ការរស់នៅក្នុងជីវិតគ្រួសារអ្នកណាក៏ចង់បានសុភមង្គលដែរ ប៉ុន្តែមានរឿងជាច្រើនដែលបង្កបញ្ហាឱ្យមានជម្លោះគ្នាដូចជាខ្វះការទំនាក់ទំនង ខ្វះការយល់ចិត្ត និងការគិតអវិជ្ជមានលើដៃគូច្រើនផងដែរ។ ពេលខ្លះខឹងគ្នាដោយគ្មានហេតុផលក៏មានទៀត។ បើអ្នកមិនចង់បែកបាក់គ្រួសារទេ អ្នកគួរតែចៀសវាង ៤នេះ៖
១.ប្តីប្រពន្ធមើលឃើញតែចំណុចខ្សោយ រួចចាប់កំហុសដាក់គ្នា៖ នៅក្នុងជីវិតគ្រួសារ បើម្នាក់ៗ ចាប់តែកំហុសគ្នា ពេលមានអារម្មណ៍ខឹងឬអន់ចិត្តនឹងគ្នានោះ ត្រៀមខ្លួនបែកចានបែកឆ្នាំងផ្ទះរៀងៗ ខ្លួនទៅ។ បើអ្នកមិនចង់ជួបបញ្ហាបែបនេះទេ អ្នកត្រូវតែចេះការយោគយល់គ្នា ចេះមានចិត្តមេត្តាគ្នា និងអភ័យទោសឱ្យគ្នាទៅវិញទៅមក វាជារឿងសំខាន់បំផុត។ តាមព្រះពុទ្ធបានសម្តែងថា “ចំណងស្នេហ៍ស្មោះកើតចេញពីការយល់ ទើបអ្នកមានបេះដូងមេត្តាដល់អ្នកដទៃ”។ មានតែក្តីមេត្តា មានតែការមើលចំណុចល្អៗ របស់អ្នកទេ ទើបអ្នកគ្មានចិត្តប្រើអំពើហឹង្សាលើដៃគូនោះទេ។
២. គ្មានពេលនិយាយ គ្មានពេលស្តាប់គ្នា៖ បើអ្នកមានបញ្ហាក្នុងគ្រួសារ កុំចិត្តក្តៅតសម្តីគ្នាដោយមិនចេះចាញ់គ្នា បញ្ហានឹងរីកធំហើយអ្នកលែងមានសតិស្តាប់គ្នាថែមទៀត។ បើខឹងខ្លាំងគួរតែដើរចេញសិន ចាំត្រជាក់ចិត្ត ចាំមកនិយាយគ្នាដោយមានហេតុមានផល ហើយប្តីប្រពន្ធត្រូវតែតាំងស្តាប់ចិត្តគ្នា ដើម្បីយល់ពីគំនិងពីបេះដូងគ្នាទៅវិញទៅមក។ ការស្ដាប់គ្នាដោយមានហេតុផលដោយការយកចិត្តទុកដាក់ពីដៃគូ វាជាដំណោះស្រាយល្អបំផុតក្នុងការកើនក្តីស្រឡាញ់ដល់បេះដូងប្តីប្រពន្ធ។ ការនិយាយកាត់ ឬមិនព្រមស្តាប់គ្នាទេ ទើបវាជាបញ្ហាក៏ដុះឬសធំកាន់តែខ្លាំងទៅជាមិនខានទេ។
៣. កម្ទេចរបស់របរក្នុងផ្ទះដូចជាកម្ចេចគ្រួសារដែរ៖ ខ្ញុំបានឃើញបុរសឬស្រ្តីមួយចំនួនពេលឈ្លោះគ្នាតែងតែប្រើអំពើបោកកម្ទេចរបស់របរក្នុងផ្ទះនាំឱ្យដៃគូម្ខាងទៀតមានអារម្មណ៍ឈឺចិត្ត និងខាតលុយចោលទទេៗ មិនត្រឹមតែប៉ុណ្ណោះទេ វានាំឱ្យមានផលប៉ះពាល់ដល់សតិអារម្មណ៍របស់កូនមួយកម្រិតទៀត វាបានដិតជាប់ក្នុងខួរក្បាលក្មេងៗ រហូតដល់គេធំ។ ពេលអ្នកចៀសវាងទម្លាប់អាក្រក់មួយនេះ ជីវិតគ្រួសាររបស់អ្នកនឹងមានក្តីសុខមិនខានឡើយ។
៤. ដៃគូមិនចេះប្រាស្រ័យទាក់ទងគ្នាសោះឥឡូវនេះ៖ នៅសម័យឥឡូវនេះមានបញ្ហាធំមួយគឺប្តីប្រពន្ធពុំសូវមានទំនាក់ទំនងល្អជាមួយគ្នាសោះ ព្រោះតែលេងទូរស័ព្ទច្រើន ឬដើរផឹកស្រាចោលប្រពន្ធកូនក៏មានដែរ។ ចំពោះប្តីប្រពន្ធខ្វះទំនាក់ទំនងជាមួយគ្នានោះ ពេលក្នុងគ្រួសារមានបញ្ហាអ្វីមួយនោះ គេតែងតែចាប់ថ្នាក់ស្តីបន្ទោសអ្នកនោះយ៉ាងចាស់ដៃតែម្តង។ ទំនាក់ទំនងសសំខាន់ណាស់ គ្រាន់តែអ្នកឆ្លៀតហូបជុំគ្នា ចំណាយពេលពិភាក្សាគ្នាមុនចូលគេងចំនួន២០នាទីក៏ច្រើនដែរ។ ហើយពេលព្រឹកគ្រាន់តែអ្នកជាប្តីបានថើបប្រពន្ធមួយ ឬអរគុណប្រពន្ធជាដើម...ទាំងអស់នេះសុទ្ធតែការបង្កើតការទំនាក់ទំនងយ៉ាងល្អបំផុតក្នុងគ្រួសារឱ្យរស់នៅមានន័យមានសុភមង្គលបំផុត៕ អត្ថបទដោយ៖ ទ្រ សុភាព