យមានសុភមង្គលខ្លាំងណាស់។ គាត់បានរស់នៅជាមួយប្រពន្ធអស់រយៈពេល ៥៩ឆ្នាំដល់ថ្ងៃចុងនៃជីវិត។
ប៉ុន្តែនៅក្នុងផ្នែកនយោបាយរបស់លោក ក្លេតស្ទោន មានសត្រូវកាចសាហាវបំផុតម្នាក់ គឺ ឌីស្រាអេលី។ និយាយទៅ អ្នកទាំងពីរនេះ ប្រឆាំងគ្នា និងឈ្លោះគ្នាដូចព្យុះចឹង នាពេលជជែកដេញដោលពីកិច្ចការប្រទេសជាតិម្ដងៗ យ៉ាងតឹងសរសៃរករម្នាក់ៗ ប៉ុន្តែពួកគាត់មានចំណុចពិសេសដូចគ្នា គឺគ្រួសារមានសុភមង្គល និងមានក្តីស្រឡាញ់គ្នាខ្លាំងបំផុត។ តើគាត់មានវិធីសាស្រ្តអ្វី បានជាធ្វើឱ្យប្តីប្រពន្ធកាន់តែស្រឡាញ់គ្នា?
លោក Dale បានលើកឡើងថា នៅគ្រាមួយលោក ក្លេតស្ទោន ចាប់ដៃភរិយាឡើងរាំក្នុងកម្មវិធីមួយនៅក្នុងផ្ទះ ហើយកម្មវិធីនេះ ត្រូវបានបញ្ចប់នៅយប់ជ្រៅ។ បើនិយាយពីលោក ក្លេតស្ទោន សូម្បីតែនៅក្នុងគណបក្សប្រឆាំងក៏ញញើតនឹងអំណាចគាត់ក្នុងសភាដែរ។ ពេលគាត់ភ្ញាក់ឡើង ចុះមកក្រោមហូបអាហារពេលព្រឹក គាត់បានឃើញប្រពន្ធ និងកូនកំពុងតែដេកលក់។ គាត់មិនបានស្រែជេរ និងនិយាយសម្តីខ្លាំងៗ ដូចនៅរដ្ឋសភាទេ។
គាត់មានវិធីសាស្រ្តយ៉ាងសាមញ្ញមួយថា គាត់បានស្រែកច្រៀងខ្លាំងៗ ដើម្បីឱ្យប្រពន្ធកូនបានឮ ហើយភ្ញាក់មកហូបអាហារពេលព្រឹកជុំគ្រួសារដោយអារម្មណ៍រីករាយ។ លោក ក្លេតស្ទោន បានប្រកាន់គោលការណ៍មួយនេះ មិនត្រូវបន្ទោសរិះគន់អ្នកនៅក្នុងផ្ទះនោះទេ។ ព្រោះប្តីប្រពន្ធមានបេះដូងអាចនិយាយស្តាប់គ្នាបាន បើរិះគន់គ្នា ក៏គ្មានប្រយោជន៍អ្វីដែរ។ គាត់បានប្តូរពីការស្រែក ឬរិះគន់ មកជាច្រៀងខ្លាំងវិញ វាជាវិធីល្អ។
តាមលោកស្រី ដូរ៉ូធី ឌិកស៍ ជាអ្នកនិពន្ធជើងឯកអំពីរឿងជីវិតគូស្រករ បានបញ្ជាក់ថា ជីវិតអាពាហ៍ពិពាហ៍របស់ជនជាតិអាមេរិកប្រមាណជាងពាក់កណ្តាលបានជួបនឹងការបរាជ័យ លែងលះគ្នា និងគូជីវិតរស់ក្នុងការគ្រាំចិត្ត គឺការបន្ទោសរិះគន់នេះឯង។ ព្រោះការបន្ទោសរិះគន់ឥតប្រយោជន៍ដែលធ្វើឱ្យដៃគូជីវិតឈឺចាប់ និងគ្រាំគ្រាចិត្តម្តងបន្តិចៗ ក្លាយជាដំបៅចិត្ត។ អ្នកត្រូវប្រកាន់គោលការណ៍មួយនេះ កុំបន្ទោសរិះគន់ចំៗ ក្នុងគ្រួសារឱ្យសោះ៕ អត្ថបទដោយ៖ ទ្រ សុភាព