មានប្រជាជនខ្មែរ ភាគច្រើនយល់ច្រលំថា ដំបូងកើតជំងឺទឹកនោមផ្អែមប្រភេទទី១ បន្ទាប់មកវិវត្តទៅជាប្រភេទទី២ ប៉ុន្តែវាមិនដូច្នោះទេ។ ជំងឺទឹកនោមផ្អែមពីរប្រភេទនេះ ចែកដាច់ពីគ្នា ដោយជំងឺទឹកនោមផ្អែមប្រភេទទី១ ច្រើនកើតឡើងបណ្តាលមកពី ប្រព័ន្ធការពាររាងកាយទៅបំផ្លាញកោសិការប៊ែលតារបស់លំពែង ដែលមានមុខងារក្នុងការផលិតអាំងស៊ុយលីន រីឯទឹកនោមផ្អែមប្រភេទទី២ ច្រើនកើតដោយសារ កត្តាចំណីអាហារនិងការរស់នៅ។ មានន័យថានរណាៗក៏អាចមានហានិភ័យកើតបានដែរ ហេតុនេះពលរដ្ឋខ្មែរ ត្រូវយល់ដឹងពីវិធីការពារខ្លួនពីជំងឺរ៉ាំរ៉ៃ ឬឃាតករលាក់មុខនេះឱ្យបានច្បាស់លាស់។
ទម្លាប់កំណត់វាសនាសុខភាពរបស់អ្នក។ បើអ្នកមានទម្លាប់ល្អនាំឱ្យសុខភាពល្អ រស់នៅឆ្ងាយពីជំងឺទឹកនោមផ្អែមផងដែរ។ តាមឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមវេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល បានអញ្ជើញចូលរួមជាអធិបតីភាព ក្នុងទិវាទឹកនោមផ្អែមពិភពលោក ក្រោមប្រធានបទ‟ជំនះឧបសគ្គ ដោះស្រាយបញ្ហាជំងឺទឹកនោមផ្អែម និងសុខុមាលភាព”។
សូមចូលរួមទាំងអស់គ្នា ក្នុងការលើកកម្ពស់ការយល់ដឹង ផ្សព្វផ្សាយចំណេះដឹង ការផ្លាស់ប្ដូរឥរិយាបថរបៀបរបបនៃការរស់នៅដើម្បីកាត់បន្ថយការកើតនៃជំងឺទឹកនោមផ្អែម ដោយបង្កើនសកម្មភាពរាងកាយដូចជាការធ្វើលំហាត់ប្រាណឱ្យបានទៀងទាត់ ការបរិភោគចំណីអាហារប្រកបដោយសុខភាពដោយកាត់បន្ថយអាហារដែលមានជាតិ ប្រៃ ផ្អែម និងជាតិខ្លាញ់ ចៀសវាងការពិសាគ្រឿងស្រវឹង និងបារី។
ក្នុងឱកាសនោះដែរ ឯកឧត្តមរដ្ឋលេខាធិការ បានណែនាំដល់ប្រជាពលរដ្ឋដែលមានជំងឺទឹកនោមផ្អែមត្រូវជ្រើសរើសសេវាព្យាបាលឱ្យបានត្រឹមត្រូវ ពោលត្រូវមកកាន់មន្ទីរពេទ្យឬមណ្ឌលសុខភាពដែលនៅជិតដើម្បីទទួលការព្យាបាលបានទាន់ពេលវេលា ដែលធ្វើឱ្យចំណេញទាំងពេលវេលា ថវិកា និងធានាបាននូវសុខភាពល្អបន្តបំពេញការងារប្រចាំថ្ងៃដូចប្រជាពលរដ្ឋទូទៅ៕