ជីវិតយើងថ្ងៃនេះលំបាក ហើយថ្ងៃស្អែកវាកាន់តែលំបាកថែមទៀត។ នេះជាសម្តីមហាសេដ្ឋីលោក Jack Ma ចង់ដាស់តឿនឱ្យយុវជនគិតថា ចង់ឱ្យជីវិតមានអនាគតល្អប្រសើរឡើង ត្រូវចេះស៊ូ សំលៀងគំនិត និងមានបេះដូងក្លាហានប្រយុទ្ធនឹងការលំបាកនេះ ទាន់ខ្លួននៅវ័យក្មេង។ ហើយលោក Ma គាត់អូសតម្រុយជាគំនិតមួយថា អ្នកជោគជ័យទាំងអស់ សុទ្ធតែជាមនុស្សមានគំនិតវិជ្ជមានចំពោះអនាគត។ លោកចង់មានន័យថា ធ្វើជាយុវជន កុំកម្លាំងបាយដោះស្រាយបញ្ហា ត្រូវប្រើគំនិត និងចេះអត់ធ្មត់ឱ្យច្រើន ទើបបញ្ហាតូច នាំឱ្យអស់បញ្ហាជាដើម។

ហើយលោក Jack Ma គាត់ផ្តាំបានបន្ថែមថា គ្មានអ្នកណាដឹងថា ជីវិតយើងមួយនេះ អាចធ្វើអ្វីបានខ្លះទេ? សំខាន់ណាស់ អ្នកមិនត្រូវចុះចាញ់ចំពោះឧបសគ្គទេ។ អ្នកត្រូវដឹងថា ឱកាសអស្ចារ្យក្នុងជីវិតនេះ មិនអាចពន្យល់បកស្រាយឱ្យបានលម្អិតនោះទេ។ បើអ្នកអាចពន្យល់ពីឱកាសនេះឱ្យច្បាស់លាស់់ វាមិនមែនជារឿងអស្ចារ្យទៀតទេ។” បើយើងធ្វើរឿងច្បាស់បំផុត រួចចាំធ្វើរឿងហ្នឹងនោះ អនាគតក៏កន្លងផុតដូចគ្នា ហើយវាមិនមែនជារឿងគួរឱ្យរំភើបទេ។ ហៅថា រឿងហួសសម័យរូចទៅហើយ ដូចជារឿងក្រុមហ៊ុន Nokia ផលិតទូស័ព្ទចុចបេតុងដដែលៗ រហូតក្រុមហ៊ុន ​Apple ព្យាយាមផលិតទូស័ព្ទដៃ Iphone ជាសម័យថ្មី លក់ដាច់ជុំវិញពិភពលោក។

ព្រោះថា យុវជនមិនអាចធ្វើដដែលៗ រួចគិតថា អនាគតល្អភ្លឹស្វាងនោះទេ ត្រូវព្យាយាមស្វែងរកគំនិតថ្មីៗ និងសាកល្បងរឿងឱ្យច្រើនក្នុងសង្គម ដើម្បីយកបទពិសោធន៍។ ព្រោះនៅជាយុវជន របស់មានតម្លៃបំផុត ជាបទពិសោធន៍នេះជាដើមទុងទៅថ្ងៃអនាគតផងដែរ។

អ្នកអាចសួរថា គំនិតថ្មីៗ រកបានដោយរបៀបណា? តាមលោក Jack Ma បានឱ្យតម្រុយមើលបញ្ហាជាឱកាសសម្រាប់អនាគតយុវជននោះ គាត់បាននិយាយថា ឱកាសតែងតែនៅជាមួយមនុស្សចូលចិត្តនិយាយពីបញ្ហានេះឯង។​ ហើយមានគេសួរលោក Ma ថា តើអ្នកធ្វើយ៉ាងមិចបានក្លាយជាអ្នករកស៊ីពូកែតាមអ៊ីនធឺណេតនៅប្រទេសចិន? លោក Ma បានឆ្លើយបតថា ខ្ញុំមានបីជម្រើស ទីមួយ ខ្ញុំជាមនុស្សមានគំនិតគិតវិជ្ជមានច្រើន ទីពីរខ្ញុំធ្វើការងារជាមួយយុវជន និងទីបី ត្រូវវិនិយោគទៅលើយុវជនឱ្យច្រើន។ ជាចុងក្រោយគាត់បញ្ជាក់បន្ថែមថា យុវជនត្រូវព្យាយាមធ្វើការងារឱ្យខ្លាំង ព្រោះថា ពេលអ្នកធ្វើការងារដើម្បីអ្នកទៃ ហើយវានឹងធ្វើឱ្យអ្នកមានក្តីសុខ៕

 អត្ថបទដោយ៖ ទ្រ សុភាព