កីឡាជាថ្នាំព្យាបាលជំងឺស្រ្តេសបានល្អបំផុត។ ទោះបីជាយ៉ាងក៏ដោយ ក៏មានមនុស្សមួយចំនួនដែរ បែបជាមិនសូវជាខ្វាយខ្វល់រឿងហាត់ប្រាណប៉ុន្មានទេ។ មនុស្សយើងសុខចិត្តចំណាយពេលលើកកែវស្រា តែមិនចំណាយពេលលើកដុំដែកដើម្បីសុខភាពសោះ។ មនុស្សសុខចិត្តរអ៊ូរឿងស្រ្តេស តែមិនទៅហាត់ប្រាណដើម្បីដេញស្រ្តេសចេញពីខួរក្បាល។ គ្រាន់តែអ្នកចំណាយ ៣០នាទីក្នុងពេល ២៤ម៉ោង អ្នកនឹងមានពេលដើម្បីហាត់ប្រាណ។ អ្នកធ្វើលំហាត់ប្រាណ១នេះដេញស្រ្តេសបានល្អណាស់។
ពេលអ្នកចាប់ផ្តើមរត់ហាត់ប្រាណជាពេលចាប់ផ្តើមជម្រះជំងឺតាមផ្លូវឱ្យអ្នករស់នៅអាយុវែងដោយមានសុខភាពល្អ។ ការរត់មានឥទ្ធិពលធ្វើឱ្យខួរក្បាលរបស់អ្នកជម្រះស្រ្តេសគឺខួរក្បាលស្រឡះគិតបានល្អ មានអារម្មណ៍រីករាយ និងកើនសាច់ដុំ។ តាមគេហទំព័រ Lifehack បានចុះផ្សាយថា “ការធ្វើលំហាត់ប្រាណរត់ពេលព្រឹកនិងល្ងាច ធ្វើឱ្យអ្នករស់នៅគ្មានស្រ្តេសនិងជំងឺបាក់ទឹកចិត្តទេ។ ព្រោះតែការហាត់ប្រាណជាថ្នាំលើកទឹកចិត្តពូកែណាស់”។ គ្រាន់តែអ្នកចំណាយពេលរត់ ២០ទៅ៣០នាទីក្នុង១ថ្ងៃ អ្នកមិនចាំបាច់ដេកភ័យខ្លាចជំងឺចូលខ្លួនទេ។ នេះជាផលនៃការរត់ហាត់ប្រាណ។
សូម្បីតែមហាសេដ្ឋីលោក Richard Branson តែងធ្វើលំហាត់ប្រាណជាប្រចាំថ្ងៃ មិនមែនត្រឹមតែសុខភាពតែម៉្យាងទេ ដើម្បីមានអារម្មណ៍ស្វាហាប់ក្នុងការងារគឺមកពីគាត់គ្មានស្រ្តេសនេះឯង។ បើយើងគ្មានអារម្មណ៍មុតមាំលើការងារ ការសម្រេចក៏មានលទ្ធផលតិចតួចដែរ។ លោកចូលចិត្តធ្វើលំហាត់ប្រាណមានដូចជា ការឡើងភ្នំ ជិះកង់ និងរត់...។ លោកបានរត់ ១០គីឡូម៉ែត ដើម្បីបង្កើតអារម្មណ៍រីករាយហើយឱ្យរាងកាយលោកកាន់តែស្វាហាប់ក្នុងការតស៊ូបន្ថែមលើការងាររបស់គាត់។
សម្រាប់ការរត់នេះជាកីឡាដ៏ងាយបំផុតដែលអ្នកអាចធ្វើបាននៅគ្រប់ទីកន្លែងនៅផ្ទះ នៅតាមសួន នៅតាមតំបន់ធម្មជាតិ ឬរត់ហាត់ប្រាណលើម៉ាស៊ីនក៏បានដែរ។ បើអ្នកគ្មានចំណង់ដើម្បីហាត់ប្រាណទេ ខ្ញុំសូមអ្នកចូលរួមទៅក្លឹបហាត់ប្រាណ មកពីនៅទីនោះសម្បូរអ្នកហាត់ប្រាណដើម្បីជម្រុញចិត្តអ្នកចង់ហាត់ប្រាណនឹងគេដែរ(កុំខ្មាស់អៀនច្រើន)។ ទោះបីវាចំណាយលុយបន្តិចមែន ប៉ុន្តែសុខភាពនៅតែសំខាន់ជាងលុយដែរ។ គ្រាន់តែអ្នកចំណាយហាត់ប្រាណមួយអាទិត្យតែ៤ដងឬ៣ ក៏ល្អដល់សុខភាព។ អ្នកអាចហាត់ប្រាណនៅផ្ទះដោយខ្លួនឯងពេលព្រឹក១៥នាទីក៏មានគុណប្រយោជន៍ធំធេងដល់សុខភាពនិងផ្លូវចិត្តដែរ។
ដូចនេះហើយអ្នកគួរយល់ដឹងពីអត្ថប្រយោជន៍ក្នុងការរត់ហាត់ប្រាណដើម្បីសុខភាពកុំឱ្យដេកជាមួយបញ្ហាស្រ្តេសពេក។ ការរត់អាចជួយទប់ស្កាត់បញ្ហាស្ត្រេសនិងការធ្លាក់ទឹកចិត្តដ៏មានប្រសិទ្ធភាពបំផុត ព្រោះតែវាបានបញ្ចេញអ័រមូនអង់ដ័រហ្វីន endorphines (អរម៉ូនរីករាយ) នៅពេលអ្នកប្រឹងបញ្ចេញកម្លាំងឱ្យខ្លួនបែកញើស។ មនុស្សយើងចូលចិត្តរត់តាមក្រោយពេលវេលាធ្វើឱ្យបាត់បង់សុខភាព(រកជំងឺ)និងជីវិត តែមិនខំរត់ហាត់ប្រាណដើម្បីសុខភាព និងជម្រះស្រ្តេសសោះ។ ចូលរួមធ្វើលំហាត់ប្រាណរត់ទាំងអស់គ្នា ដើម្បីកម្ចាត់ស្រ្តេសឱ្យមានសុខភាពល្អនិងអាយុវែង៕ អត្ថបទដោយ៖ ទ្រ សុភាព
អ្នកអាចទិញសៀវភៅ លំហូរចិត្ត តាមនេះ https://t.me/hangchhengH24