ចិញ្ចឹមកូនធំមានអនាគតល្អ បណ្តុះកូនឱ្យចេះគិត ឱ្យចេះធ្វើដោយខ្លួនឯង។ មានបញ្ហាធំមួយ មានឪពុកម្តាយមួយចំនួន យកផ្នត់គំនិតចាស់ៗ ដែលហួសសម័យមកបំពាក់ឱ្យក្មេងជំនាន់ក្រោយនាំឱ្យមានអារម្មណ៍ភ័យខ្លាច។ ហៅថា ពិការអារម្មណ៍ព្រោះខ្លាចទង្វើឪពុកម្តាយកាលពីក្មេង។ ឪពុកម្តាយខ្មែរយើងខ្លះ ចិញ្ចឹមកូនមិនទាន់ត្រឹមត្រូវប៉ុន្មានទេ មានកត្តាខ្លះពួកគាត់ស្រែកដាក់កូន បំភ័យកូន សម្លុតកូន និងនិយាយកុហកកូន...ជាដើម។
សម្រាប់លោកយាយ វូជីស៊ីគី មានវ័យ៨៣ឆ្នាំជាអ្នកជំនាញចិញ្ចឹមកូន និងជាអ្នកនិពន្ធសៀវភៅ How to Raise Successful People លក់ដាច់បំផុតមួយ គាត់បានប្រាប់ថា “ខ្ញុំចិញ្ចឹមកូនបានជោគជ័យគឺឱ្យកូនស្តាប់តាមគាត់តាំងពីតូច ព្រោះតែគាត់បង្រៀនកូនៗ ឱ្យយល់ពីការបរាជ័យក្នុងវិថីជីវិត ឱ្យកូនហ៊ានសាកល្បងទោះបីពួកគេដើរដួលក៏ដោយ ក៏គាត់ព្យាយាមហៅកូនឱ្យក្រោក ឱ្យបន្តដំណើរមករកគាត់ដល់គោលដៅដែរ។ ពេលកូនដើរមកដល់ដៃរបស់គាត់ហើយគាត់ក៏ចាប់កូនលើកឡើងរួចថើប នេះជារង្វាន់ក្តីស្រឡាញ់ឱ្យកូនចេះតស៊ូក្រោកពីដួល។
គាត់បានបន្តថា “ពេលកូនងើបពីដួល ចេះស៊ូកូននឹងបានរង្វាន់ជានិច្ច”។ គាត់តែងណែនាំកូនៗ មានចិត្តក្លាហានធ្វើរឿងឱ្យច្រើនពីក្មេង ទោះបីបរាជ័យក៏ដោយ ឱ្យកូនព្យាយាមក្រោក ហើយបន្តការស៊ូទៅមុខទៀត កុំឱ្យកូនគិតថា ការដួល ការបរាជ័យ និងការឈឺចាប់ជារឿងអាក្រក់ តែវាជារឿងល្អទៅវិញពេលកូនចេះរៀនសូត្រពីបញ្ហា។
តាមសារព័ត៌មាន CNBC ក៏បានចុះផ្សាយសម្តីរបស់លោកយាយ វូជីស៊ីគី ដែរថា ពេលអ្នកទុកចិត្តលើកូនឱ្យចេះធ្វើអ្វីៗ ដោយខ្លួនឯង ពួកគេតែមានអំណាច មានសមត្ថភាពចេះដឹកនាំជីវិតដោយខ្លួនឯងយ៉ាងរឹងមាំ។ ហើយតួនាទីគាត់ជាម្តាយ គ្រាន់តែណែនាំវិធីសាស្រ្ត និងជួយកូនៗ ពេលកូនៗ ជួបការលំបាកខ្លាំង។ ហើយគាត់ធ្វើវាជំនួស ឬធ្វើជាគំរូក៏មានដែរ។”នេះជាគ្រាប់ពូជតូចមួយ តែវាមានតម្លៃមានឥទ្ធិពលធំណាស់ ឱ្យកូនៗ របស់អ្នក មានវ័យធំឡើងចេះពឹងលើខ្លួនឯង មានអនាគតល្អដោយមិនចាំបាច់ពឹងលើឪពុកម្តាយមួយជីវិតនោះទេ។ អត្ថបទដោយ៖ ទ្រ សុភាព