តើអ្នកអាចធ្វើបានទេ? កែទម្លាប់ ផ្អាកញុំាភេសជ្ជៈផ្អែម ផ្អាកញុំាគ្រឿងមានជាតិពណ៌ ផ្អាកញុំារបស់ផ្អាប់ ផ្អាកញុំាប្រហិត និងផ្អាកញុំារបស់មានជាតិខ្លាញ់ច្រើន ហើយងាកមកញុំាអាហារធម្មជាតិទាំង ៨មុខ ដើម្បីថែសុខភាពឱ្យបានល្អ ជាពិសេសជួយឱ្យប្រព័ន្ធខួរក្បាលដំណើរការបានរលូន ហើយរៀនឆាប់ចេះទៀត។

បើយោងតាមការចុះផ្សាយរបស់ Tutordoctor បានឱ្យដឹងថា អាហារទាំង៨មុខ ដែលជួយកុំឱ្យក្មេងៗឆាប់ភ្លេច ដែលមិនគួរមើលរំលងរួមមាន៖

១. បន្លែបៃតង៖ អាហារទី១ដែលអ្នកត្រូវជ្រើសរើសយកមកញុំានោះគឺ បន្លែបៃតង។ ពីព្រោះថា បន្លែបៃតងសម្បូរទៅដោយវីតាមីន B6 B12 ជាតិដែក ​និងអាស៊ីតហ្វូលីក(Folate)។ ដែលវីតាមីនB6 B12 ជាតិដែក និងអាស៊ីតហ្វូលីក មានមុខងារជួយបង្កើនការចងចាំរបស់ក្មេងបានល្អប្រសើរ មិនងាយភ្លេចភ្លាំងនោះទេ។ បន្លែបែតងដូចជា ស្ពៃខាត់ណា ត្រកូន សាឡាត់ ស្ពៃតឿ ស្ពែខៀវជាដើម។

២. គ្រាប់ល្ពៅ៖ អាហារទី២ដែលអ្នកមិនគួរមើលរំលងនោះគឺ គ្រាប់ល្ពៅ។ ពីព្រោះថា គ្រាប់ល្ពៅ គឺសម្បូរទៅដោយជាតិស័ង្កសីសម្បូរបែប។ ដូច្នេះអ្នកគួរតែឧស្សាហ៍ញុំាគ្រាប់ល្ពៅជាប្រចាំថ្ងៃ ដើម្បីទទួលបានជាតិស័ង្កសី ដែលវាមានមុខងារជួយអភិវឌ្ឍជំនាញការយល់ដឹង ការគិត និងការចងចាំរបស់អ្នក ឬក្មេងៗ។

៣. ត្រីសាម៉ុនធម្មជាតិ៖ អាហារទី៣ដែលអ្នកគួរជ្រើសរើសយកមកញុំានោះគឺ ត្រីសាម៉ុនធម្មជាតិ(មិនមែនត្រីចិញ្ចឹម)។ ពីព្រោះថា ត្រីសាម៉ុនធម្មជាតិសម្បូរទៅដោយ អាស៊ីតខ្លាញ់អូមេហ្កា៣ ហើយក៏សម្បូរប្រូតេអ៊ីនច្រើនផងដែរ។ អាស៊ីតខ្លាញ់អូមេហ្កា៣ មានតួនាទីជួយពង្រឹងប្រព័ន្ធសុខភាពខួរក្បាលបានល្អប្រសើរ។

៤. ស្រូវធម្មជាតិ៖ អាហារទី៤ដែលអ្នកមិនគួរភ្លេចនោះគឺ ស្រូវសាលី និងអង្ករសំរូប។ ពីព្រោះថា ស្រូវទាំង២នេះសុទ្ធតែផ្ទុកទៅដោយវីតាមីនB6 និងFolateច្រើន ដែលជួយបង្កើនប្រព័ន្ធលំហូរឈាមដំណើរការទៅកាន់ខួរក្បាលបានល្អប្រសើរ ហើយវាក៏មានតួនាទីជួយដល់ការចងចាំរបស់ក្មេងៗផងដែរ។

៥. គ្រាប់ធញ្ញជាតិ៖ អាហារទី៥ដែលអ្នកអាចញុំាលេងបាន និងជួយឱ្យសុខភាពល្អទៀតនោះគឺ គ្រាប់ធញ្ញជាតិ។ គ្រាប់ធញ្ញាជាតិច្រើនសម្បូរអាស៊ីតខ្លាញ់អូមេហ្កា៣ និងអូមេហ្កា៦ ដែលជួយឱ្យអារម្មណ៍របស់អ្នកល្អប្រសើរ។ មិនតែប៉ុណ្ណោះទេ នៅក្នុងគ្រាប់ធញ្ញជាតិក៏សម្បូរទៅដោយ ជាតិដែក Thiamine និងម៉ាញ៉េស្យូម ដែលជួយបង្កើនការចងចាំរបស់អ្នក ឬក្មេងៗ។

៦. ផ្លែAcai berries និងផ្លែBlueberries៖ អាហារទី៦ដែលអ្នកគួរជ្រើសរើសយកមកញុំាគឺ ផ្លែAcai berries និងផ្លែBlueberries។ ប៉ុន្តែនៅក្នុងប្រទេសកម្ពុជាយើងពិបាករកទិញបន្តិច ហើយបើមានក៏ក្នុងតម្លៃថ្លៃដែរ។ តែផ្លែឈើទាំង២នេះសម្បូរទៅដោយសារធាតុប្រឆាំងអុកស៊ីតកម្ម វីតាមីន និងប្រូតេអ៊ីនជាច្រើន ដែលជួយបង្កើនសមត្ថភាពខួរក្បាលឱ្យដំណើរការបានប្រសើរ។

៧. ផ្កាខាត់ណាខៀវ៖ អាហារទី៧ដែលអ្នកគួរទម្លាប់ញុំាជាប្រចាំគឺ ផ្កាខាត់ណាខៀវ។ ពីព្រោះថា ផ្កាខាត់ណាខៀវគឺជាប្រភពដែលសម្បូរទៅដោយវីតាមីនK ដែលធ្វើឱ្យការគិតរបស់អ្នកបានលឿនរហ័ស និងបង្កើនថាមពលខួរក្បាលរបស់អ្នក ឬក្មេងៗ។

៨. ផ្លែប៉េងប៉ោះ៖ អាហារចុងក្រោយដែលអ្នកគួរតែញុំាជាញឹកញាប់គឺ ផ្លែប៉េងប៉ោះ។ ពីព្រោះថា ផ្លែប៉េងប៉ោះមានផ្ទុកសារធាតុ Lycopene ដែលជាសារធាតុប្រឆាំងអុកស៊ីតកម្មដ៏មានឥទ្ធិពលក្នុងការប្រឆាំងនឹងការខូចខាតរ៉ាឌីកាល់សេរីរបស់កោសិកា។ មិនតែប៉ុណ្ណោះទេ វាបានចូលរួមចំណែកក្នុងការការពារការវិវត្តនៃជំងឺវង្វេង និងជំងឺភ្លេចភ្លាំង។ ទឹកប៉េងប៉ោះក៏ជាប្រភពដែលសម្បូរជាតិដែកផងដែរ។

អត្ថបទដោយ៖ DADDY-RATH