ភាពជាយុវវ័យជាវ័យមួយដែលមនុស្សកំពុងតែមានអារម្មណ៍ពុះកញ្ជ្រោលចង់ស្គាល់នូវអ្វីដែលថ្មីៗ និងជាវ័យដែលត្រូវការភាពសប្បាយរីករាយច្រើនរហូតដល់អ្នកខ្លះហ៊ានពោលពាក្យថា “ខំសប្បាយទាន់ខ្លួននៅក្មេង” ជាពាក្យមួយឃ្លានេះកំពុងតែបំផ្លាញពួកគេបន្តិចម្ដងៗ ហើយ។ នៅខាងក្រោមនេះជាកំហុសឆ្គងទាំង៤ របស់យុវវ័យភាគច្រើនបំផ្លាញខ្លួនឯង៖
១. គ្មានគោលដៅ៖ មានយុវវ័យជាច្រើននាក់រស់នៅដោយគ្មានគោលដៅច្បាស់លាស់ក្នុងជីវិតថាតើពួកគេចង់បានអ្វីក្នុងជីវិតរបស់ខ្លួននោះទេក្នុងរយៈពេល ១ខែ ៦ខែ ១ឆ្នាំ ៥ទៅ១០ឆ្នាំទៀតនោះទេ នេះជាកំហុសឆ្គងរស់នៅដោយគ្មានគោលដៅក្នុងជីវិតនេះបានធ្វើឱ្យពួកគេរបស់នៅដោយខ្ជះខ្ជាយពេលវេលា និងមិនអាចទទួលបាននូវសមិទ្ធផលធំដុំណាមួយក្នុងជីវិតឡើយ។
២. សប្បាយដាច់បង្អៀវ៖ ការរស់នៅដោយគិតតែភាពសប្បាយតែមួយមុខ ប្រៀបបីដូចជាសេះដែលដាច់បង្អៀវ។ ភាពជាយុវវ័យជាវ័យដែលមនុស្សត្រូវព្យាយាមខិតខំក្រេបយកនូវចំណេះដឹងទាំងពីក្នុងសាលានិងក្នុងសង្គមជាក់ស្ដែង។ សូមកុំមានភាពត្រេកត្រអាលជាមួយនឹងរឿងអបាយមុខដូចជា ស្រី ស្រា ល្បែង គ្រឿងញៀន និងអំពើផ្សេងៗដែលអាចអូសទាញអ្នកចូលទៅក្នុងនរកក្នុងរយៈពេលដ៏ខ្លីនាំខូចអនាគត។
៣. ចំណាយខ្ជះខ្ជាយ៖ ពេលដែលអ្នកចាប់ផ្ដើមក្លាយជាមនុស្សពេញវ័យ វាជាពេលដែលអ្នកត្រូវចេះរៀបចំចាត់ចែងហិរញ្ញវត្ថុរបស់ខ្លួនឱ្យបានល្អបំផុត។ អ្នកមិនត្រូវធ្វើការចំណាយខ្ជះខ្ជាយទៅលើអ្វីមួយដែលវាមិនបានធ្វើឱ្យអ្នកអាចកាន់តែមានភាពរីកចម្រើន ឬមិនត្រូវចំណាយលើអ្វីមួយដែលអ្នកចង់បានខ្លាំងពេកនោះទេ។ អ្នកត្រូវចំណាយឱ្យត្រូវក្បួនដោយចំនាយលើអ្វីដែលអ្នកពិតជាត្រូវការជាចាំបាច់ មិនមែនអ្វីដែលអ្នកចង់បានខ្លាំងពេកនោះទេ។
៤. ភ្លេចអភិវឌ្ឍន៍ខ្លួន៖ ពេលដែលអ្នកក្លាយជាមនុស្សពេញវ័យ អ្នកគួរតែក្លាយជាមនុស្សម្នាក់ដែលអាចមានជំនាញច្បាស់លាស់យ៉ាងហោចណាស់មួយ ដែលជំនាញនេះអ្នកអាចយកវាមកជាឧបករណ៍សម្រាប់រកប្រាក់មកចិញ្ចឹមជីវិតខ្លួនឯងយ៉ាងឯករាជ្យ ដោយមិនពឹងពាក់លើធនធានរបស់គ្រួសារខ្លាំងពេកនោះទេ៕