ការចិញ្ចឹមកូនឱ្យមានផ្លូវចិត្តតាន់ពីតូចឱ្យហើយ វាមិនងាយស្រួលនោះទេគឺតម្រូវឱ្យឪពុកម្តាយប្រើភាពអត់ធ្មត់ហើយអប់រំកូនដោយប្រើចំណេះដឹងបន្ថែមផងដែរ ទើបកូនចេះរឹងមាំដោយខ្លួនឯង ហើយពេលធំឡើងឪពុកម្តាយលែងឈឺក្បាលលែងបារម្ភច្រើនទៀត។ នៅខាងក្រោមនេះមាន ២វិធីសាស្រ្តដាំបណ្តុះចិត្តកូនរបស់លោកអ្នកឱ្យរឹងមាំឬតាន់។
១. បង្កើតភាពជឿជាក់ឱ្យកូន៖ បើអ្នកចង់ឱ្យកូនមានទំនុកចិត្តលើខ្លួនឯង អ្នកត្រូវបណ្តុះកូនពីតូច មិនមែនចាំដល់ធំនោះទេ។ បើអ្នករង់ចាំដល់ធំហើយនោះ អ្នកច្បាស់ជាឈឺក្បាលដោយខ្លួនឯងមិនខានឡើយ(អប់រំមិនងាយស្តាប់ទេ)។ ដូចជាសុភាសិតខ្មែរថា “ដំដែកទាន់នៅក្តៅ ប្រដៅកូនចៅទាន់ខ្លួននៅក្មេង” ។ តើបណ្តុះចិត្តកូនឱ្យតាន់ឱ្យរឹងមាំគេធ្វើបែបណា? ចម្លើយបង្រៀនកូនពីតូចដោយដែលមានកំហុសឆ្គង។ ពេលកូនធ្វើខុស ចូរអ្នកកុំស្តីបន្ទោសឱ្យកូនសោះ គ្រាន់តែប្រាប់កូនទៅតាមធម្មតាបានហើយគឺថា នេះកំហុសរបស់កូនត្រូវតែទទួលខុសត្រូវដោយខ្លួនឯង ប៉ុន្តែអ្នកកុំប្រើសម្តីធំដាក់កូន នាំឱ្យកូនដិតអារម្មណ៍ខ្លាចពីតូច(កុំថាឱ្យកូនសម្តីខ្លាំងៗ ជាទម្លាប់ណា!)។ ដូចជាពេលកូនធ្វើឱ្យបែករបស់អ្វីមួយ អ្នកគ្រាន់តែបង្រៀនកូនរបស់អ្នកឱ្យចេះស្អាតដោយខ្លួនឯង នេះជាការបញ្ជាក់ឱ្យកូនមានអារម្មណ៍យល់ថា ខ្លួនបានធ្វើខុស ខ្លួនត្រូវតែទទួលខុសត្រូវ..។
ពេលធំឡើងកូនរបស់អ្នកចេះមានទំនួលខុសត្រូវដោយខ្លួនឯង ហើយមានភាពជឿជាក់លើសមត្ថភាពរបស់ខ្លួនយ៉ាងរឹងមាំផងដែរ។ នេះក៏ទិដ្ឋភាពសំខាន់ក្នុងការបង្រៀនកូនរបស់អ្នកឱ្យមានផ្លូវចិត្តតាន់នេះឯង។ ដល់ពេលកូនធំឡើង គេចេញប្រឡូកក្នុងសង្គមក៏មានភាពក្លាហានដើម្បីសម្រេចលទ្ធផលនៃអនាគតហើយមិនត្រឹមតែប៉ុណ្ណោះគេចេះតស៊ូ ហើយមិនភ្លេចគុណអ្នកមានគុណទាំងពីរនោះ។
២. ធ្វើមិត្តជាមួយកូន៖ តាមបទពិសោធន៍ក្នុងនាមខ្ញុំជាកូនម្នាក់ ខ្ញុំមានអារម្មណ៍ឆាប់ខ្លាចណាស់ពីមុន ព្រោះតែអាណាព្យាបាលតែងតែប្រើអំពើហិង្សាលើខ្ញុំ រហូតមានអារម្មណ៍ខ្លាចនិងមានការឈឺចាប់ ឱ្យតែនឹកឃើញរឿងពីអតីតកាល។ ព្រោះតែអាណាព្យាបាល ឬឪពុកខ្ញុំតែងតែចង់ប្រើសិទ្ធអំណាចបង្ហាញទៅកាន់កូនៗដើម្បីឲ្យពួកកូនធ្វើតាមការបង្គាប់បញ្ជារបស់គាត់។ ពេលឪពុកម្តាយមានអាកប្បកិរិយាបែបនេះ បានធ្វើឱ្យគ្រួសារនិងកូនចេះតែមានគម្លាតកាន់តែឆ្ងាយទៅៗនិងបាត់បង់ភាពស្និតស្នាលជាមួយគ្នា រួមទាំងជះឥទ្ធិពលផលអវិជ្ជមានលើផ្លូវចិត្តរបស់កូនគឺខ្វះភាពកក់ក្តៅ។
ពេលឪពុកម្តាយធ្វើមិត្តជាមួយកូន ជួយឲ្យក្មេងហ៊ាននិយាយអ្វីគ្រប់យ៉ាង មិនអាចលាក់បាំងពីអ្នកបានឡើយ ជាពិសេសវាងាយស្រួលដល់អ្នកយល់ពីអារម្មណ៍របស់កូនកាន់តែច្បាស់មានក្តីស្រឡាញ់ច្រើនឡើង។ ការធ្វើខ្លួនជាមិត្តរបស់កូន គឺការចំណាយពេលលេងជាមួយកូន ស្តាប់កូននិយាយ និងហូបអាហារជុំគ្នា ធ្វើឱ្យផ្លូវចិត្តកូនតាន់ព្រោះតែក្តីស្រឡាញ់និងចំណេះដឹងពីឪពុកម្តាយបានផ្តល់ឱ្យកូននោះឯង។ ពេលវេលាអ្នកធ្វើការនិងរកស៊ី វាពិតជាមានតម្លៃហើយ ប៉ុន្តែវ័យរបស់កូនរបស់អ្នកបើអ្នកខ្វះការអប់រំហើយ អ្នកត្រៀមខ្លួនឈឺចិត្តជាមួយកូនឱ្យហើយទៅ៕ អត្ថបទដោយ៖ ទ្រ សុភាព
អ្នកអាចតាមដានផេកថ្មី គឺផេកកម្មវិធី លំហូរចិត្ត
អ្នកអាចទិញសៀវភៅ លំហូរចិត្ត តាមនេះ https://t.me/hangchhengH24