តាមលោកវេជ្ជបណ្ឌិត មិញ ចាន់ភក្ដី ជាអ្នកជំនាញទឹកនោមផ្អែម និងជាម្ចាស់គ្លីនិក Sky Family Clinic បានបញ្ជាក់ថា ទុរេនមិនមែនជាអាហារហាមឃាត់សម្រាប់អ្នកជំងឺទឹកនោមផ្អែមទេ។ អ្វីដែលសំខាន់គឺបរិមាណដែលញ៉ាំ និងការគ្រប់គ្រងជាតិស្ករក្នុងឈាមឱ្យបានល្អ។ អ្នកជំងឺទឹកនោមផ្អែម អាចញ៉ាំទុរេនបានទេ? ចម្លើយ៖ អាចញ៉ាំបាន ប៉ុន្តែត្រូវញ៉ាំក្នុងបរិមាណសមរម្យ និងគ្រប់គ្រងឱ្យបានល្អ។
ទុរេនមានសារធាតុចិញ្ចឹមល្អជាច្រើន ដូចជា ជាតិសរសៃ ប៉ូតាស្យូម និងវីតាមីនមួយចំនួន។ ទោះជាយ៉ាងណា ទុរេនក៏មានជាតិកាបូអ៊ីដ្រាត និងកាឡូរីខ្ពស់ ដែលអាចធ្វើឱ្យជាតិស្ករក្នុងឈាមកើនឡើងបាន ប្រសិនបើញ៉ាំច្រើនពេក។
គន្លឹះសម្រាប់អ្នកជំងឺទឹកនោមផ្អែម៖ ញ៉ាំក្នុងបរិមាណតិចតួច (ប្រហែល ១–២ ក្លែបតូច) កុំញ៉ាំទុរេនច្រើនក្នុងពេលតែមួយ កាត់បន្ថយអាហារដែលមានកាបូអ៊ីដ្រាតផ្សេងទៀតនៅអាហារនោះ។ តាមដានជាតិស្ករក្នុងឈាម ប្រសិនបើអាចធ្វើបាន អ្នកដែលជាតិស្ករមិនទាន់គ្រប់គ្រងបានល្អ (HbA1c ខ្ពស់ ឬស្ករខ្ពស់ជាញឹកញាប់) គួរប្រុងប្រយ័ត្នជាងមុន
អ្វីដែលមិនគួរធ្វើ កុំញ៉ាំទុរេនជំនួសអាហារសំខាន់ កុំញ៉ាំទុរេនជាមួយភេសជ្ជៈផ្អែម ឬបង្អែមផ្សេងៗ កុំញ៉ាំច្រើនក្លែបជាប់ៗគ្នា ព្រោះអាចធ្វើឱ្យស្ករក្នុងឈាមឡើងខ្ពស់។ សារសំខាន់ អ្នកជំងឺទឹកនោមផ្អែម មិនចាំបាច់ហាមទុរេនទាំងស្រុងទេ ប៉ុន្តែត្រូវ “ញ៉ាំឱ្យត្រឹមត្រូវ និងក្នុងបរិមាណសមរម្យ”។ ការគ្រប់គ្រងបរិមាណសំខាន់ជាងការហាមឃាត់ផ្លែឈើមួយមុខណាមួយ៕