ពេលអ្នកមានអារម្មណ៍ស្ត្រេសច្រើន រាងកាយនឹងផលិតអ័រម៉ូនធ្វើឱ្យអ្នកអស់កម្លាំងពីខ្លួន បន្ទាប់មកយើងត្រូវការអាហារមានរសជាតិផ្អែមៗ ដើម្បីផ្តល់ថាមពលឱ្យរាងកាយឡើងវិញ។ ចំពោះបញ្ហាស្រ្តេសនេះ វាក៏នាំផលប៉ះពាល់ដល់ការគ្រប់គ្រងជាតិស្ករក្នុងឈាមហើយរាងកាយរបស់អ្នកក៏ប្រែទៅជាធាត់ដែរ។ ហើយបញ្ហាធាត់នេះ ងាយនាំអ្នកកើតជំងឺទឹកនោមផ្អែមដោយអត់ដឹងខ្លួននោះទេ។ បើមិនបានទៅពិនិត្យសុខភាពទេនោះ។
ពេលអ្នកមានអារម្មណ៍តានតឹង និងស្រ្តេសយូរឆ្នាំដែរនោះ ព្រោះរាងកាយអ្នកបានបញ្ចេញអរម៉ូនស្ត្រេសដូចជា cortisol និង adrenaline ដែលវាជម្រុញសម្រាប់ការឆ្លើយតប ស្រ្តេសជាមួយរាងកាយ។ យោងតាមគេហទំព័រ Medicalnewstoday បានចុះផ្សាយថា “ពេលស្រ្តេសច្រើន ហើយអ្នកខ្វះការរៀបចំចំណីអាហារឱ្យបានត្រឹមត្រូវ (ហូបតាមឃ្លាន) ធ្វើឱ្យកម្រិតជាតិស្ករក្នុងឈាមកើនឡើង នៅក្នុងការរោគវិនិច្ឆ័យជំងឺទឹកនោមផ្អែម វាបង្កើនជាតិស្ករក្នុងឈាម និងកម្រិតអេម៉ូក្លូប៊ីន glycated ផងដែរ។ មានសញ្ញាប្រាប់អ្នកកំពុងតែនាំជំងឺទឹកនោមផ្អែមដាក់ខ្លួនគឺរាងកាយរបស់អ្នកប្រែជាធាត់(ចូលចិត្តផឹកស្រា ផឹកកាហ្វេស្ករច្រើន និងភេសជ្ជៈផ្សេងៗ មានជាតិច្រើន)”។
តាមវេជ្ជបណ្ឌិត មិញ ចាន់ភក្ដី ឯកទេសព្យាបាលជំងឺទឹកនោមផ្អែមបានលើកឡើងថា “ទម្លាប់តែ១នេះ យូរនឹងឆាប់ក៏អាចឱ្យអ្នកកើតជំងឺទឹកនោមផ្អែមបានទាំងមិនដឹងខ្លួនមិនខានទេ ទម្លាប់១នោះ គឺអ្នកស្រ្តេសរាល់ថ្ងៃ”។ នៅពេលស្ត្រេស រាងកាយនឹងបង្ហូរអរម៉ូនដែលធ្វើឱ្យជាតិស្ករឡើងខ្ពស់។ ពេលខ្លះ ការគេងមិនគ្រប់គ្រាន់ក៏អាចធ្វើឱ្យរាងកាយមានភាពធន់នឹងអាំងស៊ុយលីន និងបង្កឱ្យជាតិស្ករឡើងខ្ពស់។ បន្ថែមពីនេះអ្នកគួរតែទៅពិនិត្យសុខភាពជាមួយគ្រូពេទ្យឱ្យបានជាប្រចាំ។ ហើយគួរធ្វើលំហាត់ប្រាណ ដើម្បីបញ្ចុះជាតិស្ករចេញឈាមផងដែរ៕ អត្ថបទដោយ៖ ទ្រ សុភាព