តាមទិន្នន័យរបស់រដ្ឋាភិបាលជប៉ុនបានចេញផ្សាយ នៅថ្ងៃទី ១៧ ខែកញ្ញា ឆ្នាំ២០២៤ ថាចំនួនប្រជាជននៅក្នុងប្រទេសជប៉ុនដែលមានអាយុចាប់ពី ១០០ ឆ្នាំឡើងទៅបានកើនឡើងដល់កម្រិតខ្ពស់បំផុតគឺ ៩៥.០០០ នាក់ ដែលស្ទើរតែ ៩០ភាគរយនៃពួកគេគឺជាស្ត្រី។
គិតត្រឹមខែកញ្ញានេះ ប្រទេសជប៉ុន មានចំនួនមនុស្សដែលមានអាយុលើសពី៦៥ឆ្នាំបានឈានដល់កម្រិតខ្ពស់បំផុតគឺ ៣៦.២៥ លាននាក់ ដែលស្មើនឹង ២៩.៣ភាគរយនៃប្រជាជនសរុប។
ផ្អែកតាមក្រុមស្រាវជ្រាវ Gerontology ដែលមានមូលដ្ឋាននៅសហរដ្ឋអាមេរិក បានឱ្យដឹងថា ប្រទេសជប៉ុនគឺជាផ្ទះរបស់មនុស្សដែលមានវ័យចំណាស់ជាងគេបំផុតលើពិភពលោក ព្រោះតែកត្តារស់នៅដ៏ល្អរបស់ប្រជាជនជប៉ុនទើបធ្វើឱ្យពួកគេមានអាយុវែងបំផុត។
ក្នុងនោះតាមសាក្សីជាចាស់ជរាច្រើននាក់ នៅក្នុងមណ្ឌលមនុស្សចាស់ បាននិយាយស្រដៀងៗគ្នានឹងលោកតា Kiyotaka Mizuno មកពីខេត្ត Shizuoka ដែលមានអាយុ ១១០ ឆ្នាំយ៉ាងដូច្នេះថា៖ “ខ្ញុំគ្មានវិធី អ្វីដែលជាអាថ៌កំបាំងនៃអាយុវែងរបស់ខ្ញុំទេ ប៉ុន្តែខ្ញុំតែងក្រោកពីដំណេកនៅម៉ោង 6:30 ព្រឹកជារៀងរាល់ថ្ងៃ សម្រួលចិត្តឱ្យស្ងប់ ញ៉ាំអាហារបីពេលក្នុងមួយថ្ងៃ(ភាគច្រើនហូបបន្លែ ត្រី) លេងកីឡាដើម្បីពង្រឹងសុខភាព និងទស្សនាចំបាប់ស៊ូម៉ូរាល់ថ្ងៃ”។
យ៉ាងណាមិញផ្ទុយនឹងលក្ខណៈរស់នៅសុខសាន្ត ធ្វើឱ្យអត្រាអាយុវែងរបស់ប្រជាជនមានការកើន ប៉ុន្តែនេះក៏ជាវិបត្តិប្រជាសាស្រ្តដ៏ធំមួយសម្រាប់រដ្ឋាភិបាលដែលពន្យឺត ការវិវត្តន៍ខ្លួនរបស់ប្រទេសជប៉ុន ក្នុងការឆ្ពោះទៅរកតំណែងជាមហាអំណាចសេដ្ឋកិច្ទទី៣លើលោក ដោយសារតែចំនួនមនុស្សចាស់កើនឡើង នាំឱ្យអស់ថ្លៃព្យាបាលច្រើននិងកម្លាំងពលកម្មវ័យក្មេងធ្លាក់ចុះ៕