លទ្ធផលនៃការធ្វើតេស្តមេរោគលើដៃ ជើង និងមាត់ លើសំណាកចំនួន០៦បានបង្ហាញថា សរីរាង្គទាំងនេះឆ្លងមេរោគម្យ៉ាងមានឈ្មោះថា EV71 Genotype B5 ដែលជាមេរោគស្ថិតក្នុងក្រុមនៃមេរោគខ្លាំង ដែលបង្កឱ្យមានជំងឺធ្ងន់ធ្ងរ និងងាយក្នុងការឆ្លងយ៉ាងឆាប់រហ័ស។ នេះបើយោងតាមប្រភព VNexpress។
បើយោងតាមប្រភពដដែលបានឱ្យដឹងថា នាពេលល្ងាចថ្ងៃទី០៥ ខែមិថុនា នេះតំណាងមន្ទីរពេទ្យសុខាភិបាលទីក្រុងហូជីមិញ បានប្រកាសលទ្ធផលនៃការបែងចែកហ្សែនមេរោគខាងលើ ដែលធ្វើឡើងដោយក្រុមស្រាវជ្រាវនៅក្នុងមន្ទីរពេទ្យកុមារទី១ មន្ទីរពេទ្យសម្រាប់ជំងឺត្រូពិច និង OUCRU បានឱ្យដឹងថា សំណាកចំនួន ០៦ ត្រូវបានគេយកពីអ្នកជំងឺកុមារដែលមានជំងឺពងបែកដៃ ជើង និងមាត់ ដែលមានរោគសញ្ញាធ្ងន់ធ្ងរកំពុងព្យាបាលនៅមន្ទីរពេទ្យកុមារទី១ ទាំងអស់សុទ្ធតែឆ្លងមេរោគ Enterovirus 71 (EV71) genotype B5។
ប្រភេទសត្វនេះត្រូវបានរកឃើញដំបូងនៅតៃវ៉ាន់ ក្នុងឆ្នាំ២០០៧ ហើយបានបង្ហាញខ្លួននៅទីក្រុងហូជីមិញក្នុងឆ្នាំ២០១៥ និង២០១៨។ គួរបញ្ជាក់ថា នៅក្នុងឆ្នាំ២០១១ EV71 បានបណ្ដាលឱ្យមានការផ្ទុះឡើងនៃជំងឺពងបែកដៃ ជើង និងមាត់នៅទីក្រុងហូជីមិញ ដោយមានករណីធ្ងន់ធ្ងរ និងស្លាប់ជាច្រើន។
នៅក្នុងនោះដែរ លោកស្រីវេជ្ជបណ្ឌិត កុសល កណិការ ឯកទេសរោគកុមារ សញ្ញាប័ត្រពីបារាំងបានលើកឡើងថា ជំងឺពងបែកមាត់ដៃជើង (Enterovirus) មានការឆ្លងដូចទៅនឹងជំងឺកូវីដ១៩ផងដែរ ដែលឆ្លងតាមរយៈ ទឹកមាត់ សំបោរ ក្អក លាមក ការប៉ះផ្ទាល់ជាមួយអ្នកជំងឺ និងការប៉ះពាល់សម្ភារដែលអ្នកជំងឺធ្លាប់ប៉ះ។ ទៀតសោតជំងឺកើតឡើងលើកុមារវ័យក្រោម០៥ឆ្នាំ ហើយជំងឺនេះឆ្លងពីកុមារមួយទៅកុមារមួយទៀតក្នុងរយៈពេល០៣ទៅ០៦ថ្ងៃដែលវីរុសចូលក្នុងខ្លួនរួចហើយទើបបញ្ចេញជារោគសញ្ញា។
គួរជម្រាបថា លោកស្រីវេជ្ជបណ្ឌិត បានបន្ថែមថា ចំពោះរោគសញ្ញាដែលអ្នកគួរតែកត់សម្គាល់នោះរួមមាន ក្ដៅខ្លួន ផ្ដាសាយ ហៀរសំបោរ ក្អក រលាកបំពង់ក ដែលរោគសញ្ញាទាំងនេះធ្វើឱ្យឪពុកម្ដាយមានភាពយល់ច្រឡំថា កូនរបស់ខ្លួនមានរោគផ្ដាសាយធម្មតា។ បន្ទាន់មកក្នុងរយៈពេល២ទៅ៣ថ្ងៃក្រោយមក ទើបមានចេញជាសញ្ញាពងបែកក្នុងមាត់ ដែលបង្កការឈឺចាប់ដល់កុមារក្នុងការញុំាអាហារ ហើយក៏មានពងបែកលើបាតដៃ បាតជើង ជង្គង់ កែងដៃ គូដ និងជុំវិញប្រដាប់បន្ដពូជ។
ដូច្នេះសូមឪពុកម្ដាយបង្កើនការប្រុងប្រយ័ត្ន ប្រសិនបើកុមាររបស់អ្នកមានរោគសញ្ញាដូចការរៀបរាប់ខាងលើ ចូរអ្នកប្រញាប់នាំកូនមកពិនិត្យជំងឺជាមួយវេជ្ជបណ្ឌិតឱ្យបានទាន់ពេលវេលា ដើម្បីការពារកូនអ្នកពីជំងឺពងបែកដៃ ជើង និងមាត់។ ពីព្រោះថា ជំងឺនេះមានទៅតាមកម្រិតស្រាល និងធ្ងន់៕
