ក្រួសក្នុងថង់ទឹកប្រមាត់ គឺជាកំណករឹងនៃកាកសំណល់សល់ពីសារធាតុរាវរំលាយអាហារដែលអាចបង្កើតនៅក្នុងថង់ទឹកប្រមាត់។ ក្រួសក្នុងថង់ទឹកប្រមាត់ មានទំហំចាប់ពីតូចដូចគ្រាប់ខ្សាច់រហូតដល់ធំដូចបាល់វាយកូនហ្គោល ដោយមានអ្នកជំងឺខ្លះកើតមានក្រួសតែមួយក្នុងថង់ទឹកប្រមាត់ប៉ុន្តែទំហំធំ ចំណែកខ្លះទៀតកើតក្រួសតូចៗមែន ប៉ុន្តែមានច្រើននៅក្នុងថង់ទឹកប្រមាត់។ (នេះបើតាមប្រភព mayoclinic)

តាមប្រសាសន៍របស់វេជ្ជបណ្ឌិត គួច ម៉េងលី ធ្លាប់បានលើកឡើងឱ្យដឹងថា អាការៈឈឺចុកខ្លាំងនៅក្នុងទ្រូងធ្លាយទៅដល់ឆ្អឹងខ្នងខាងក្រោយ​ រាគ​ ក្អួត អស់កម្លាំង ក្ដៅខ្លួន លាមកមានពណ៌សភ្លឺ ទឹកនោមមានពណ៌ក្រម៉ៅ​ ព្រឺរងា កើតមានរយៈពេល៥ម៉ោងមិនបាត់ទៅវិញទេគេអាចសន្និដ្ឋានបានថា ​ជាអាចមកពីបញ្ហាប្រមាត់។ ក្នុងករណីនេះ លេចចេញជាអាការតម្រូវឱ្យបញ្ជូនអ្នកជំងឺទៅកាន់មន្ទីរពេទ្យបន្ទាន់ ដើម្បីឱ្យគ្រូពេទ្យពិនិត្យនឹងរោគវិធីព្យាបាលបានទាន់ពេលវេលា។

ចំពោះស្ថានភាពអ្នកជំងឺដែលមានអាការខាងលើ នៅពេលទៅដល់មន្ទីរពេទ្យ គ្រូពេទ្យជំនាញ នឹងពិនិត្យមើលឱ្យជាក់ច្បាស់ជាមុនសិនថា​ តើស្ថានភាពប្រមាត់របស់អ្នកជំងឺស្ថិតក្នុងដំណាក់កាលណា ប្រសិនបើដល់ដំណាក់កាលទុកលែងបាន គឺគេនឹងកាត់យកថត់ប្រមាត់ចេញហើយ។

ក្នុងដំណើរការនៃការវះកាត់យកថង់ប្រមាត់ចេញនាសម័យបច្ចុប្បន្ននេះ គឺងាយស្រួល និងសុវត្ថិភាពជាងជំនាន់មុនឆ្ងាយណាស់ ដោយបច្ចេកទេសវះកាត់ គ្រាន់តែវះប្រហោងតូចមួយ ដើម្បីសូកទុយូចូលទៅតំបន់ថត់ប្រមាត់ និងធ្វើការវះកាត់ទាញយកថង់ទឹកប្រមាត់ចេញ។

វេជ្ជបណ្ឌិត គួច ម៉េងលី បញ្ជាក់ឱ្យដឹងទៀតដែរថា ក្នុងលក្ខខណ្ឌយកថត់ទឹកប្រមាត់ចេញ សរីរាង្គកាយរបស់យើងនៅតែអាចដំណើរការធម្មតាដដែល គ្រាន់តែអ្នកដែលរស់នៅគ្មានប្រមាត់ ច្រើនជួបបញ្ហារាគញឹកញាប់ ឬក្តៀន និងឧស្សាហ៍ហើមពោះផោម។ កត្តានេះហើយ ទើបបានជាអ្នកជំនាញណែនាំឱ្យព្យាយាមញុំានូវប្រភេទអាហារសម្បូរទៅដោយសារជាតិសរសៃហ្វៃបឺឱ្យច្រើន ដើម្បីជួយការកុំឱ្យរាគ ឬក្តៀន និងសម្រួលដល់ក្រពះក្នុងការរំលាយអាហារ។

ទន្ទឹមនឹងការញុំនូវក្រុមអាហារសម្បូរជាតិសរសៃហ្វៃប៊ឺ អ្នកជំនាញក៏ណែនាំឱ្យចៀសវាងអាហារមានជាតិខ្លាញ់ និងជាតិស្ករផង ព្រោះអាហារទាំងនេះងាយបង្កឱ្យអ្នកដែលកាត់ប្រមាត់ចេញងាយរាគរូស ក្តៀន ដូចគ្នា៕



អត្ថបទដោយ៖ ប៉ាវ ភក្តី