ការរស់នៅរបស់មនុស្សម្នាក់ៗ មានក្តីសុខឬទុក្ខ សប្បាយឬឈឺចាប់ និងមានឬក្រ វាស្ថិតនៅលើទម្លាប់យើងចាយជាប្រចាំថ្ងៃនេះឯង។ ព្រោះទម្លាប់ល្អ នាំឱ្យជីវិតអ្នករស់មានក្តីសុខ និងគ្មានជំងឺដែរ។ តាមអ្នកចិត្តវិទ្យាលោក Héctor García បានសិក្សាពីមនុស្សអាយុវែង រស់នៅមានក្តីសុខបំផុត ព្រោះតែទម្លាប់ល្អៗ បែបនេះ។ គាត់បានធ្វើដំណើរទៅសិក្សាកោះអូគីណាវ៉ា ធ្វើឱ្យគាត់ចម្លែកចិត្ត និងចាប់អារម្មណ៍ទង្វើមនុស្សរស់នៅទីនោះ។ ហើយមានមនុស្សចាស់ៗ បួនទៅប្រាំនាក់ បាននាំលោក García ស្វែងយល់ពីការរស់នៅអ្នកកោះអូគីណាវ៉ា ហើយអ្វីអស្ចារ្យនោះ ក្នុងចំណោមមនុស្សចាស់ប៉ុន្មាននេះ មានអ្នកនៅក្មេងជាងគេ អាយុត្រឹម ៨៤ឆ្នាំ។ ការបើកឡានរបស់ពួកគាត់បើកឡានវិញ ដូចជាមនុស្សមានអាយុ ៣០ ទៅ៤០ឆ្នាំចឹង។ សុខភាពរឹងមាំ និងរាងកាយរាងរហ័ស ហើយមានស្នាមញញឹមចេញពីបេះដូង ធ្វើឱ្យលោក García មានភាពកក់ក្តៅណាស់។
លោកយាយម្នាក់ បាននិយាយថា “ពេលនេះ ខ្ញុំមានអាយុ ១០៣ឆ្នាំ និងមានសុខភាពល្អ គឺស្នាមញញឹមរបស់ខ្ញុំ និងការជួយអ្នកដទៃនៅជុំវិញខ្លួនខ្ញុំ វាធ្វើឱ្យខ្ញុំមានក្តីសុខណាស់។” ហើយការរស់នៅបែបនេះ របស់លោកយាយ គេហៅថា ikigai។
នៅពេលព្រឹកមួយ លោក García បានក្រោកពីប្រលឹមដើរហាត់ប្រាណ ស្រាប់តែជួបបុរសម្នាក់។ ហើយលោក García បានសួរថា នេះជាទម្លាប់របស់លោកតាមែនទេ? លោកតា បានឆ្លើយដោយទឹកមុខញញឹម និងរាងកាយដោយមានកម្លាំងស្វាហាប់ថា ខ្ញុំមានអារម្មណ៍រីករាយ ពេលខ្ញុំភ្ញាក់នៅម៉ោង ៦ព្រឹក ហើយបេសកម្មរបស់ខ្ញុំ គឺចាប់ផ្តើមទៅមើលថែសួនរបស់ខ្ញុំ ដែលមានដាំបន្លែដូចជា ប៉េងប៉ោះ ផ្លែក្រូច និងផ្លែផ្សេងទៀត។ ព្រោះខ្ញុំចូលចិត្តមើលថែដំណាំទាំងនោះ វាជួយបន្ធូរអារម្មណ៍របស់ខ្ញុំ និងពង្រឹងរាងកាយ កុំឱ្យចុះខ្សោយលឿនផងដែរ។ ខ្ញុំចូលចិត្តដាំបន្លែ និងចម្អិនអាហារហូបដោយខ្លួនឯងបែបនេះ ជាប្រចាំថ្ងៃ ព្រោះវាជា ikigai របស់ខ្ញុំ។
មានលោកតាម្នាក់ទៀត បាននិយាយប្រាប់លោក García ថា ខ្ញុំតែងតែភ្ញាក់ពីគេងនៅម៉ោង ៤ព្រឹក ខ្ញុំមានទម្លាប់សាមញ្ញណាស់ជាប្រចាំថ្ងៃ គឺខ្ញុំផឹកកាហ្វេមួយពង និយាយជាមួយមិត្តភក្តិ និងធ្វើលំហាត់ប្រាណបន្តិចបន្តួចដោយលើកដៃនិងលើកជើង។ ការធ្វើបែបនេះ ដូចជាការបញ្ចូលថាមពលខ្ញុំពេញមួយថ្ងៃចឹងដែរ។” ហើយខ្ញុំញ៉ាំអាហារតិចៗ ប៉ុន្តែច្រើនមុខណាស់ វាមានរសជាតិផ្សេងគ្នា និងជាតិឆ្ងាញ់។ ខ្ញុំគិតថានេះជាអាថ៌កំបាំងរបស់ខ្ញុំ។
ហើយលោក Héctor García សរុបថា ការរស់នៅបានយូរ និងមានក្តីសុខ អ្នកត្រូវធ្វើរឿង ៣នេះ ចូរធ្វើលំហាត់ប្រាណ បរិភោគល្អៗ ដើម្បីពង្រឹងរាងកាយ និងចំណាយពេលវេលាជាមួយមនុស្សជុំវិញខ្លួន៕ អត្ថបទដោយ៖ ទ្រ សុភាព
អ្នកអាចតាមដានផេកថ្មី គឺផេកកម្មវិធី លំហូរចិត្ត
អ្នកអាចទិញសៀវភៅ លំហូរចិត្ត តាមនេះ https://t.me/BusinessCambodiaBook