ប្រធាន AASM វេជ្ជបណ្ឌិត Eric Olson អ្នកឯកទេសខាងជំងឺសួត និងថ្នាំងងុយគេងនៅគ្លីនិក Mayo ក្នុងទីក្រុង Rochester រដ្ឋ Minnesota បាននិយាយថា ការងងុយគេងគឺជាកង្វល់សុខភាពធ្ងន់ធ្ងរ ដែលនាំមកនូវផលប៉ះពាល់ទូលំទូលាយរាប់ចាប់ពីគ្រោះថ្នាក់ចរាចរណ៍ កំហុសនៅកន្លែងធ្វើការ រហូតអាចមានជំងឺសុខភាពរ៉ាំរ៉ៃ។ អ្នកឯកទេសផ្នែកដំណេក Kristen Knutson សាស្ត្រាចារ្យរងផ្នែកសរសៃប្រសាទ និងថ្នាំបង្ការនៅសាកលវិទ្យាល័យ Northwestern University's Feinberg School of Medicine នៅទីក្រុង Chicago បាននិយាយថា បើអង្គុយងក់នៅកន្លែងការងារអាចបណ្ដាលមកពីការគេងមិនគ្រប់គ្រាន់ ប៉ុន្តែបើងងុយខ្លាំងពេកនៅពេលថ្ងៃ វាអាចធ្វើឱ្យខូចមុខងារ និងជាសូចនាករនៃបញ្ហានៃការគេងមិនលក់ ឬមានបញ្ហាផ្សេងៗទៀត។

គ្រោះថ្នាក់ពេលខ្វះដំណេក៖ ខួរក្បាលអាចចូលទៅក្នុង microsleeps ធ្វើឱ្យអ្នកដេកលក់ដោយមិនដឹងខ្លួនអាចចន្លោះពី ២ ទៅ ១០ វិនាទី ហើយបើស្ថានភាពនេះកើតឡើងអំឡុងពេលអ្នកកំពុងបើកបរនៅលើដងផ្លូវទៀតនោះវាគឺកាន់តែគ្រោះថ្នាក់។ តាមស្ថិតិបង្ហាញថា គ្រោះថ្នាក់ចរាចរណ៍ប្រហែល 100,000 ករណីក្នុងមួយឆ្នាំ គឺភាគច្រើនវាពាក់ព័ន្ធទៅនឹងការងងុយគេងនៅពេលកំពុងបើកបរ។ វេជ្ជបណ្ឌិត Indira Gurubhagavatula មកពី Penn Medicine បន្ថែមថា មនុស្សដែលងងុយគេងរ៉ាំរ៉ៃ តែងមានទំនុកចិត្តខុសគិតថា ពួកគេមិនអីទេ ទោះបីជាការធ្វើតេស្តបង្ហាញថាមុខងារខួរក្បាល និងការចងចាំបានថយចុះយ៉ាងខ្លាំងក៏ដោយ។

មូលហេតុបន្ថែមនៃការងងុយគេងឥតឈប់៖ អាចមកពីអ្នកមានជំងឺដំណេក ជំងឺឈឺចាប់រ៉ាំរ៉ៃ និងការប្រើប្រាស់ថ្នាំខ្លះៗ។ បន្ថែមពីលើនេះរបៀបរស់នៅប្រចាំថ្ងៃក៏អាចធ្វើឱ្យប៉ះពាល់ដល់ដំណេករបស់យើងដែរដូចជា ការញុំាកហ្វេអ៊ីនច្រើនពេក ញុំាភេសជ្ជៈដែលមានអាកុលខ្លាំង ការប្រើប្រាស់កញ្ឆា កន្លែងគេងគ្មានអនាម័យ ជាដើម។ ដូច្នេះប្រសិនបើអ្នកចង់ឱ្យខ្លួនឯងមានសុខភាពល្អ គុណភាពដំណេកកាន់តែប្រសើរឡើង សាកល្បងបញ្ឃប់ការផឹកជាតិអាកុលដូចជា ស្រា ឬកាត់បន្ថយជាតិកាហ្វេអ៊ីននៅពេលល្ងាច ។ 

យ៉ាងណាក៏ដោយ អ្នកឯកទេសផ្នែកដំណេកបានលើកឡើងថា ប្រសិនបើអ្នកជួបប្រទះនូវបញ្ហាងងុយគេងនៅពេលថ្ងៃខ្លាំងជាប្រចាំនោះ អ្នកគួរតែទៅពិភក្សាអំពីបញ្ហានេះជាមួយគ្រូពេទ្យដើម្បីរកដំណោះស្រាយ។ ប្រសិនបើអ្នកមានអាការៈងងុយគេងខ្លាំងជាប្រចាំ វាមិនមែនជារឿងតូចទេ។ វាអាចជាសញ្ញានៃការខ្វះដំណេក ឬជំងឺផ្សេងៗដែលត្រូវការទៅពិនិត្យ និងព្យាបាល។ សុខភាព និងសុវត្ថិភាពរបស់អ្នកគឺអាទិភាពមួយ៕

អត្ថបទដោយ៖ សារួ