តើរោគសញ្ញានៃជំងឺច្រាលអាស៊ីតក្រពះមានដូចម្តេចខ្លះ?
១. មានអារម្មណ៍ក្ដៅក្នុងទ្រូង (ក្រហាយទ្រូង) បន្ទាប់ពីបរិភោគអាហារច្រើន ឬពត់បត់ខ្លួន លើកវត្ថុធ្ងន់ៗ ឬទំលាក់ខ្លួនដេក។
២. មានរសជាតិល្វីង ហឹរ ឬជួរក្នុងមាត់ ដែលបណ្ដាលឱ្យមានផលវិបាកក្នុងបំពង់អាហារដូចជា ការរលាក ការហូរឈាម និងពិបាកលេប។
៣. ហើមពោះ មានអារម្មណ៍ថាឆាប់ឆ្អែត ចង្អោរ និងក្អួតបន្ទាប់ពីការបរិភោគ។

តើមូលហេតុណាខ្លះបង្កអោយមានជំងឺច្រាលអាស៊ីតក្រពះ?
១. ភាពមិនប្រក្រតី រឺ ភាពខ្សោយនៃប្រឹសបំពង់អាហារផ្នែកខាងក្រោម (Sphincter) ដោយការប្រើប្រាស់គ្រឿងស្រវឹង ថ្នាំជក់ និងថ្នាំព្យាបាលជំងឺហឺតមួយចំនួន។
២. ភាពមិនប្រក្រតីនៃបំពង់អាហារ ធ្វើឲ្យអាហារដែលធ្លាក់ចូលទៅក្នុងក្រពះមានការយឺតយ៉ាវ បណ្ដាលឱ្យសារធាតុដែលនៅក្នុងក្រពះហូរត្រឡប់មកវិញ និងស្ថិតនៅក្នុងបំពង់អាហារយូរជាងធម្មតា។
៣. ភាពមិនប្រក្រតីនៃក្រពះ ដែលបណ្ដាលឲ្យមានភាពយឺតយ៉ាវក្នុងការរុញច្រានចំណីអាហារទៅក្នុងពោះវៀន និងបង្កើននូវរោគសញ្ញានៃការច្រាលទឹកអាស៊ីតក្រពះ។ អាហារមានជាតិខ្លាញ់ និងស្ករសូកូឡាគឺកាត់បន្ថយការកន្ត្រាក់របស់ចលនាក្រពះ។
៤. ជំងឺទឹកនោមផ្អែម ជាពិសេសផលលំបាករបស់វាទៅលើសរសៃប្រសាទ។

អ្នកគួរចំណាយពេលខ្លះ ហាត់ប្រាណ គេងឱ្យបានគ្រប់គ្រាន់ និងជៀសវាងមានអារម្មណ៍តានតឹង។ ជាចុងក្រោយ ជំងឺច្រាលអាស៊ីតក្រពះអាចក្លាយជាជំងឺរ៉ាំរ៉ៃ ប្រសិនបើអ្នកជំងឺមិនទទួលបានការព្យាបាលឲ្យបានត្រឹមត្រូវទេនោះ វាអាចប៉ះពាល់ដល់ការរស់នៅប្រចាំថៃ្ងព្រមទាំងមានការចំណាយច្រើន៕ អត្ថបទដោយ៖ ទ្រ សុភាព