១.ក្រោកភ្លាម ចាប់ផ្តើមជីវិតជាថ្មី៖ តាមព្រះពុទ្ធមានពុទ្ធដីកាថា ពេលព្រឹកជាពេលអ្នកមានជីវិតជាថ្មី អ្នកត្រូវខំប្រឹងប្រែងអស់ពីលទ្ធភាពដើម្បីគុណភាពជីវិតរបស់អ្នកមានក្តីសុខ។ អ្នកឃើញទេ! នេះជាថ្ងៃថ្មីដែលអ្នកត្រូវចាប់ផ្ដើមដោយគំនិតវិជ្ជមាន ឱ្យចិត្តរបស់អ្នកមានភាពរីករាយ។ ចូរអ្នកក្រោកពីដំណេកភ្លាម ចូរអ្នកស្រមៃរឿងល្អៗ ហើយព្យាយាមធ្វើកិច្ចការណមួយឱ្យបញ្ចប់ពេលព្រឹកដូចជាហាត់ប្រាណជាដើម វាជាកត្តាជម្រុញឱ្យជីវិតរបស់អ្នកមានម្ចាស់ការលើខ្លួនឯងមានក្តីសុខ។

២.ចេះអភិវឌ្ឍន៍សមត្ថភាពរបស់ខ្លួនឯង៖ សព្វថ្ងៃនេះ អ្នកត្រូវចាំថា បើសមត្ថភាពរបស់អ្នកលូតយឺត អ្នកមិនអាចប្រកួតប្រជែងជាមួយអ្នកដទៃឈ្នះនោះទេ។ ដូច្នេះហើយ! អ្នកត្រូវអភិវឌ្ឍន៍សមត្ថភាពជារៀងរាល់ព្រឹកតាមរយៈធ្វើការងារ តាមរយៈការស្តាប់ពីអ្នកជំនាញឱ្យចំគោលដៅរបស់អ្នក រៀនពីមនុស្សជុំវិញ និងអាចសៀវភៅជាដើម ដើម្បីមានគំនិតមានសមត្ថភាពខ្លាំងជាងមុន។ ហើយការសម្រេចក្តីស្រមៃក៏ងាយស្រួលដែរ។ មានសំណួរខ្លះពេលព្រឹកអ្នកគួរសួរខ្លួនឯងថា ថាតើថ្ងៃអនាគតអ្នកចង់ក្លាយជាមនុស្សបែបណា ? តើអ្នកចង់បានគ្រួសារបែបណា? នេះជាសំណួរឆ្លុះបញ្ចាំងពីខ្លួនឯង ឱ្យអ្នកមានការខំប្រឹងប្រែងដើម្បីសម្រេចក្តីស្រមៃ។

៣. ប្រើពាក្យដុតចិត្ត៖ មានន័យថា ជាការប្រើពាក្យល្អៗបញ្ជាក់ប្រាប់ខ្លួនឯងឱ្យមានអារម្មណ៍រីករាយពេលព្រឹក។ តាមលោក Hal Elord ជាអ្នកនិពន្ធបានលើកឡើងថា អ្នកអាចសរសេរពាក្យល្អៗដែលអ្នកនឹងប្រើដើម្បីបញ្ជាក់ប្រាប់ខ្លួនឯងជារៀងរាល់ថ្ងៃ។ អ្វីដែលអ្នកគួរសរសេរគឺ តើអ្វីដែលអ្នកពិតជាចង់បានខ្លាំងបំផុត? ហេតុអ្វីបានជាអ្នកចង់បានវា? តើអ្នកត្រូវធ្វើខ្លួនបែបណាដើម្បីទទួលបានវា? ធ្វើការប្ដេជ្ញាចិត្តចំពោះសកម្មភាពអ្វីខ្លះដែលអ្នកនឹងធ្វើដើម្បីទទួលបានវា។ ពេលអ្នកមានសំណួរល្អបែបនេះនៅពេលព្រឹក នាំឱ្យចិត្តមានថាមពលវិជ្ជមានកាន់តែច្រើនហើយចិត្តរបស់អ្នកកាន់តែខ្លាំងមានក្តីសុខជាប្រចាំថ្ងៃផងដែរ៕ អត្ថបទដោយ៖ ទ្រ សុភាព