បើអ្នកមានបញ្ហាស្រ្តេសច្រើនពេលល្ងាចនោះ វានាំបញ្ហាឱ្យអ្នកបាត់ការចងចាំខួរក្បាលម្តងបន្តិចៗ ផងដែរ។ ការធ្វើលំហាត់ប្រាណជួយជម្រុញអរម៉ូន endorphins ទៅកាន់ខួរក្បាល និងផ្លូវចិត្តឱ្យរីករាយ។ ដើម្បីឱ្យអ្នកអាចផ្តោតអារម្មណ៍ក្នុងការងារ ដែលអ្នកកំពុងតែធ្វើនេះបានល្អមានលទ្ធផល។ ហើយការធ្វើលំហាត់ប្រាណក៏ជួយជំរុញការលូតលាស់កោសិកាខួរក្បាលថ្មីៗ និងជួយការពារការជំងឺធ្លាក់ចុះទឹកចិត្តផងដែរ។

តាមការសិក្សាមួយទៀត នៅសាលាសុខភាពសាធារណៈ Harvard TH Chan បានរកឃើញថា ការរត់រយៈពេល ១៥ នាទីក្នុងមួយថ្ងៃ ឬដើររយៈពេលមួយម៉ោង ជួយកាត់បន្ថយហានិភ័យនៃជំងឺធ្លាក់ទឹកចិត្តបាន ២៦% ឯណោះ។ ព្រោះវាបញ្ចេញសារធាតុ Endorphins ដែលជាសារធាតុគីមីដ៏មានឥទ្ធិពលនៅក្នុងខួរក្បាល ដើម្បីផ្តល់ថាមពលដល់វិញ្ញាណ និងធ្វើឱ្យមានអារម្មណ៍ល្អផងដែរ។

មានបញ្ហាមួយទៀតគឺការគេងមិនលក់។ ការគេងមិនលក់នេះ មានកត្តាមួយគឺកត្តាសាច់ដុំ។ មកពីអ្នកប្រើប្រាស់សាច់ដុំមិនខ្លាំង មិនបែកញើស និងមិនបញ្ចេញជាតិពុល។ បើអ្នកមានបញ្ហាការគេងមែននោះ អ្នកអាចធ្វើលំហាត់ប្រាណពេលល្ងាចប្រហែល ៣០ទៅ១ម៉ោង ដើម្បីឱ្យរាងកាយអ្នកអស់កម្លាំង ហើយពេលយប់រាងកាយអ្នកត្រូវការកម្លាំងឡើងវិញ គឺរាងកាយត្រូវការគេង។ ការធ្វើលំហាត់ប្រាណជួយគ្រប់គ្រងទម្លប់ការគេងបានល្អ។ ការលំហាត់ប្រាណពេលល្ងាចមានដូចជាការដើរ រត់តិចៗ និងការហាត់យូហ្គា ជួយបន្ធូរអារម្មណ៍របស់អ្នក ដែលធ្វើការងារពេញមួយថ្ងៃ។

ដូច្នេះ! គ្រាន់តែអ្នកចំណាយពេលយ៉ាងតិច ២០នាទីក្នុងមួយថ្ងៃ អ្នកនឹងឃើញពីលទ្ធផលនៃការលំហាត់ប្រាណ។ មានសុខភាពល្អ រស់នៅឆ្ងាយពីជំងឺ។ ហើយគ្មានបញ្ហាផ្លូវចិត្តថែមទៀត។ នេះជាគុណសម្បត្តិធ្វើលំហាត់ប្រាណ៕ អត្ថបទដោយ៖ ទ្រ សុភាព