មានមតិមួយចំនួននិយាយថា គ្រាន់តែគិតឬមានគំនិត វាមិនសំខាន់ទេ...។ ប៉ុន្តែកត្តារាល់ជោគជ័យឬមានលទ្ធផលធំៗ សុទ្ធតែដុះពន្លក់ចេញពីគំនិតនេះជាមុន។ ថ្ងៃនេះ ខ្ញុំសូមលើកពីបុគ្គលដែលមានសមត្ថភាពម្នាក់គឺលោក លីវ ឈួង ជាសហស្ថាបនិកកាហ្វេ Brown Coffee ហើយលោកកាន់ដំណែងជានាយកប្រតិបត្តិក្នុងក្រុមហ៊ុនប្រោនកាហ្វេផងដែរ។ លោក លីវ ឈួង បានចាប់ផ្តើមបើកហាងពីតូចរហូតរីកធំមានសាខាហាងកាហ្វេជាច្រើនកន្លែង។ តើកត្តាអ្វីជម្នះឱ្យលោកអាចសម្រេចបានលទ្ធផលធំដូចជាសព្វថ្ងៃនេះ?
លោក លីវ ឈួង បានបង្ហើបប្រាប់ថា ហាងកាហ្វេអាចឈរជើងមកដល់សព្វថ្ងៃនេះ គឺយើងខំប្រឹងរួមដៃគ្នាហើយដែលមានគោលដៅតែមួយ។ លោកបន្តថា ពេលគាត់ចាប់ផ្តើមដំបូង មានរឿងមួយនៅក្នុងខួរក្បាលរបស់គាត់ មិនមែនពាក្យបរាជ័យឬទៅរកការងារផ្សេងដើម្បីធ្វើនោះទេ គឺគាត់់គិតតែមួយគត់ថា ខ្ញុំធ្វើបាន ខំធ្វើឱ្យអស់ពីសមត្ថភាព ហើយខំធ្វើការរហូតដាច់យប់ដើម្បីដុតនំក៏មានដែរ។
នេះជាផ្នត់គំនិតឱ្យគាត់ខំប្រឹងក្នុងគ្រាលំបាក កុំឱ្យទឹកចិត្តចុះចាញ់ពេលគាត់ផ្តោតគំនិតលើហាងកាហ្វេតែមួយ។ វាជាការជម្រុញខួរក្បាលរបស់លោកគិតដើម្បីរកផ្លូវ រកផ្លូវដើម្បីឱ្យអាជីវកម្មហាងកាហ្វេរស់។ របៀបគិតរបស់លោក ឈួង ឱ្យសម្រេចបានលទ្ធផល គាត់ផ្តាច់ផ្លូវក្រោយទាំងអស់ គាត់ផ្តោតផ្លូវតែមួយគត់គឺហាងកាហ្វេ។
គាត់បានធ្វើការងារស្ទើរតែគ្រប់យ៉ាងទាំងអស់ទាំងការធ្វើនំដុតនំ ការសម្អាតបង្គន់ ការឆុងកាហ្វេ បម្រើអតិថិជន និងគិតរកយុទ្ធសាស្រ្តដើម្បីលក់។ មិនត្រឹមតែប៉ុណ្ណោះទេ គាត់គេងនៅសាឡុងក្នុងហាងហ្វេប្រោនជិត ៣ឆ្នាំ។ គាត់អាចមានកម្លាំងតស៊ូពីការចាប់ផ្តើមរហូតរីកមាឌជាហាងកាហ្វេខ្មែរធំទីមួយ ព្រោះតែគាត់អត់ចេះច្រើនលើរឿងហាងកាហ្វេទាំងអស់ទេ បានគាត់អត់មានអារម្មណ៍ខ្លាចច្រើន គិតតែខំមួយមុខ។
នៅក្នុងគ្រាស្ថានការណ៍ដែលលំបាកខ្លាំងបែបនេះ គាត់ចាប់ផ្តើមធ្វើបណ្តើរមានកំហុសបណ្តើរក៏ដោយ ក៏គាត់ព្យាយាមរៀនសូត្រដើម្បីកែកំហុសបណ្តើរដែរ គាត់ខំកែរហូតដល់មានលទ្ធផលធំគឺហាងកាហ្វេប្រោនមានអតិថិជនពេញៗ ហាងតែម្តង។ នេះជាមេរៀនមួយដ៏មានតម្លៃដើម្បីឱ្យអ្នកទាំងអស់គ្នាគិតពីចារណាយកទៅអភិវឌ្ឍខ្លួនឬអាជីវកម្មរបស់អ្នកឱ្យរីកលូតលាស់ដូចជាហាងកាហ្វេប្រោនដែរ៕ អត្ថបទដោយ៖ ទ្រ សុភាព