សុខភាពជាទ្រព្យទី១ ដែលមានតម្លៃថ្លៃបំផុតនៅក្នុងជីវិតរបស់បុគ្គលគ្រប់រូប។ មនុស្សជាតិនៅលើពិភពលោក អាចខ្វះលុយបាន អាចខ្វះសម្ភារនិយម ខ្វះទ្រព្យ ខ្វះឡាន ប៉ុន្តែគ្រប់គ្នាមិនអាចខ្វះសុខភាពបានទេ ព្រោះថាបើមានគ្រប់យ៉ាងតែគ្មានសុខភាព ធ្លាក់ខ្លួនឈឺដេកនឹងកន្ទេលឬគ្រែពេទ្យហើយ ទ្រព្យសម្បត្តិក្រៅខ្លួនទាំងនោះក៏គ្មានតម្លៃដែរ។ នៅពេលនិយាយដល់រឿងសុខភាព ថ្ងៃនេះចាបបៃតងចង់ឱ្យអ្នកអានទាំងអស់បានស្គាល់នូវចំណេះដឹងសុខភាពថ្មីបន្ថែមមួយទៀតគឺ កំពូលប្រទេសទាំង១០នៅក្នុងលោកដែលមានប្រព័ន្ធសុខាភិបាលក្នុងការបម្រើកម្មសេវាសុខភាពសាធារណៈល្អជាងគេបំផុត។ សាកទាយលេងៗទៅមើល តើមានប្រទេសណាខ្លះ? តើមានប្រទេសអាស៊ីនៅក្នុងលំដាប់ថ្នាក់កំពូលទាំង១០ឬអត់?

ជាការពិតណាស់ សេវាកម្មការថែទាំសុខភាព ឬ ប្រព័ន្ធសុខាភិបាលនេះគឺជាឧស្សាហកម្មសកលដែលគ្របដណ្តប់ទាំងសុខភាពផ្លូវកាយ និងផ្លូវចិត្ត។ វាគ្របដណ្តប់មុខងារជាច្រើន រាប់ចាប់ពីការបង្ការការពារ ការធ្វើរោគវិនិច្ឆ័យ និងការព្យាបាលជំងឺ និងរបួស រហូតដល់ការជាសះស្បើយរយៈពេលវែង។ បើយោងតាមអង្គការសុខភាពពិភពលោក ប្រព័ន្ធថែទាំសុខភាពដែលដំណើរការបានល្អទាមទារឱ្យមាន យន្តការហិរញ្ញវត្ថុស្ថិរភាព ធនធានមនុស្សដែលបានទទួលការបណ្តុះបណ្តាលត្រឹមត្រូវនិងទទួលបានប្រាក់បៀវត្សរ៍គ្រប់គ្រាន់ កន្លែងថែទាំល្អ និងការទទួលបានព័ត៌មានដែលអាចទុកចិត្តបានសម្រាប់ការសម្រេចចិត្តជាមូលដ្ឋាន។

បើយោងតាមរបាយការណ៍សកលចុងក្រោយគិតត្រឹមថ្ងៃទី៩ ខែឧសភា ឆ្នាំ២០២២ ចុះផ្សាយដោយ william-russell, អង្គការសុខភាពពិភពលោក បានចាត់ចំណាត់ថ្នាក់ប្រទេសទាំង១០នេះជាប្រទេសជឿនលឿនបំផុតខាងផ្នែកវេជ្ជសាស្ត្រដែលមានការថែទាំសុខភាពល្អបំផុតក្នុងពិភពលោក រួមមានដូចជា៖ (១. ប្រទេសបារាំង ២. ប្រទេសអ៊ីតាលី ៣. ប្រទេសសាន់ម៉ារីណូ ៤.ព្រះរាជាណាចក្រអង់ដូរ៉ា ៥. សាធារណរដ្ឋម៉ាល់តា ៦. ប្រទេសសិង្ហបុរី ៧. ប្រទេសអេស្ប៉ាញ ៨. ប្រទេសអូម៉ង់ ៩. ប្រទេសអូស្រ្តាលី និង ១០. ប្រទេសជប៉ុន )។

សូមរម្លឹកផងដែរថា ប្រទេសជុំវិញពិភពលោកអនុវត្តវិធីសាស្រ្តផ្សេងៗដើម្បីផ្តល់ការថែទាំសុខភាពសាធារណៈ។ អ្នក​ខ្លះ​ពឹង​ផ្អែក​លើ​ការ​គាំទ្រ​របស់​រដ្ឋាភិបាល ដូច​ជា​ក្នុង​វិធី​បង់​ប្រាក់​តែ​មួយ។ ប្រទេសផ្សេងទៀតពឹងផ្អែកលើក្រុមហ៊ុនធានារ៉ាប់រងឯកជន ហើយប្រទេសខ្លះទៀត ដូចជាសហរដ្ឋអាមេរិកមានល្បាយទាំងពីរ។ អ្វីដែលសំខាន់បំផុតហើយអាចមើលឃើញនឹងភ្នែកបានគឺ គុណភាព និងប្រសិទ្ធភាពនៃប្រព័ន្ធថែទាំសុខភាពរបស់ប្រទេសមួយ អាចមានឥទ្ធិពលយ៉ាងខ្លាំងទៅលើគុណភាពជីវិតរបស់ប្រជាពលរដ្ឋរបស់ខ្លួន៕

រៀបរៀងអត្ថបទដោយ៖ កញ្ញា លីហួយ