១. ជម្រុះកោសិកាចាស់ ដើម្បីឱ្យស្បែកស្រស់ថ្លា៖ ជាធម្មតានៅពេលអាយុយើងកាន់តែច្រើនកោសិកាធម្មជាតិនឹងងាប់ហើយបើយើងមិនជម្រុះកោសិកាដែលងាប់នេះចេញទេ វាអាចនឹងបង្កឱ្យស្បែកស្លេក ស្អិត ស្ទះរន្ធញើសនិងធ្វើឱ្យឡើងមុន។ ម្យ៉ាងការជម្រុះកោសិកាចាស់ៗក៏ដើម្បីអនុញ្ញាតឱ្យកោសិកាថ្មីដុះឡើងមកវិញដែរ។ តែត្រូវចាំថា ការជម្រុះកោសិកាញឹកញាប់ពេកអាចធ្វើឱ្យស្បែកខូច វិធីដែលល្អអ្នកអាចជម្រុះកោសិកា ១ ឬ ២ ដងក្នុងមួយសប្ដាហ៍។ បើធ្វើហើយស្បែកមានសញ្ញាដូចជា រលោក រមាស់ ឬស្ងួតពេក អ្នកអាចកាត់បន្ថយទៅជា ១០ ថ្ងៃចាំជម្រុះម្ដងក៏បាន ជាពិសេសនៅពេលអាកាសធាតុក្ដៅ ហើយបន្ទាប់ពីជម្រុះរួចកុំភ្លេចត្រូវលាបឡេការពារកម្ដៅថ្ងៃជាដាច់ខាតដើម្បីកុំឱ្យខូចស្បែក។ 

២. ផ្តល់ជាតិសំណើមឱ្យស្បែកឱ្យបានគ្រប់គ្រាន់៖ អ្នកអាចចំណាំមើលបានថានៅពេលដែលស្បែកមានសំណើមគ្រប់គ្រាន់ អ្នកនឹងមានអារម្មណ៍ថាស្រស់ថ្លាជាងមុន ស្បែកតឹងរលោង និងមើលទៅមានសុខភាពល្អ។ ជាធម្មតានៅក្នុងរដូវក្ដៅ ស្បែករបស់យើងផលិតប្រេងច្រើនជាងធម្មតា ដូច្នេះត្រូវជ្រើសរើស moisturizers ណាដែលស្រាល មិនធ្វើឱ្យស្ទះរន្ធរោម និងមិនមានបន្ទុកប្រេងខ្លាំង ព្រោះស្បែកយើងផលិតប្រេងច្រើនហើយ បើថែមប្រេងទៅទៀតងាយនឹងធ្វើឱ្យឡើងមុន ឬស្ទះរន្ធរោម។ 

៣. កុំតមអាហារ តែត្រូវប្តូររបបអាហារដែលមានសុខភាពល្អជាងមុន៖ ការតមអាហារតឹងរឹងពេកមិនមែនជាដំណោះស្រាយល្អទេ ព្រោះវាធ្វើឱ្យអ្នកឆាប់ឃ្លានហើយញុំាច្រើននៅពេលក្រោយ។ តែការផ្លាស់ប្ដូររបបអាហារដូចជាកាត់បន្ថយអាហារបែប fast food, អាហារបំពង, ផ្អែម និងអាហារដែលបង្កឱ្យប្រព័ន្ធរំលាយខ្សោយ ព្រោះវាអាចធ្វើឱ្យមានជាតិពុលក្នុងរាងកាយ ហើយបញ្ចេញតាមស្បែកបណ្ដាលឱ្យឡើងមុន។ អ្នកគួរផ្លាស់ប្តូរទៅញ៉ាំ ត្រី បន្លែ និងផ្លែឈើស្រស់ៗ ព្រោះវាអាចជួយរំលាយអាហារបានល្អ និងជួយរាងកាយផលិតកូឡាជែនដោយខ្លួនឯងធ្វើឱ្យស្បែកស្អាត ស្រស់ថ្លាពីខាងក្នុងបែបធម្មជាតិដោយមិនបាច់ផឹកកូឡាជែនជំនួយ៕

អត្ថបទដោយ៖ សារួ