នៅពេលដែលនិយាយអំពីទ្រព្យ ប្រហែលជាមនុស្សជាច្រើននឹងគិតត្រឹមតែមានលុយកាក់ច្រើន មានផ្ទះ និងមានឡានជាដើម។ ប៉ុន្តែការពិតទៅ វាមិនមែនជាទ្រព្យដែលមានតម្លៃសំខាន់បំផុតនោះទេ ព្រោះនៅមានទ្រព្យសំខាន់ៗជាច្រើនទៀត នៅខាងក្រោមនេះជាទ្រព្យទាំង ៤នេះ មានតម្លៃថ្លៃជាងលុយទ្វេដង៖
១. សុខភាព៖ សុខភាពជាទ្រព្យមានតម្លៃមហាសាល បើបាត់បង់វា នឹងយើងនឹងបាត់បង់នូវអ្វីៗគ្រប់យ៉ាង និងមិនអាចទទួលជោគជ័យក្នុងជីវិតនោះទេ។ សុខភាពប្រៀបបីដូចជាលេខ១នៅខាងមុខ ហើយអ្វីៗជាច្រើនទៀតប្រៀបបីដូចជាលេខសូន្យដែលនៅពីខាងក្រោយលេខ១។ ដូច្នេះប្រសិនបើបាត់បង់លេខ១ហើយ នោះអ្វីៗគ្រប់យ៉ាងក៏លែងមានន័យអ្វីដែរ។
២. សេរីភាព៖ ពេលខ្លះយើងមិនគួរលក់សេរីភាពខ្លួនឯងទាំងស្រុងដើម្បីប្ដូរជាមួយលុយកាក់ទ្រព្យសម្បត្តិខ្លាំងពេកទេ ព្រោះជីវិតដែលគ្មានសេរីភាព គឺជាជីវិតដែលមិនសូវមានអត្ថន័យនោះទេ។ យើងអាចលក់សេរីភាពដើម្បីលុយបានមួយរយៈពេលណាមួយ ប៉ុន្តែដាច់ខាតកុំលក់សេរីភាពខ្លួនឯងប្ដូរជាមួយលុយយូរខ្លាំងពេកអី។
៣. សុភមង្គលផ្លូវចិត្ត៖ នៅពេលដែលមនុស្សលែងមានសុភមង្គលផ្លូវចិត្ត អារម្មណ៍មិនចេះស្កប់ស្កល់ រវល់តែខំរកប្រាក់ ជីវិតមួយនោះគឺជាជីវិតគួរឱ្យអាណិតអាសូរបំផុត។ ត្រូវចងចាំថា គោលដៅចុងក្រោយរបស់មនុស្សគឺការរស់នៅមានសុភមង្គលផ្លូវកាយផ្លូវចិត្តតែប៉ុណ្ណោះ មិនមែនទ្រព្យក្រៅខ្លួនដូចជាលុយកាក់ ទ្រព្យសម្បត្តិទាំងស្រុងនោះទេ។
៤. គ្រួសារ៖ កុំខិតខំរកស៊ីរហូតភ្លេចតម្លៃគ្រួសារ កុំខិតខំប្រឹងធ្វើការរហូតពិការបេះដូង។ អាស្រ័យហេតុនេះត្រូវចេះបែងចែកពេលវេលាជាមួយនឹងគ្រួសារជាទីស្រលាញ់អ្នកឱ្យបានល្អផងណា ព្រោះពាក្យថាគ្រួសារ គឺអាចប្រែបានថា “សុភមង្គល”។
ជារួមមកវិញ លុយសំខាន់ ប៉ុន្តែមានទ្រព្យជាច្រើនទៀត ដែលមានតម្លៃថ្លៃជាងលុយ ដែលអ្នកគប្បីគួរត្រិះរិះពិចារណា និងមិនគួរបោះបង់វាចោលនោះទេ។ ចុះនាពេលបច្ចុប្បន្ននេះ តើអ្នកខំប្រឹងរាល់ថ្ងៃដើម្បីខំកសាងទ្រព្យសំខាន់ៗអ្វីខ្លះដែរ?