ការសិក្សាជាច្រើនក្នុងវិស័យរោគស្ត្រីបានកត់សម្គាល់ឃើញថា នៅពេលប្រព័ន្ធបន្តពូជរលាក ឆ្លងរោគ ឬរងការខូចខាត វានឹងបង្ហាញឱ្យដឹងតាមរយៈការឈឺចាប់ តែការឈឺចាប់ខ្លះតែងត្រូវបានគេមើលរំលង ព្រោះគិតថាជាការឈឺចាប់ធម្មតា ជាហេតុធ្វើឱ្យស្ត្រីជាច្រើនចេះតែបណ្ដោយខ្លួនរហូតឈានដំណាក់កាលធ្ងន់ធ្ងរពិបាកក្នុងការព្យាបាល។ ដោយឡែកផ្អែកតាមវេបសាយ phunutoday.vn ការឈឺចាប់ ៥ កន្លែងដែលអ្នកមិនគួរមើលរំលងព្រោះជាសញ្ញាព្រមានថាមាត់ស្បូនរបស់អ្នកកំពុងមានបញ្ហា៖
១. ការឈឺចាប់រិលមិនទៀងនៅផ្នែកខាងក្រោមពោះ៖ ជាទូទៅការឈឺចាប់ត្រង់តំបន់នេះកើតនៅពេលដែលស្ត្រីមករដូវ ប៉ុន្តែបើវាឈឺក្នុងរយៈពេលយូរទោះអ្នកមិនមករដូវក៏ដោយនោះ នេះអាចជាសញ្ញារលាកមាត់ស្បូន ឬការឆ្លងមេរោគនៅក្នុងតំបន់ពិសេស។ នៅក្នុងឯកសារព្យាបាលមួយចំនួន វេជ្ជបណ្ឌិតបានកត់សម្គាល់ថា ការរលាកដែលមានរយៈពេលយូរនឹងធ្វើឱ្យជាលិកាជុំវិញមាត់ស្បូនហើម បណ្តាលឱ្យរិល ឈឺចុកចាប់ ឬមានអារម្មណ៍មិនស្រួលនៅខាងក្នុង។
២. ការឈឺចាប់អំឡុងពេលរួមភេទ៖ ការឈឺចាប់អំឡុងពេលរួមភេទ ជាសញ្ញាមួយបង្ហាញពីរចនាសម្ព័ន្ធនៃតំបន់មាត់ស្បូនត្រូវបានខូចខាត រលាក ឬមានការប្រែប្រួលខុសប្រក្រតី។ ក្នុងករណីខ្លះ ស្ត្រីអាចមានអារម្មណ៍ឈឺចាប់ពេលប៉ះកន្លែងរសើបជ្រៅក្នុងទ្វារមាស ធ្វើឱ្យការរួមភេទមិនរលូន។ ករណីនេះអាចទាក់ទងនឹងជំងឺរលាកមាត់ស្បូន ដុំពកមាត់ស្បូន ឬដំបៅលើផ្ទៃ mucosal។ ប្រសិនបើការឈឺចាប់នោះមានឈាមហូរមកស្រាលៗបន្ទាប់ពីការរួមភេទនោះ ស្ត្រីត្រូវតែប្រយ័ត្ន និងជាសញ្ញាថាអ្នកត្រូវតែទៅពិនិត្យសុខភាពជាបន្ទាន់។
៣. ការឈឺចាប់អំឡុងពេលមករដូវ ឬក្រោយពេលមករដូវ៖ ការឈឺចាប់ពេលមករដូវគឺជារឿងធម្មតា តែបើមាត់ស្បូនមានបញ្ហា ការឈឺចាប់នោះនឹងខ្លាំងជាងធម្មតា។ ក្នុងករណីខ្លះ ទោះអ្នកអស់រដូវហើយក៏នៅតែឈឺចាប់ដែរ។ ពេទ្យរោគស្ត្រីនិយាយថា ការរលាក ឬការខូចខាតដល់ស្រទាប់មាត់ស្បូននឹងធ្វើឱ្យស្បូនកន្ត្រាក់កាន់តែខ្លាំង ដែលនាំឱ្យមានការឈឺចាប់ខ្លាំងអំឡុងពេលមករដូវ។ បើក្នុងករណីអ្នកមានអារម្មណ៍ឈឺចាប់ខ្លាំងពិបាកទ្រាំ អ្នកគួរតែទៅមន្ទីរពេទ្យពិនិត្យ និងអាព្យាបាលបានទាន់ពេល។
៤. ឈឺអាងត្រគាកពេលធ្វើចលនា៖ នៅពេលដែលមាត់ស្បូនរលាក ឬមានដំបៅ វានឹងធ្វើឱ្យអ្នកមានអារម្មណ៍ឈឺនៅតំបន់អាងត្រគាក ជាពិសេសពេលអ្នកធ្វើចរលនាដូចជា ឡើងជណ្ដើរ រត់ ឬលើករបស់ធ្ងន់ៗ។ ប្រសិនបើស្ថានភាពនេះកើតឡើងវិញច្រើនដង អ្នកគួរតែទៅពិនិត្យជាមួយគ្រូពេទ្យជំនាញ ជៀសវាពន្យាពេលកាន់តែយូរការប៉ះពាល់ដល់មាត់ស្បូនរបស់អ្នកក៏កាន់តែធ្ងន់ធ្ងរ និងពិបាកក្នុងការព្យាបាល៕
អត្ថបទដោយ៖ សារួ