១. ផឹកទឹកឱ្យបានគ្រប់គ្រាន់៖ ទោះបីជារាងកាយមើលទៅមិនបញ្ចេញញើសច្រើនក៏ដោយ ប៉ុន្តែខ្យល់ត្រជាក់អាចបណ្ដាលឱ្យស្បែក និងស្បែកក្បាលបាត់បង់សំណើម។ នៅពេលរាងកាយខ្វះជាតិទឹក ស្បែកក្បាលនឹងមិនមានតុល្យភាព ងាយស្ងួត ហើយក្រពេញប្រេងនឹងផលិតប្រេងច្រើនដើម្បីផ្ដល់សំណើមវិញ។ ដូច្នេះ ការផឹកទឹកទៀងទាត់ជួយបង្កើនសំណើមឈាម ស្រួលដំណើរការស្បែកក្បាល និងជួយកាត់បន្ថយការកើតជាតិខ្លាញ់លើស។ អ្នកអាចចាប់ផ្តើមថ្ងៃថ្មីជាមួយទឹកក្តៅមួយកែវ និងដាក់ដបទឹកនៅក្បែរតុធ្វើការ ដើម្បីរំលឹកឱ្យផឹកទឹកពេញមួយថ្ងៃ។ ក្រៅពីទឹក អាហារូបត្ថម្ភក៏សំខាន់ដូចគ្នា។ អាហារដែលសម្បូរប្រូតេអ៊ីនជួយផ្ដល់សំណើមឱ្យសក់រឹងមាំ ខណៈដែលបន្លែពណ៌បៃតង និងផ្លែឈើដែលសម្បូរវីតាមីន C ជួយកាត់បន្ថយភាពស្ងួត និងបង្កើនសំណើមឱ្យស្បែកក្បាល។

២. លាងសក់របស់អ្នកជាមួយទឹកក្តៅ៖ ទឹកក្តៅពេកអាចធ្វើឱ្យជាតិប្រេងធម្មជាតិនៅស្បែកក្បាលត្រូវបានលាងចេញច្រើន ធ្វើឱ្យក្រពេញប្រេងត្រូវផលិតប្រេងច្រើនដើម្បីបន្ថែម។ ផ្ទុយទៅវិញ ទឹកត្រជាក់ពេកអាចធ្វើឱ្យរាងកាយងាយផ្តាសាយ។ ការប្រើទឹកក្តៅសមរម្យ  ក្តៅឧណ្ឌៗក្រោមសីតុណ្ហភាពរាងកាយ ជួយសម្អាតសក់បានល្អ មិនធ្វើឱ្យសក់ស្ងួត។ នៅរដូវរងា អ្នកគួរតែលាងសក់ ២ ទៅ ៣ ដងក្នុងមួយសប្តាហ៍ ដើម្បីរក្សាតុល្យភាពប្រេង។ ហើយពេលប្រើក្រែមបន្ទន់សក់ ត្រូវលាប់ត្រឹមចុងសក់បានហើយដើម្បីកុំឱ្យឬសសក់ឡើងប្រេងលឿន។ 

៣. ប្រើសាប៊ូកក់សក់ត្រឹមត្រូវ៖ សាប៊ូកក់សក់ដែលមានសារធាតុស៊ុលហ្វាត ឬស៊ីលីកុនអាចកម្ចាត់ជាតិប្រេងធម្មជាតិ និងបង្កឱ្យសក់ស្ងួត។ សម្រាប់អ្នកដែលមានសក់ស្ងួត ឬសក់ងាយរឹងនៅរដូវត្រជាក់ គួរជ្រើសរើសសាប៊ូដែលមានគ្រឿងផ្សំផ្តល់សំណើម និងគ្មានគ្រឿងផ្សំខ្លាំងៗ។ ប្រសិនបើសក់ត្រូវបានលាបពណ៌ អ្នកគួរជ្រើសរើសសាប៊ូដែលផ្ដល់សំណើម និងការពារសក់ វានឹងជួយទប់ស្កាត់ការខូចខាត និងធ្វើឱ្យសក់មានសំណើមល្អជាងមុន។ សាប៊ូកក់សក់គឺជាផលិតផលដែលប៉ះពាល់ដល់ស្បែកក្បាលដោយផ្ទាល់ ដូច្នេះការជ្រើសរើសប្រភេទត្រឹមត្រូវគឺមានសារៈសំខាន់ក្នុងការគ្រប់គ្រងប្រេង និងរក្សាសំណើមសម្រាប់សក់។ 

៤. កុំសិតសក់របស់អ្នកច្រើនពេក៖ ពេលអ្នកសិតសក់ញឹកញាប់ ការកកិតនៅលើស្បែកក្បាលនឹងជំរុញក្រពេញប្រេងឱ្យផលិតប្រេងច្រើនឡើង។ ដូច្នេះគួរតែសិតសក់ត្រឹមពីរដងក្នុងមួយថ្ងៃ ដោយប្រើសិតធ្មេញទូលាយ ដើម្បីកាត់បន្ថយការកកិត។ ជៀសវាងសិតសក់ពេលវាសើម ព្រោះសក់នៅក្នុងស្ថានភាពទន់ខ្សោយ និងងាយដាច់់។ ការសម្អាតសិតសក់សមរម្យក៏ជួយកាត់បន្ថយប្រេង និងធូលីកកកុញ ដែលជួយឱ្យសក់របស់អ្នកស្អាតបានយូរជាងមុន។

អត្ថបទដោយ៖ សារួ