អ្នកត្រូវរៀនអត់ធ្មត់សំន្សំអ្វីៗដែលអ្នកមានម្តងបន្តិចៗដើម្បីបានតាមវត្ថុបំណងរបស់ខ្លួន។ ការសំន្សំនេះជះឥទ្ធិពលមកលើខ្សែជីវិតរបស់មនុស្សគ្រប់គ្នា។ ការចិញ្ចឹមកូន ការទំនាក់ទំនងក្នុងសង្គម ស្មេហា មិត្តភក្រ័ និងខ្លួនរបស់អ្នក។ ការសំន្សំជាបាតគ្រឹះនៃមាគា៍ទាំងឡាយណាក្នុងការសម្រេចគោលដៅ។ បើមិនស្គាល់វត្តុបំណងរបស់ខ្លួនជាអ្វីទេ អ្នកមិនអាចសម្រេចអ្វីដែលមានតម្លៃសម្រាប់ជីវិតនោះទេ។

ខ្ញុំដឹងថា ខ្ញុំចង់អានសៀវភៅមួយក្បាលខ្លាំងណាស់ គឺខ្ញុំដឹងពីសារៈប្រយោជន៍របស់វា តែខ្ញុំគ្មានលុយទេ បើខ្ញុំគិតថា ខ្ញុំគ្មានលុយទេ រួចនិយាយថា កុំទិញអី ខួរក្បាលរបស់ខ្ញុំនឹងឈប់គិតភ្លាម។ ខ្ញុំគ្រាន់តែប្តូរគំនិតអ្វីៗក៏ប្តូរតាមដែរ។ ខ្ញុំចាប់ផ្តើមរកលុយ និងសន្សំលុយដើម្បីទិញវា។ មនុស្សមានសមត្ថភាពប្រើគំនិតរបស់ខ្លួនដើម្បីដោះស្រាយបញ្ហា។ បើអ្នកស្គាល់ពីអ្វីដែលអ្នកចង់បានពិតប្រាកដ អ្នកនឹងមានថាមពលធ្វើការយ៉ាងអត់ធ្មត់ដើម្បីទទួលបានវា។ ទោះបីវាមានបញ្ហាជាច្រើនក៏ដោយ អ្នកត្រូវដោះស្រាយវាផ្តើមពីតូចដែរ។

ពេលអ្នកចាប់ផ្តើមដោះស្រាយវាពីតូចៗ វាសន្សំជំនាញសមត្ថភាពរបស់អ្នកកាន់តែខ្លាំងឡើង។ ចូរអ្នកសន្សំអ្វីមួយពីតូច វានឹងក្លាយជារបស់ធំមិនខានឡើយ។ ទស្សនៈវិទូចិន សាសនាតៅបាននិយាយថា មុននឹងស្ថបនាអាគារមួយ ត្រូវចាប់ផ្តើមពីដុំឥតមួយសិន មុននឹងធ្វើដំណើរបានរាប់រយៈគីឡូ ត្រូវចាប់ផ្តើមពីជំហានដំបូងសិនដែរ។ អ្នកនឹងឃើញដើមឈើមួយដែលមានភាពលូតលាស់ បានខ្ពស់ និងយ៉ាងរឹងមាំ វាត្រូវប្រើពេលវេលារាប់សិបឆ្នាំ រួចឆ្លងកាត់ឧបសគ្គព្យុះភ្លៀងជាច្រើន។ មនុស្សយើងចង់សម្រេចអ្វីមួយ ត្រូវយល់ពីច្បាប់សន្សំនេះជាមុនសិន។

ពេលអ្នកចាប់ផ្តើមសន្សំអ្វីមួយពីតូច ផលវានឹងចាប់ផ្តើមធំម្តងបន្តិចៗជានិច្ច។ លោក John C. Maxwell​ ជាអ្នកនិពន្ធ និងជាអ្នកជំនាញភាពជាអ្នកដឹកនាំកម្រិតពិភពលោកនេះ ហើយលោកបាននិយាយាថា ទោះបីមានមនុស្សមួយចំនួនកើតមកមានទេពកោសល្យជាងអ្នកដទៃ តែសមត្ថភាពក្នុងការដឹនាំមនុស្សឲ្យដើរតាមនោះ គឺកើតពីច្បាប់សន្សំជំនាញជារៀងរាល់ថ្ងៃតែប៉ុណ្ណោះ។ ការសម្រេចដំណើរកិច្ចការអ្វីមួយ មិនមែនចាប់ផ្តើមត្រឹមតែមួយថ្ងៃចប់នោះទេ គឺវាមានតាមដំណាក់កាលនីមួយៗរបស់វាដែលត្រូវប្រើពេលវេលាផងដែរ៕ អត្ថបទដោយ៖ ទ្រ សុភាព