លោកស្រី Pelosi បានលើកឡើងថា “ស្រ្តីមិនត្រូវកំណត់ថា រឿងនេះ ធ្វើបាន ចំណែករឿងនោះ ធ្វើមិនបានទេ។ ខ្ញុំសុំលើកទឹកចិត្តឱ្យស្រ្តី បន្តធ្វើរឿងអ្វីមួយ តាមក្តីស្រមៃរបស់ខ្លួនដូចជាបុរសដែរ”។ សូម្បីលោកស្រី Pelosi មុនដំបូងក៏ជាស្រ្តីធម្មតាម្នាក់ មានកូនចំនួន ៥នាក់ ហើយនៅអាយុ ៤៧ឆ្នាំ ហេតុតែចិត្តស្រឡាញ់កិច្ចការនយោបាយ គាត់នៅតែខំប្រឹងបន្តធ្វើវាដែរ។ គាត់និយាយសម្តីដ៏មានតម្លៃមួយថា “ខ្ញុំពិតជាចង់ឱ្យស្ត្រីដឹងពីអំណាច(ស្គាល់ខ្លួនឯង) និងឱ្យតម្លៃលើបទពិសោធន៍របស់ខ្លួន ចំពោះការងារអ្វីមួយ? វាមិនសំខាន់ទេថា តើអ្នកជាបុរស ឬស្ត្រីទេ អ្នកសុទ្ធតែមានសមត្ថភាពពូកែក្នុងតួនាទីណាមួយដូចគ្នាជាមិនខានទេ”។

លោកស្រី Pelosi បានធ្វើជាគំរូដ៏ល្អបំផុតសម្រាប់មនុស្សស្រីជំនាន់ក្រោយ ទោះបីគាត់មានវ័យ ៨៤ឆ្នាំ ក៏គាត់នៅបន្តធ្វើការងារជាប្រធានសភាអាមេរិកដែរ។ លោកស្រី Pelosi អាចសម្រេចជោគជ័យដូចជាសព្វថ្ងៃនេះ ព្រោះតែគាត់មានរបៀបការគិតមួយជាពិសេសនោះគឺការគិតបែបទំនាក់ទំនងនេះឯង។ លោកស្រី Pelosi ថា អ្នកមិនអាចសម្រេចកិច្ចការធំតែម្នាក់ឯងបានទេ។ អ្នកត្រូវតែមានការគាំទ្រ ចេះសហការជាមួយអ្នកដទៃដែលមានជំនាញពិសេស និងមានបទពិសោធន៍ច្រើនជាង”។

ស្រ្តីមិនអាចជោគជ័យក្នុងជីវិតបានទេ បើមិនសហការជាមួយអ្នកដ៏ទៃ។ រាល់ការងារមានលទ្ធផលល្អ យើងត្រូវមានទំនាក់ទំនងជាមួយអ្នកដទៃ ដូចជាបងប្អូន ប្តី កូន គ្រួសារ មិត្តភក្តិ ក្រុមការងារ និងអ្នកផ្សេងទៀត។ ទោះជាយ៉ាងណាក៏ដោយ ក្នុងនាមជាស្រ្តី ឬនារី គួរតែសហការជាមួយមនុស្សដែលគាំទ្រក្តីសុបិនខ្លួនដូចជាលោកស្រី Nancy Pelosi បានបញ្ជាក់បន្ថែមជាចុងក្រោយថា ខ្ញុំមានក្តីសុបិនពេញមួយជីវិតនេះ ដើម្បីរួមសហការគ្នាជាមួយលោកស្រី Hillary Clinton។ ព្រោះការធ្វើជាខ្លួនអ្នក នាំឱ្យយើងស្គាល់អំណាចជាស្រ្តី ដែលមានទំនុកចិត្តចូលរួមកសាងអ្វីមួយអស្ចារ្យក្នុងនាមជាស្រ្តីម្នាក់។ ហើយយើងទាំងអស់គ្នា ត្រូវចេះគោរពគ្នារវាងបុរស និងស្រ្តី ព្រោះយើងមានតម្លៃស្មើគ្នានៅកន្លែងធ្វើការ និងសង្គមផងដែរ៕ អត្ថបទដោយ៖ ទ្រ សុភាព