សព្វថ្ងៃនេះឪពុកម្តាយមានរឿងឈឺក្បាលមួយ និយាយជាមួយកូនមិនស្តាប់បង្គប់មិនស្តាប់គ្នាចូលសោះ ហើយចេះតែពឹងលើគ្រួសារឱ្យជួយខ្លួនឯង ទោះបីខ្លួនគេធំហើយក៏ដោយ។ នេះជាបញ្ហាមួយខ្វះការអប់រំរបស់អ្នកឪពុកម្តាយតាំងពីតូចមកម្ល៉េះ។ ដូចជាសុភាសិតខ្មែរយើងពោលថា “ដុំដែកទាន់នៅក្តៅ ប្រដៅកូនចៅទាន់នៅក្មេង”។ នៅខាងក្រោមនេះជាក្បួនចិញ្ចឹមកូន ឱ្យកូនរបស់អ្នកចេះពឹងលើខ្លួនឯង។
១. បណ្តុះកូនពីតូច ធំឡើងកូនចេះពឹងលើខ្លួនឯង៖ ខ្ញុំបានឃើញទម្លាប់មួយរបស់ឪពុកម្តាយខ្មែរយើង ពេលកូនទារទិញរបស់អ្វីមួយ ទិញឱ្យភ្លាមគ្រប់ពេលនោះ។ ការទិញបែបនេះនាំឱ្យកូនបានចិត្ត ទោះបីកូនធំឡើងក៏នៅតែទន់ខ្សោយដែរ។ ឳពុកម្តាយគួរតែរៀននិយាយមានហេតុផលជាមួយកូនតាំងពីតូចឱ្យហើយដើម្បីក្មេងចេះគិត។ ពេលអ្នកព្យាយាមបង្ហាត់ក្មេងៗឱ្យចេះជួយធ្វើការផ្ទះតែបន្តិចបន្តួច វានាំឱ្យកូនធំឡើងចេះធ្វើកិច្ចការដោយខ្លួនឯង ហើយចេះរៀបចំអនាគតថែមទៀត។ ការបណ្ដុះកូនឱ្យចេះទទួលខុសត្រូវពីក្មេង ធំឡើងកូនអ្នកនឹងចេះពឹងលើខ្លួនឯង។
២. ខ្ចីខួរក្បាលអ្នកប្រាជ្ញបណ្តុះគំនិតកូន៖ តាមអ្នកចិត្តវិទូបានប្រាប់ថា បើអ្នកចង់ឱ្យកូនចេះគិតដោយខ្លួនឯង អ្នកគួរតែឆ្លៀតពេលអានសៀវភៅ ចាក់ស្តាប់អ្នកនិយាយមានប្រយោជន៍ដល់គំនិត និងនិយាយជាមួយកូនៗ ដោយភាសាល្អៗ ការធ្វើបែបនេះម្តងបន្តិចៗ ពីតូចទៅ ពេលកូនអ្នកធំឡើងនឹងមានខួរក្បាលមួយវៃឆ្លាតលើសគេមិនខាន។ ព្រោះកូននៅតូចមិនគិតក៏ដោយ ប៉ុន្តែក្មេងមានញ្ញាណពិសេសចាប់យកអ្វីដែលអ្នកធ្វើ។ ដូចជាពេលកូនអ្នកឮនរណាម្នាក់ជេរ ស្រាប់តែកូនអ្នកចេះជេរដែរ។ នេះជាញ្ញាណពិសេសរបស់ក្មេង។
៣. គំរូឪពុកម្ដាយមានឥទ្ធិពលដល់អនាគតកូនៗ៖ ឪពុកម្ដាយធ្វើជាគំរូដល់កូនៗ ព្រោះសកម្មភាពរបស់អ្នកអាចចម្លងចូលក្នុងអារម្មណ៍របស់ក្មេងបានលឿនហើយ។ តាមលោក ឡេង វីរៈ បានលើកឡើងថា “ គ្រួសារប្រៀបដូចនឹងសង្គមមួយអញ្ចឹង ហើយកូនចៅ កូនក្មួយ ដែលរស់នៅក្នុងក្នុងគ្រួសាររបស់ខ្ញុំ ខ្ញុំតែងផ្ដល់នូវក្តីស្រលាញ់ និងភាពកក្ដៅជាគំរូ”។ និយាយឱ្យខ្លីថា ឪពុកម្តាយមានអត្តចរិតបែបណា កូនក៏អត្តចរិតស្រដៀងគ្នាដែរ។ ពេលកូនបានឃើញពីអ្វីដែលឪពុកម្ដាយបានធ្វើជាប្រចាំរាល់ថ្ងៃ កូនក៏នឹងកើតការជ្រួតជ្រាប និងធ្វើតាមកើតជាទង្វើការរៀនយល់ដឹងដែលនាំឆ្ពោះទៅរកការអភិវឌ្ឍខ្លួនឯង និងជាចំណុចចាប់ផ្ដើមឆ្ពោះទៅរកភាពជោគជ័យក្នុងពេលអនាគត។
៤. កុំចាយលុយលើកូន៖ តាមលោកតា Warren Buffett បានប្រាប់ទៅគេហទំព័រ Fortune ថា “ខ្ញុំមានគម្រោងបរិច្ចាគទ្រព្យសម្បត្តិភាគច្រើនរបស់ខ្ញុំចូលទៅក្នុងមូលនិធិ Buffett ជាជាងឱ្យកូនរបស់ខ្ញុំទាំងអស់”។ គាត់បានបន្ថែមថា “កូនៗ របស់ខ្ញុំនឹងមានភាពក្លាហានក្នុងការច្នែសមត្ថភាពផ្ទាល់ខ្លួនរបស់ពួកគេឱ្យខ្លាំងឡើងជាងមុន ចំណែកខ្ញុំរង់ចាំជួយដោះស្រាយជាមួយពួកគេនៅពេលដែលត្រូវការជំនួយជាជាងការផ្តល់លុយកាក់ដែលមានសម្រាប់”។ ដំបូន្មានរបស់លោកតា Warren ចង់អប់រំថា ទោះបីគាត់មានលុយរាប់ពាន់ដុល្លារក៏ដោយ បើឱ្យលុយកូនមានស្រាប់ វាធ្វើឱ្យកូនក្លាយជាមនុស្សទាន់ជ្រាយ គ្មានសមត្ថភាពពឹងខ្លួនឯង ហើយទោះបីកូនរបស់គាត់មានលុយគរដូចជាភ្នំក៏រលាយអស់ដែរ។ លុយអាចគង់បានយូរនិងរស់នៅមានក្តីសុខតម្រូវឱ្យកូនគាត់មានសមត្ថភាពខ្លាំងគឺចេះពឹងលើខ្លួនឯងដើម្បីរស់ ហើយរស់នៅឱ្យមានសុភមង្គល៕ អត្ថបទដោយ៖ ទ្រ សុភាព