បច្ចុប្បន្ននេះយើងឃើញថា រាល់ការជួបជុំមិនថាភាពសប្បាយរីករាយ ទទួលបានដំណែងថ្មី ខូចចិត្តរឿងស្នេហា និងមានវិបត្តិផ្សេងៗ យើងបានកត់សម្គាល់ថា មនុស្សភាគច្រើនតែងតែចូលចិត្តផឹកគ្រឿងស្រវឹងមិនថាពិសារតិច រឺច្រើន។ មានអ្នកផឹកស្រាលែងស្រវឹងក៏អួតថាខ្លួនខ្លាំង ប៉ុន្តែនៅក្នុងខ្លួនមានជំងឺច្រើនមុខនៅចងចាំ។ អ្នកផឹកស្រាច្រើនប៉ះខ្លាំងគឺថ្លើម បន្តផឹកយូរៗ ទៅវិវត្តទៅជាជំងឺក្រិនថ្លើម ហើយមហារីកថ្លើមគួរឱ្យអាណួតណាស់។
បើយោងតាមលោវេជ្ជបណ្ឌិត ហៀង បុប្ជារត្នន៍ ឯកទេសផ្នែកអាហាររូបត្ថម្ភនិងរបបអាហារបានបញ្ជាក់ថាថ្លើមរបស់យើងមានសមត្ថភាពពីធម្មជាតិអាចការព្យាបាលខ្លួនឯងក្នុងរយះពេល២សប្តាហ៍ពេលអ្នកផឹកស្រាតិចតួចឬយូរៗ ម្តង។ បើអ្នកផឹកស្រារាល់ថ្ងៃ ថ្លើមគ្មានពេលព្យាបាលខ្លួនវាទេ ព្រោះតែជាតិពុលច្រើនពេក។
លោកវេជ្ជៈបណ្ឌិតបានបន្តថា ពេលយើងញៀននឹងស្រា នោះពិបាកនឹងបញ្ឈប់ទាំងស្រុងណាស់ តែយើងអាចកាត់បន្ថយបានពីបរិមាណច្រើនមកបរិមាណតិចតាមដែលអាចធ្វើទៅបាន។ ជាទូទៅពេលយើងផឹកគ្រឿងស្រវឹង ជាតិអាកុលប្រភេទអេតាណុល វាអាចចូលទៅក្នុងខ្លួនរបស់អ្នកតាមរយៈការស្រូបរបស់ពោះវៀនតូច វាក៏ចូលទៅក្នុងកោសិកាថ្លើម រួចបម្លែងទៅជាសារធាតុមួយប្រភេទដែលគេហៅថាអាសេទិច។
ហើយអាសេទិចកើនឡើងច្រើននៅក្នុងសរសៃឈាម វាធ្វើឱ្យមានផលប៉ះពាល់ដល់ការដឹកជញ្ជូនសារធាតុស្ករ និងជាតិខ្លាញ់នៅក្នុងខ្លួន។ សូម្បីវេជ្ជបណ្ឌិត សាខន សុលីដា ឯកទេសបេះដូងបានលើកឡើងថា ជាតិស្រានាំប៉ះពាល់ដល់បេះដូង ព្រោះវាមានជាតិអាល់កុលចូលទៅក្នុងឈាមសរសៃឈាម ជាហេតុធ្វើឱ្យអ្នកផឹកស្រាច្រើនប្រឈមលើសឈាម កត្តាជំងឺលើសឈាមនេះហើយនាំឱ្យគាត់ងាយប្រឈមជំងឺបេះដូងលឿនផងដែរ”។
ពេលផឹកស្រាច្រើនហើយច្រើនឆ្នាំនាំឱ្យថ្លើម និងបេះដូងរបស់អ្នកសម្បូរជាតិពុលជាហេតុខូចថ្លើមមិនអាចត្រលប់មកដូចដើមទេហើយបន្សល់ទុកនៅស្លាកស្នាមត្រង់កន្លែងខូចហ្នឹងទៀត។ សូម្បីតែមុខងារថ្លើមនិងបេះដូងចុះខ្សោយអាចប៉ះពាល់ដល់អាយុជីវិតរបស់អ្នកលឿនផងដែរ។ នេះជាការបញ្ជាក់ថា ការផឹកស្រាជាប្រចាំថ្ងៃមួយថ្ងៃ៣ទៅ៨កំប៉ុងនាំឱ្យខូចថ្លើមនិងបញ្ហាបេះដូងយ៉ាងយូរ ៥ទៅ១០ឆ្នាំ៕ អត្ថបទដោយ៖ ជុំ សុដាឡែន