បើនិយាយពីទម្លាប់ហូបរសជាតិប្រៃវិញនោះ សម្រាប់ប្រជាជនខ្មែរយើងមួយភាគធំចូលចិត្តអាហាររាងប្រៃ មកពីទម្លាប់ចេញពីគ្រួសារដែរ។ ការហូបអាហារមានរសជាតិប្រៃលើសកម្រិតបែបនេះ នាំផលកើតជំងឺច្រើនមុខដោយអត់ដឹងខ្លួនទេ។ នៅខាងក្រោមនេះមានជំងឺ៤ សម្រាប់អ្នកចូលចិត្តហូបប្រៃលើសកម្រិតធម្មតា៖
១. ហូបប្រៃនាំឱ្យអ្នកសម្ពាធឈាមឡើងខ្ពស់៖ បើយោងតាមគេហទំព័រ BabyanDmom បានចុះផ្សាយថា សម្រាប់អ្នកមានទម្លាប់ញ៉ាំអាហារមានរសជាតិប្រៃលើសកម្រិតជាប្រចាំថ្ងៃនោះ នាំឱ្យបុគ្គលនោះកើតជំងឺលើសសម្ពាធឈាមខ្ពស់ដែលធ្វើឱ្យសរសៃឈាមអាក់ទែដំណើរការមិនប្រក្រតីរួចហើយបង្កទៅជាបញ្ហាជំងឺគាំងបេះដូងលឿន។
២. ហូបប្រៃជាប្រចាំមានតែកើតមហារីកក្រពះ៖ តាមសិក្សារបស់លោកស្រីវេជ្ជបណ្ឌិត Selma Kronsteiner-Gicevic et Tilman Kühn អ្នកស្រាវជ្រាវពីជំងឺមហារីកបានធ្វើការលើកឡើងថា អ្នកហូបអាហារមានជាតិប្រៃលើសកម្រិត បើប្រៀបធៀបទៅអស់រយៈពេល១១ឆ្នាំ អ្នកហូបនោះមានលទ្ធផលតាមដានមើលកំរិតសូយ្យូម (មានជាតិអំបិល) នៅក្នុងទឹកនោមជារង្វាស់ឆ្លុះបញ្ចាំងអំពីបរិមាណក្នុងការហូបអាហារប្រៃលើសកម្រិត(អំបិល) មានហានិភ័យកើតជំងឺមហារីកក្រពះរហូតដល់ចំនួន ៣៩%លើសអ្នកដែលហូបអាហារសាបមានរសជាតិតាមធម្មតា។
៣. ហូបប្រៃប្រល័យបេះដូង៖ បើយោងតាម Health Data បានចុះផ្សាយថា ការហូបអំបិលក្នុងអាហារលើសកម្រិតធម្មតាត្រូវបានគេហៅម្យ៉ាងទៀតថាសូដ្យូម (ជាប្រភេទសារធាតុរ៉ែម្យ៉ាង) ដែលសំខាន់សម្រាប់ជីវិត ព្រោះរាងកាយមនុស្សមិនអាចផលិតអំបិលដោយស្វ័យប្រវត្តិបានទេ។ ប៉ុន្តែការប្រើប្រាស់អំបិលច្រើនពេកនឹងបង្កើនហានិភ័យកើតជំងឺបេះដូងលឿនខុសពីធម្មតាគឺអាចមានករណីស្លាប់មុនអាយុ។ បើតាមការវាស់ស្ទង់សុខភាព និងការវាយតម្លៃតាម Health Data បានបញ្ជាក់ថា ជិត២លាននាក់បានស្លាប់ដោយសារប្រើប្រាស់អំបិលច្រើនជារៀងរាល់ឆ្នាំ។
៤. ហូបប្រៃកើតជំងឺទឹកនោមផ្អែម៖ បើផ្អែកទៅតាមការចុះផ្សាយរបស់ប្រភព allrecipes បានលើកឡើងពីសម្តីរបស់វេជ្ជបណ្ឌិត Tricia Pingel អ្នកជំនាញខាងផ្នែកចំណីអាហារ បាននិយាយថា នៅក្នុងការសិក្សាបានបង្ហាញថា ការទទួលទានអាហារសម្បូរជាតិប្រៃពិតជាអាចនាំសុខភាពឱ្យប្រឈមទៅនឹងការកើតជំងឺទឹកនោមផ្អែមប្រភេទទី ២ នាពេលអនាគតបានមែន។ មូលហេតុដែលបង្កឱ្យមានទំនាក់ទំនងជាតិអំបិល (សូដ្យូម) ផ្សារភ្ជាប់នឹងការកើតជំងឺទឹកនោមផ្អែម គឺដោយសារតែ សារជាតិអំបិល (សូដ្យូម) មានតួនាទីគ្រប់គ្រងតុល្យភាពជាតិទឹកក្នុងខ្លួនរបស់មនុស្ស និងជួយរក្សាបរិមាណឈាម ក៏ដូចជាសម្ពាធឈាមឱ្យស្ថិតនៅកម្រិតធម្មតាផងដែរ៕ អត្ថបទដោយ៖ ទ្រ សុភាព