១. ចាយពេលនៅជាមួយកូន៖ មានពាក្យមួយនិយាយថា បើអ្នកមិនអប់រំកូនពីតូចទេ កូនធំឡើងអ្នកពិបាក និងឈឺក្បាលគឺឪពុកម្តាយ។ យើងធ្លាប់ឃើញកូនគេល្អ ចេះស្តាប់ឪពុកម្តាយ ការពិតមកពីម្តាយឳពុកគេព្យាយាមអប់រំតាំងពីនៅក្មេងៗ មកម្ល៉េះ។ ចូរអ្នកមានទម្លាប់កំណត់ពេលវេលាឱ្យបានច្បាស់លាស់នៅជាមួយកូន ដើម្បីនិយាយគ្នា អប់រំកូន និងក្តីស្រឡាញ់ឱ្យកូន។ ការចាយពេលនៅមួយកូនបែបនេះ កូនរបស់អ្នកនឹងក្លាយជាកូនល្អមានអនាគតមិនខានទេ។

២. លើកទឹកចិត្តកូនឱ្យមានភាពច្នៃប្រឌិត៖ ភាពច្នៃប្រឌិតគឺមានសារៈសំខាន់ដូចនឹងភាពវៃឆ្លាត ព្រោះចំណុចនេះក៏អាចជួយជីវិតកូនរបស់យើងឆ្ពោះទៅរកអនាគតមួយដ៏សមស្របផងដែរ។ មាតាបិតាត្រូវលើកទឹកចិត្តកូនរបស់យើងឱ្យមានភាពច្នៃប្រឌិតដោយផ្តល់ឱកាសឱ្យពួកគេបង្ហាញពីដុងដែលពួកគេមានពីកំណើតដូចជា សិល្បៈ កីឡា ។ នេះយោងតាមគេហទំព័រ higheredtechdecisions ។

៣. បង្រៀនកូនឱ្យស្គាល់ពីគុណតម្លៃពេលបច្ចុប្បន្នភាព៖ ការបង្រៀនកូនឱ្យចេះរស់នៅក្នុងភាពជាក់ស្តែង ធ្វើឱ្យកូនក្លាយជាមនុស្សរឹងមាំផ្នែកស្មារតី។ សម្រាប់ម្ដាយឪពុកជនជាតិជប៉ុន តែងបង្រៀនកូនៗ ឱ្យស្គាល់អំពីគុណតម្លៃក្នុងពេលបច្ចុប្បន្ន ហើយឱ្យចេះផ្តោតអារម្មណ៍លើបច្ចុប្បន្នភាពផងដែរ។ ព្រោះតែពួកគេចង់ឱ្យកូនដឹងពីសារៈសំខាន់ពេលវេលា និងភាពជាក់ស្តែងក្នុងពេលបច្ចុប្បន្ននេះ ដើម្បីមានស្មារតីប្រុងប្រយ័ត្ន ហើយចេះធ្វើការឆ្លើយតបទៅនឹងកិច្ចការចំពោះមុខបានយ៉ាងល្អ។ ការបង្រៀនកូនឱ្យរស់នៅដោយផ្ដោត​លើ​បច្ចុប្បន្នភាពក៏ជាចំណែកមួយនៃការពង្រឹងទំនាក់ទំនងរវាងឪពុកម្ដាយ និងកូនៗ ផងដែរ។

៤. ទុកពេលឱ្យកូនៗ បណ្តុះក្តីស្រឡាញ់៖ មូលហេតុធំបំផុតមួយដែលប្រជាជនហូឡង់សប្បាយចិត្តខ្លាំងនោះ គឺពួកគេឱ្យតម្លៃលើតុល្យភាពការងារ និងជីវិតប្រចាំថ្ងៃសម្រាប់គ្រួសារ។ ចំពោះឪពុកម្តាយជនជាតិហូឡង់បានឈប់សម្រាកយ៉ាងហោចណាស់មួយថ្ងៃក្នុងមួយសប្តាហ៍ដើម្បីចំណាយពេលវេលាជាមួយកូនរបស់ពួកគេ ដើម្បីពង្រីកទំហំក្តីស្រឡាញ់ឱ្យធំឡើងក្នុងចិត្តកូន។ ពេលអ្នកផ្តល់ក្តីស្រឡាញ់អមជាមួយអប់រំជាចំណេះដឹង កូនអ្នកនឹងស្តាប់និងគោរពឱ្យតម្លៃអ្នកណាស់។ ពេលកូនលោកអ្នកមានបញ្ហាអ្វីមួយ កូនរបស់អ្នកនឹងហ៊ាននិយាយបើកចិត្តជាមួយអ្នកដោយចំហរ ព្រោះអ្នកបានផ្តល់ក្តីទំនុកចិត្តដល់កូនរួចហើយ៕ អត្ថបទដោយ៖ ទ្រ សុភាព