តាមលោក Jonathan Haidt ជាអ្នកចិត្តសាស្ត្រពីសាកលវិទ្យាល័យ NYU បានបញ្ជាក់ថា សម័យបច្ចុប្បន្ននេះ មានកុមារជាច្រើនកំពុងតែប្រឈមជំងឺថប់បារម្ភ និងជំងឺបាក់ទឹកចិត្ត វាបណ្តាលមកពីឪពុកម្តាយបណ្តោយកូនលេងទូរស័ព្ទមួយថ្ងៃលើសពីមួយម៉ោងទៅពីរម៉ោង នេះជាបញ្ហាធំទៅអនាគតកុមារ។ ហើយពេលកូនលេងទូរស័ព្ទច្រើនម៉ោងក្នុងមួយថ្ងៃនាំឱ្យខួរក្បាលគាំងភាសារទំនាក់ទំនងជាមួយឪពុកម្តាយ។
យោងតាមលោកវេជ្ជបណ្ឌិត Thomas C. Chen អ្នកជំនាញខាងប្រព័ន្ធប្រសាទបានលើកឡើងពីហានិភ័យដល់ក្មេងៗ បានបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ មានការសិក្សាជាច្រើនបានបង្ហាញអំពីផលប៉ះពាល់នៃវិទ្យុសកម្មទូរស័ព្ទដៃមកលើខួរក្បាលរបស់កុមារ។ ជាមួយគ្នានេះផងដែរមានការលើកឡើងថា កុមារលេងទូរស័ព្ទដៃច្រើនមានលទ្ធភាពកើតដុំសាច់នៅក្នុងខួរក្បាល ករណីនេះមកពីកុមារទទួលផលប៉ះពាល់នៃធាតុវិទ្យុសកម្មហួសកម្រិតខ្លាំងហើយប្រព័ន្ធភាពសុំាកុមារខ្សោយផងនោះ វាជាឱកាសឱ្យប្រព័ន្ធវិទ្យុសកម្មវាយប្រហារមកលើប្រព័ន្ធខួរក្បាលកុមារ”។
សូម្បីតែអង្គការសុខភាពពិភពលោក (WHO) បានចាត់ថ្នាក់វិទ្យុសកម្មទូរស័ព្ទដៃ អាចបង្កមហារីកដល់មនុស្សបានដែរ។ ជាពិសេសកុមារងាយនឹងស្រូបសារធាតុវិទ្យុសកម្មក្នុងទូរស័ព្ទចូលខួរក្បាលច្រើនជាង៦០% ជាងមនុស្សពេញវ័យ។ វាត្រូវបានគេជឿថា ស្បែក ជាលិកា និងឆ្អឹងកាន់តែស្តើងនៃខួរក្បាលរបស់ពួកគេ អាចធ្វើឱ្យពួកគេងាយនឹងស្រូបយកវិទ្យុសកម្ម២ដងច្រើនជាងមនុស្សធំ។ ប្រព័ន្ធប្រសាទដែលកំពុងតែអភិវឌ្ឍធ្វើឱ្យពួកគេកាន់តែងាយរងគ្រោះទៅនឹងសារធាតុបង្កមហារីកខួរក្បាលរបស់កុមារលឿនដែរ។
ទោះជាយ៉ាងណា យើងក៏មិនអាចបដិសេធបានថា ពួកគេមិនអាចរស់នៅដោយគ្មានបច្ចេកវិទ្យាទាំងស្រុងបានដែរ។ ដូច្នេះ ក្នុងនាមឪពុកម្តាយអ្នកអាចប្រើវិធីដែលមានតុល្យភាព កំណត់ទីកន្លែងឱ្យពួកគេប្រើដូចជា នៅបន្ទប់ទទួលភ្ញៀវ ឬកន្លែងណាមួយដែលមិនផុតពីក្រសែភ្នែកអ្នក ហើយមិនត្រូវឱ្យពួកគេមានឧបករណ៍ទាំងនេះជារបស់ផ្ទាល់ខ្លួនទេ៕ អត្ថបទដោយ៖ ទ្រ សុភាព