មនុស្សយើងកើតមកមិនចង់មានមុខចាស់ជាងវ័យនោះទេ ប៉ុន្តែមានសំណួរមួយថា តើយើងអាចគ្រប់គ្រងភាពចាស់ដោយរបៀបណា? ថ្មីៗ នេះខ្ញុំបានសិក្សាពីសៀវភៅមួយក្បាលមានឈ្មោះថា Lifespan បាននិយាយថា ភាពចាស់របស់មនុស្សយើងក៏ជាជំងឺមួយដែរ ហើយជំងឺនេះក៏ធ្វើការព្យាបាលបានដែរ។ សៀវភៅនេះនិពន្ធឡើងដោយលោក David Sinclair ជាសាស្រ្តាចារ្យផ្នែកវេជ្ជសាស្ត្រនៅសាលា Harvard គាត់បន្តថា ជំងឺភាពចាស់នេះកើតចេញពីទម្លាប់របស់មនុស្សជាប្រចាំថ្ងៃ ២០%មកពីកត្តាហ្សែន នៅសល់ ៨០% គឺរបៀបរស់នៅនេះឯង។
បើយើងមានរបៀបរស់នៅមិនត្រឹមទេ ភាពចាស់របស់យើងកាន់តែលឿនខុសពីធម្មតាដែរ។ គាត់ប្រាប់ថា ពេលអ្នកមានទម្លាប់មិនល្អ នាឡិកាក្នុងខ្លួនវិលកាន់តែលឿនឱ្យអ្នកកាន់តែឆាប់ចាស់”។ បងប្អូនមួយចំនួនច្បាស់ជាបានស្គាល់ឯកឧត្តមបណ្ឌិត តាន់ មុនីវណ្ណ ពេលខ្ញុំបានជួបគាត់ផ្ទាល់ គាត់មានវ័យក្មេងជាងខ្ញុំឆ្ងាយណាស់ ហេតុអ្វីគាត់អាចពន្យាភាពចាស់បានល្អយ៉ាងនេះ? ខ្ញុំព្យាយាមស្តាប់គាត់ច្រើនណាស់ គាត់បានប្រាប់ថា ហាត់និងហូប។ គាត់អត់ដែលឈឺព្រោះកាយគាត់រឹងមាំណាស់ គាត់បានចំណាយពេលហាត់ប្រាណ ៣០ឆ្នាំមកហើយ”។ ការហូបអាហាររបស់គាត់ចៀសវាងពីស្រា និងបារី គាត់ផ្តោតលើរបបអាហារត្រឹមត្រូវត្រី សាច់គ្មានជាតិខ្លាញ់ និងបន្លែផ្លែឈើស្រស់ៗ ដើម្បីប៉ូវរាងកាយ។ គាត់អាចរក្សាវ័យឱ្យក្មេងមកពីទម្លាប់ប្រចាំថ្ងៃល្អនេះឯង។ ទម្លាប់គាត់សាមញ្ញ តែមានឥទ្ធិពលលើសម្រស់ណាស់។
តាមលោក David Sinclair បានបញ្ជាក់ថាបើអ្នកចង់ពន្យាភាពចាស់ ចូរអ្នកជៀសវាងពីវិទ្យុសកម្មជាពិសេសកាំរស្មីពន្លឺថ្ងៃ បើស្បែកអ្នកត្រូវកម្ដៅថ្ងៃខ្លាំង ស្បែករបស់អ្នកកាន់តែឆាប់ចាស់ព្រោះវាកាន់តែពន្លឿននាឡិកាក្នុងខ្លួនរបស់អ្នកដើម្បីបំបែកក្រូម៉ូសូមរបស់អ្នកចោល។ បើនៅក្នុងខ្លួនរបស់អ្នកមានជាតិគីមីឬជាតិពុលច្រើននោះ វាទៅបំផ្លាញក្រូម៉ូសូមឱ្យខូចបង្កើនល្បឿនភាពចាស់កាន់តែលឿន។ មានកត្តាដូចជាការគេងមិនគ្រប់ ស្រ្តេសច្រើន កង្វះការធ្វើលំហាត់ប្រាណ មានរបបអាហារខុសនាំឱ្យធាត់ ការជក់បារី…ទាំងនេះនាំឱ្យអ្នកកាន់តែចាស់លឿនឡើង។
តើលោក Sinclair អាចបន្ថយភាពចាស់ដោយរបៀបណា? គាត់បានប្រាប់គេហទំព័រអរន្តជាតិ thoughteconomics ថា សព្វថ្ងៃនេះ ខ្ញុំមានអាយុ ៥៤ឆ្នាំក៏ដោយ តែខ្ញុំមានអារម្មណ៍ខ្លួនឯងមានអាយុត្រឹមតែ ២០ឆ្នាំតែប៉ុណ្ណោះ។ ព្រោះខ្ញុំគ្មានទម្លាប់ជក់បារីទេ ហើយខ្ញុំហាត់ប្រាណជាទៀងទាត់ថែមទាំងលើកទម្ងន់ផងដែរ។ ហើយរាងកាយរបស់ខ្ញុំគ្មានខ្លាញ់នោះទេ។ ខ្ញុំគេងបានគ្រប់គ្រាន់ និងញ៉ាំអាហារបានត្រឹមត្រូវដែលមានទំនោរទៅរករុក្ខជាតិច្រើនជាងសាច់(សាច់តិច)។ អ្វីដែលគាត់អាចធ្វើបានលើទម្លាប់ទាំងអស់នេះសុទ្ធតែរៀបចំទាំងម៉ោងធ្វើការ ម៉ោងញ៉ាំអាហារ និងម៉ោងគេងតាមពេលវេលារបស់គាត់ផងដែរដើម្បីរក្សាវ័យ រក្សាសុខភាពឱ្យអាយុវែង នេះជាគោលបំណងរបស់គាត់ទាំងពីនៅក្មេងមកម្ល៉េះ! អត្ថបទដោយ៖ ទ្រ សុភាព
លោកអ្នកអាចទិញសៀវភៅ លំហូរចិត្ត តាមហាងឆេង២៤>>https://t.me/hangchhengH24
