១. បង្រៀនកូនឱ្យស្មើភាពគ្នា៖ មនុស្សភាគច្រើនបានឃើញវីឌីអូមួយ ដែលក្មេងៗ ជាសិស្សសាលាកំពុងសម្អាតថ្នាក់រៀន បានធ្វើឱ្យមានការភ្ញាក់ផ្អើលជុំវិញបណ្តាលអ៊ីនធឺណិត។ ព្រោះវាជា​វប្បធម៌​ជប៉ុនមួយ បានបញ្ជាក់ឱ្យឃើញថា រាល់កុមារត្រូវបង្រៀនឱ្យស្មើភាពគ្នា ទោះបីជាព្រះរាជកុមារ ឬព្រះអង្គម្ចាស់ចូលសាលាក៏ដោយ ត្រូវមានស្មើភាពគ្នានឹងកុមារដទៃទៀតដែរ។ នៅក្នុងទស្សនវិជ្ជារបស់ជប៉ុន បានបង្រៀនកុមារថា កុំធ្វើជាមនុស្សអាត្មានិយម ឬគិតប្រយោជន៍ផ្ទាល់ខ្លួនឱ្យសោះ ឱ្យចេះជួយអ្នកដទៃ និងគោរពអ្នកដទៃផងដែរ។

២. សម្ពន្ធភាពម្តាយ និងកូន៖ គ្រួសារជានិកាយដ៏សំខាន់នៅក្នុងវប្បធម៌ជប៉ុន ដើម្បីអប់រំកូនឱ្យដឹងខុសត្រូវ និងមានហេតុផលពេលចូលសង្គម។ ឪពុមម្តាយជប៉ុន ត្រូវចំណាយពេលវេលា និងការផ្តោតអារម្មណ៍ជាច្រើនទៅលើការចិញ្ចឹមកូនៗ ឱ្យមានអារម្មណ៍កក់ក្តៅ និងក្តីស្រឡាញ់។ ហើយត្រូវព្យាយាមបង្រៀនកូនយ៉ាងអត់ធ្មត់ទាំងការដើរ ការញ៉ាំអាហារ និងបញ្ចូលចំណេះដឹងទៀតផង។

៣. ចេះយល់អារម្មណ៍កូនៗ ៖ ឪពុកម្តាយរបស់ជនជាតិជប៉ុន តែងតែយកចិត្តទុកដាក់ពីស្ថានភាពផ្លូវចិត្ត និងអារម្មណ៍របស់កូន ដូចគ្នានឹងលក្ខណៈរាងកាយដែរ។ ពេលកូនធ្វើខុសរឿងអ្វីមួយ ឪពុកម្តាយជប៉ុនមិនបានជេរ ឬស្តីថាឱ្យខ្លាំងៗ ទេ បែបជាលើកទឹកចិត្ត និងជួយកែលម្អការយល់ដឹងរបស់កូនថែមទៀត។ ហើយបង្រៀនកូនថា ការបរាជ័យជារឿងធម្មតាទេ។ មានន័យថា ពេលកូនសម្រេចចិត្តធ្វើរឿងអ្វីមួយ កុំឆាប់ចុះចាញ់លឿនពេក ត្រូវចេះតស៊ូ ចេះច្នៃប្រឌិត និងគិតរកវិធីធ្វើរឿងហ្នឹងឱ្យបាន៕ អត្ថបទដោយ៖ ទ្រ សុភាព