តារាសម្ដែងជើងចាស់លោក Jackie Chan ខ្មែរយើងនិយមហៅគាត់ថា ឈិន ឡុង ឆ្លុះបញ្ចាំងពីកំហុសឆ្គងក្នុងការធ្វើជាឪពុករបស់លោកគឺបានបរាជ័យ ហើយមានអារម្មណ៍ស្តាយក្រោយជាខ្លាំងផងដែរ។ រាល់ការប្រៀនប្រដៅយ៉ាងតឹងរ៉ឹងអស់រយៈពេលជាច្រើនឆ្នាំបានបង្កើតឱ្យកូនគាត់មានអារម្មណ៍ភ័យខ្លាច និងកាន់តែឃ្លាតឆ្ងាយរវាងលោក និងកូនប្រុសមានឈ្មោះថា Jaycee Chan។
លោក ឆិន ឡុង ដែលមានវ័យ ៧១ឆ្នាំ។ ចំណែកកូនប្រុសលោកមានវ័យ ៤៣ឆ្នាំ។ ហើយលោក ឈិន ឡុង បានទទួលស្គាល់ថា ការចិញ្ចឹមកូនដ៏ឃោរឃៅរបស់គាត់បានដើរតួនាទីយ៉ាងសំខាន់ក្នុងការបំបែកពួកគេចេញពីគ្រួសារដោយគ្មានសុភមង្គលសោះ។
ថ្មីៗ នេះ ខណៈពេលកំពុងផ្សព្វផ្សាយខ្សែភាពយន្តចិនចុងក្រោយរបស់លោក ឆិន ឡុង ដែលមានចំណងជើងថា Unexpected Family គាត់បានបង្ហាញថា ឈុតឆាកផ្សះផ្សារវាងឪពុក និងកូនប្រុសនៅចុងបញ្ចប់នៃខ្សែភាពយន្តនេះបានធ្វើឱ្យគាត់រំជួលចិត្តយ៉ាងខ្លាំងជាកត្តាជម្រុញចិត្តគាត់ឱ្យគិតដល់អំពីទំនាក់ទំនងជាមួយកូនប្រុស។
ការឆ្លុះបញ្ចាំនេះបានបង្ហាញពីជំនឿចិត្តគាត់ថា ជាការធ្វើជាឪពុកដ៏តឹងរ៉ឹងបំផុតក្នុងការចិញ្ចឹមកូនប្រុសគឺចង់ឱ្យកូនធ្វើអ្វីៗ តាមគំនិតរបស់គាត់ជាឪពុក រហូតកូនគាត់មានអារម្មណ៍ខ្លាចគាត់។ ផ្នត់គំនិតដាក់សម្ពាធលើកូនប្រុសឱ្យល្អគ្រប់ដបបែបនេះជាកំហុសមួយដែលឪពុកម្តាយផ្សេងៗ សូមកុំធ្វើតាមឱ្យសោះ។ ងាកទៅរកអតីតកាលបន្តិចគឺបានលើកឡើងថា ខ្ញុំតែងតែរិះគន់កូនប្រុសរបស់គាត់ជានិច្ច។ ព្រោះតែកូនធ្វើខុសពីបំណងដែលគាត់ចង់បាន។
គាត់បានបន្តថា “កាលពីមុន រាល់ពេលដែលខ្ញុំឃើញកូនប្រុសរបស់ខ្ញុំ ខ្ញុំតែងតែស្តីបន្ទោសកូនរហូត។ រាល់ពេលដែលខ្ញុំចេញតាមទូរទស្សន៍ ខ្ញុំតែងតែរិះគន់ ហើយខ្ញុំមិនដែលមានពាក្យសម្ដីល្អណាមួយនិយាយចំពោះកូនប្រុសឡើយ។ មានពេលមួយជាថ្ងៃកំណើតរបស់ខ្ញុំ កូនប្រុសខ្ញុំបានតេទូរស័ព្ទមកជូនពរ ត្រូវខ្ញុំស្តីបន្ទោសថែមទៀត... ខ្ញុំខុសហើយ។ ការអប់រំកូនមិនគួរធ្វើបែបនេះទេ ខ្ញុំគួរតែផ្តល់សេរីភាពដល់កូនច្រើនជាងនេះ”។ ការអប់រំបែបនេះនាំឱ្យភាពតានតឹងរវាងឪពុក និងកូនកាន់តែអាក្រក់ទៅៗ តាមពេលវេលាហ្នឹងដែរ៕ អត្ថបទដោយ៖ ទ្រ សុភាព