ក្នុងការចិញ្ចឹមកូន ឪពុកម្តាយជាច្រើនអាចមានអារម្មណ៍កង្វល់ នៅពេលឃើញកូនមានអាកប្បកិរិយាខុសប្លែកពីក្មេងៗដូចដទៃ។ តែការពិត ទម្លាប់ប្លែកទាំងនេះមិនមែនជារឿងអាក្រក់ទេ។ ផ្ទុយទៅវិញ វាជាសញ្ញាបង្ហាញថា កូនរបស់អ្នកកំពុងអភិវឌ្ឍភាពវៃឆ្លាត និងការគិតបែបឯករាជ្យ។ ប្រសិនបើឪពុកម្តាយយល់ និងគាំទ្រកូន ទម្លាប់ទាំងនេះអាចក្លាយជាកត្តាជំរុញឱ្យកូនក្លាយជាមនុស្សជោគជ័យនៅថ្ងៃអនាគត។
១. ចូលចិត្តនិយាយជាមួយខ្លួនឯង៖ នេះជាសញ្ញានៃការគិតជ្រាលជ្រៅ និងសមត្ថភាពច្នៃប្រឌិត។ ការនិយាយជាមួយខ្លួនឯងមិនមែនកូនរបស់អ្នកចម្លែកទេ តាមការស្រាវជ្រាវផ្លូវចិត្តបញ្ជាក់ថា កុមារដែលធ្វើបែបនេះគឺពួកគេកំពុងរៀបចំគំនិត និងដំណើរការព័ត៌មានក្នុងខួរក្បាលរបស់ពួកគេ។ វាជាវិធីមួយសម្រាប់ការ "រៀនគិត" និង "រៀននិយាយ"។ កុមារទាំងនេះភាគច្រើនមានសមត្ថភាពខាងច្នៃប្រឌិតខ្លាំង និងមានភាពយល់ដឹងខ្ពស់អំពីខ្លួនឯង។ ឪពុកម្តាយគួរតែស្តាប់ពួកគេ ឬសួរឱ្យពួកគេនិទានអំពីអ្វីដែលពួកគេកំពុងគិត វាជួយបង្កើតទំនុកចិត្ត និងជំរុញឱ្យការគិតរបស់កូនរីកចម្រើន។
២. កូនចូលចិត្តសួរសំណួរចម្លែកៗ៖ នេះជាសញ្ញានៃការចេះគិតត្រិះរិះ ចង់ដឹងចង់ឃើញ។ ប្រសិនបើកូនរបស់អ្នកចូលចិត្តសួរប្លែកៗដូចចជា “ហេតុអ្វីបានជាមេឃពណ៌ខៀវ?” ឬ “ចុះបើខ្ញុំអាចហោះបានវិញ?” នេះគឺជាសញ្ញាថា កូនរបស់អ្នកកំពុងសកម្មខ្លាំងក្នុងការគិត និងស្វែងយល់ពីពិភពលោក។ ការចង់ដឹងចង់ឃើញជាកត្តាសំខាន់នៃការសិក្សា ឪពុកម្តាយគួរតែពន្យល់ ឬជួយកូនក្នុងការស្វែងរកចម្លើយតាមរយៈសៀវភៅ វីដេអូ ឬការពិសោធន៍តូចៗ។ វាធ្វើឱ្យកូនរៀនគិតដូចវិទ្យាសាស្ត្រ និងអភិវឌ្ឍជំនាញស្រាវជ្រាវដោយខ្លួនឯង។
៣. ចូលចិត្តនៅម្នាក់ឯង៖ មិនមែនកុមារទាំងអស់ត្រូវតែសប្បាយជាមួយក្រុមមិត្តភក្កិទេ។ កុមារដែលចូលចិត្តនៅម្នាក់ឯង មិនមានន័យថាពួកគេចង់ផ្ដាច់ខ្លួនពីសង្គមទេ ប៉ុន្តែពួកគេត្រូវការពេលសម្រាប់គិត សង្កេត និងស្រមើលស្រមៃ។ កុមារបែបនេះភាគច្រើនមានការផ្តោតអារម្មណ៍ខ្ពស់ និងមានភាពច្នៃប្រឌិតខ្លាំង ឪពុកម្តាយគួរគោរពពេលផ្ទាល់ខ្លួនរបស់ពួកគេ និងផ្តល់កន្លែងឱ្យពួកគេសម្របសម្រួលអារម្មណ៍ដោយសន្តិភាព។
៤. ក្មេងរឹងរូស ឬប្រកែកជាញឹកញាប់៖ នេះជាសញ្ញានៃការគិតឯករាជ្យ និងភាពដឹកនាំ កុមារមួយចំនួនមិនសូវយល់ព្រមលើការបញ្ជារដោយគ្មានហេតុផលទេ។ វាមិនមែនបានន័យថាពួកគេឈ្លើយ ឬមិនចេះគោរពទេ ប៉ុន្តែពួកគេចង់ដឹងថា “ហេតុអ្វី”។ នេះជាភាពចាប់ផ្តើមនៃការគិតត្រិះរិះ និងជំនាញដឹកនាំ។ ឪពុកម្តាយគួរតែប្តូរពីការបង្ខំកូនឱ្យស្តាប់ មកជាសន្ទនាដែលផ្អែកលើការយល់ដឹង មានហេតុផល ពន្យល់អំពីហេតុផលនៃច្បាប់ ឬអនុញ្ញាតឱ្យពួកគេជួបប្រទះផលវិបាកតូចៗ ដើម្បីរៀនទទួលខុសត្រូវ។ វាជាវិធីសមរម្យក្នុងការបណ្តុះភាពឆ្លាត និងសីលធម៌របស់កូន។
ឪពុកម្តាយឆ្លាតមិនមែនជាអ្នកធ្វើឱ្យកូនស្ដាប់ខ្លួនទេ ប៉ុន្តែត្រូវធ្វើជាអ្នកស្តាប់ និងលើកទឹកចិត្តឱ្យពួកគេរៀនស្គាល់ពីខ្លួនឯង។ ហើយទម្លាប់ចម្លែកទាំងនេះមិនមែនជារឿងគួរឱ្យព្រួយឡើយ ប៉ុន្តែជាសញ្ញានៃភាពឆ្លាតវៃ ដែលអាចក្លាយជាគន្លឹះនៃភាពជោគជ័យរបស់កូននៅថ្ងៃអនាគត៕
អត្ថបទដោយ៖ សារួ