កុំធ្វើប្រៀបប្រដូចខ្លួនឯងជាមួយអ្នកដទៃនាំឱ្យតម្លៃរបស់អ្នកចុះថ្លៃ។ លទ្ធផលធ្វើកិច្ចការអ្វីមួយអស្ចារ្យគឺផ្តើមពីអ្នកធ្វើកិច្ចការដែលខ្លួនស្រឡាញ់ គ្មានការប្រៀបធៀបជាមួយដទៃ។ លោក John C. Maxwell បានលើកឡើងថា អ្នកមិនគួរឲ្យអ្នកដទៃមកកំណត់មាត្រដ្ឋានការរស់នៅ ក្តីស្រមៃ និងជីវិតរបស់ខ្លួនដូចអ្វីដែលគេគិតជំនួសនោះទេ។ ការយកខ្លួនឯងទៅប្រដូចនឹងអ្នកដទៃជារឿងគ្មានប្រយោជន៍អ្វីទាំងអស់ ហើយវាធ្វើឱ្យជីវិតរបស់អ្នកអស់តម្លៃ។ អ្នកគួរតែរស់នៅជាមួយខ្លួនឯង ពឹងលើកម្លាំងខ្លួនឯង និងខំប្រឹងដោយខ្លួនឯង ព្រោះជីវិតរបស់អ្នកកំណត់ដោយខ្លួនអ្នក។

ពេលអ្នកចេះកំណត់ដោយខ្លួន ចិត្តរបស់អ្នកនឹងមានសេរីភាព មានក្តីសុខ មានភាពរឹងមាំជាងមុន។ ដូចនេះ អ្នកកុំខ្វល់សម្តីអ្នកដទៃច្រើន ចូរអ្នកខ្វល់ពីការងារ បន្តផ្តោតលើលទ្ធផល ដើម្បីផ្លាស់ប្តូរអនាគតឱ្យប្រសើរឡើង។ ចិត្តរឹងមាំពេលអ្នកបន្តបណ្តុះសំលៀងសមត្ថភាព មិនបោះបង់ក្តីស្រមៃ មិនមែនអង្គុយពិបាកចិត្តជាមួយសម្តីអ្នកដទៃនោះទេ។ អនាគតនិងការខំប្រឹងរបស់អ្នក វាពិតជាមានតម្លៃជាងសម្តីមើលងាយគេឆ្ងាយណាស់។

នៅចំណុចចុងក្រោយ ដើម្បីឱ្យជីវិតរបស់អ្នកមានភាពរីករាយ គឺហ៊ានប្រឈមមុខជាមួយបញ្ហា។ តាមលោក John C. Maxwell បាននិយាយថា សូមអ្នកកុំព្យាយាមគេចពីបញ្ហា វានាំឱ្យផ្លូវចិត្តរបស់អ្នកកាន់តែយ៉ាប់។ អ្នកត្រូវតែហ៊ានប្រឈមមុខនឹងភាពអស់សង្ឃឹម និងភាពលំបាកលំបិនកម្រិតណាក៏ដោយ សូមកុំឲ្យវាមកកាត់បន្ថយកម្លាំងក្តីស្រមៃរបស់អ្នក។ ពេលអ្នកខំប្រឹងហ៊ានប្រឈមមុខនឹងក្តីទុក្ខលំបាកទាំងនេះ សមត្ថភាពរបស់អ្នកនឹងឆ្លងបញ្ហាផុតហែលទៅដល់ត្រើយជាមិនខានឡើយ។ តាមដំណាក់កាលនីមួយៗ នៃជីវិតរបស់អ្នកតែងមានឧបសគ្គនិងរឿងល្អៗ លាយជាមួយសេចក្តីទុក្ខលំបាក ប៉ុន្តែសំខាន់ណាស់! អាស្រ័យលើខ្លួនអ្នកចេះទាញយកចំណុចល្អៗ ចេញពីខ្លួនពេលអ្នកជួបក្តីលំបាកដើម្បីរុញជីវិតរបស់អ្នកទៅតាមក្តីស្រមៃ”។ ដើម្បីមានថាមពលដើរតាមក្តីស្រមៃ អ្នកត្រូវចេះផ្តល់ពេលវេលាឲ្យខ្លួនឯងឱ្យច្រើន អ្នកនឹងឃើញថា បេះដូងរបស់អ្នកកាន់តែមានក្តីសុខមានថាមពលខ្លាំងឡើងជាមិនខានឡើយ៕ អត្ថបទដោយ៖ ទ្រ សុភាព