នៅសព្វថ្ងៃនេះ មានមនុស្សជាច្រើន កំពុងតែជួបវិបត្តិផ្លូវចិត្ត ជារឿងពិបាកដោះស្រាយបំផុត។ ព្រោះមានអ្នកខ្លះខំលាក់បញ្ហាទុកក្នុងដើមទ្រុងមានជំងឺដូចជា ស្រ្តេស ការថប់បារម្ភ និងបាក់ទឹកចិត្តជាដើម។ តាមអ្នកស្រាវជ្រាវនៅ JAMA Network Open បានវិភាគទិន្នន័យសុខភាពមនុស្សពេញវ័យ ៤០.៣៦០នាក់ មកពីរដ្ឋ Minnesota ក្នុងគម្រោងវេជ្ជសាស្រ្ត Rochester Epidemiology បានបែងចែកមនុស្សពេញវ័យជាបីក្រុម តាមភេទ ចាប់ពីអាយុ ២០ ឆ្នាំ អាយុ៤០ និងអាយុ៦០ឆ្នាំ។ អ្នកមានជំងឺថប់បារម្ភ និងជំងឺធ្លាក់ទឹកចិត្តក្នុងរយៈពេលយូរ(៥ទៅ៧ឆ្នាំ) នាំឱ្យវិវត្តកើតជំងឺលើសឈាម ជំងឺហឺត ជំងឺស្ទះសួតរ៉ាំរ៉ៃ និងជំងឺមហារីកមួយភាគច្រើនធំផងដែរ។
តាមអ្នកជំនាញចិត្តសាស្រ្តលោក Jasmin Wertz បាននិយាយថា "យើងមានទំនោរថា មនុស្សពេញវ័យមានសុខភាពល្អ ប៉ុន្តែជំងឺផ្លូវចិត្ត វានាំឱ្យកើតជំងឺក្រពះ។ នៅក្នុងចំណោមស្ត្រីទាំងអស់នៅក្នុងការសិក្សា នារីមានអាយុ ២០ឆ្នាំ ទំនងវិវត្តទៅជាជំងឺរ៉ាំរ៉ៃចំនួន ៦១%ឯណោះ។ ចំណែកស្រ្តីមានអាយុ ៦០ឆ្នាំ មានការវិវត្តជំងឺតិចជាង។”
យើងក៏មានវិធីកាត់បន្ថយហានិភ័យជំងឺផ្លូវចិត្តទាំងអស់នេះបានខ្លះដែរ។ តាមលោកវេជ្ជបណ្ឌិត Kyle Bourassa ផ្នែកចិត្តសាស្រ្តនៅមន្ទីរពេទ្យ Durham VA បាននិយាយថា មានវិធីព្យាបាលបែបអាកប្បកិរិយា និងឱសថសាស្ត្រសម្រាប់ការស្រ្តេស ការថប់បារម្ភ និងជំងឺធ្លាក់ទឹកចិត្ត តាមរយៈការហាត់ប្រាណ ការធ្វើសមាធិ និងការគេងឱ្យបានគ្រប់គ្រាន់ក្នុងទម្លាប់ប្រចាំថ្ងៃរបស់អ្នក។ គាត់បន្ថែមថា យើងគួរជៀសវាងការជក់បារី និងការផឹកស្រាច្រើន ដើម្បីកាត់បន្ថយហានិភ័យជំងឺធ្ងន់ធ្ងរ។
នៅសាលាសុខភាពសាធារណៈ Harvard TH Chan បានរកឃើញថា ការរត់រយៈពេល ១៥ នាទីក្នុងមួយថ្ងៃ ឬដើររយៈពេលមួយម៉ោង ជួយកាត់បន្ថយហានិភ័យនៃជំងឺធ្លាក់ទឹកចិត្តបាន ២៦% ឯណោះ។ ព្រោះវាបញ្ចេញសារធាតុ Endorphins ជាសារធាតុគីមីដ៏មានឥទ្ធិពលនៅក្នុងខួរក្បាល ដើម្បីផ្តល់ថាមពលដល់វិញ្ញាណ និងធ្វើឱ្យមានអារម្មណ៍ល្អផងដែរ៕ អត្ថបទដោយ៖ ទ្រ សុភាព