ជាទូទៅការធ្លាក់ស (Vaginal discharge) គឺជាសារធាតុរាវដែលផលិតដោយក្រពេញនៅខាងក្នុងទ្វារមាស និងមាត់ស្បូន ដែលយកកោសិកាងាប់ និងបាក់តេរីចេញ ជួយរក្សាទ្វារមាសឱ្យស្អាត និងជួយការពារការឆ្លងមេរោគនៅក្នុងប្រព័ន្ធបន្តពូជរបស់ស្ត្រី។
យោងតាមការបញ្ចាក់ពីគេហទំព័រ បានឱ្យដឹងថា verywellhealth ការបញ្ចេញទឹករំអិលចេញពីទ្វារមាសជាប្រចាំថ្ងៃ គឺជារឿងធម្មតាចំពោះស្ត្រី តែអាចការប្រែប្រួល ដូចជាក្លិន ពណ៌ (ដែលអាចមានចាប់ពីពណ៌ថ្លាទៅពណ៌សខាប់) និងបរិមាណ អាស្រ័យលើពេលវេលាក្នុងវដ្តរដូវ នៅពេលបញ្ចេញអូវុល បំបៅកូនដោយទឹកដោះម្តាយ ការរួមភេទ ឬអំឡុងពេលមានផ្ទៃពោះ។ ក្នុងករណីមានការធ្លាក់សមានពណ៌ ក្លិន ហាក់បីដូចជាខុសពីធម្មតា រួមជាមួយនឹងបញ្ហារមាស់ ឬក្រហាយទ្វារមាសដែរនោះ អាចបណ្តាលឱ្យស្រ្តីប្រឈមនឹងការឆ្លងមេរោគ នឹងជួបបញ្ហាជំងឺពាក់ព័ន្ធប្រព័ន្ធបន្តពូជផ្សេងៗដូចជា៖ ជំងឺផ្សិត ឆ្លងបាត់តេរីអាក្រក់BV ជំងឺប្រមេះទឹកបាយ រលាកអាងត្រគាក និងជំងឺមួយចំនួនទៀត ដែលធ្វើឱ្យស្រ្តីអាការក្តៅក្នុងខ្លួន ស្រកគីឡូ ស្លេកស្លាំង គ្មានកម្លាំងជាដើម។
ដូច្នេះ ដើម្បីបង្ការកុំឱ្យកើតជំងឺធ្លាក់ស ស្រ្តីគ្រប់រូបរាប់ចាប់ពីពេញវ័យឬចាប់ផ្តើមមានវដ្តរដូវស្រ្តីត្រូវតែចេះអនាម័យខ្លួនប្រាណឱ្យស្អាតល្អ និងអនុវត្តទៅតាមការណែនាំ៥ចំណុចខាងក្រោម៖
១. រក្សាទ្វារមាសឱ្យស្អាត៖ ដោយលាងសម្អាតជាមួយនឹងប្រភេទសាប៊ូដែលគ្មានជាតិកាត់ ឬកម្រិតស្រាល និងលាងជាមួយទឹកក្តៅឧណ្ហៗពីខាងក្រៅជាប្រចាំ។
២. មិនត្រូវប្រើសាប៊ូដែលមានក្លិនក្រអូប៖ ចៀសវាងកុំប្រើប្រាស់ផលិតផលបំបាត់ក្លិនដូចជាសាប៊ូ ទឹកអប់ ម្សៅ ឡេ និងសាប៊ូពពុះនៅតំបន់ទ្វាមានឱ្យសោះ។ មួយវិញទៀតហាមដាច់ខាតកុំគេងត្រាំទឹកពពុះសាប៊ូ ព្រោះវាប៉ះពាល់ណាស់ទៅដល់ទ្វាមាសស្រ្តី។
៣. រាល់ពេលចូលបន្ទប់ទឹកត្រូវលាងទ្វាមាស៖ លាងសម្អាតនិងជូតទ្វាមាសពីមុខទៅក្រោយ ដើម្បីការពារបាក់តេរីមិនកុំឱ្យឆ្លង។
៤. ជៀសវាងកុំស្លៀកខោទ្រនាប់តឹង៖ នៅពេលអ្នកស្លៀកខោទ្រនាប់ដែលមានសភាពរឹបខ្លាំង ហើយរយៈពេលយូរគឺធ្វើឱ្យគ្មានខ្យល់អាការចេញចូល និងងាយធ្វើឱ្យមានមេរោគផ្សិតក៏ដូចជាបាត់តេរីឆ្លងចូលទៅក្នុងទ្វាមាស។
៥. ហាមស្លៀកខោទ្រនាប់១លើសពី១២ម៉ោង៖ ខោទ្រនាប់ដែលអ្នកស្លៀកគឺគេណែនាំឱ្យស្លៀកត្រឹមរយៈពេល៨ទៅ១២ម៉ោងត្រូវតែប្តូរចេញ ពីព្រោះបើអ្នកស្លៀកលើសពីម៉ោងនេះវាអាចបង្កឱ្យមានការរលាកទ្វាមាស បាត់តេរី និងផ្សិតដែលទុំជាប់ជាមួយខោវានឹងឆ្លងចូលទៅក្នុងទ្វាមាសមិនខាន។
គូសបញ្ជាក់ផងដែរថា ជំនឿមួយដែលខមែរយើងតែងនិយាយថាជំងឺធ្លាក់សគឺកើតទៅតាមពូជឬជាជំងឺតំណរពូជ ទាល់តែអ្នកមានខ្សែស្រឡាយធ្លាប់កើតទើបអាចកើតបាន។ ប៉ុន្តែជាក់ស្តែងវាមិនដូចអ្វីដែលគិតនោះទេ ជំងឺធ្លាក់សនេះអាចកើតទៅលើមនុស្សស្រីគ្រប់រូបចាប់ពីពេលពេញវ័យឡើងទៅ ប្រសិនជាស្រ្តីមិនបានអនាម័យតំបន់ទ្វាមាសឱ្យល្អទេនោះ មិនយូរមិនឆាប់អ្នកនឹងប្រឈមមុខជាមួយជំងឺធ្លាក់សនេះមិនខាន៕
អត្ថបទដោយ៖ មឿន គន្ធា