មនុស្សយើងកំពុងតែប្រព្រឹត្តិសកម្មភាពនាំឱ្យប៉ះពាល់ខូចអង្គចងចាំ សុខភាពផ្លូវអារម្មណ៍ និងបង្កបង្កើតជំងឺរាងកាយដែរ។ មានប្រជាជនខ្មែរយើងមួយចំនួនធំមិនសូវចាប់អារម្មណ៍នឹងទម្លាប់ប្រចាំថ្ងៃរបស់ខ្លួន ដែលនាំឱ្យការគិត និងសុខភាពធ្លាក់ចុះខ្សោយនោះទេ។ ថ្ងៃនេះ យើងមកដឹងពីទម្លាប់ ៣នាំឱ្យមនុស្សមានបញ្ហាខួរក្បាលមិនដឹងខ្លួន៖

មានប្រជាជនខ្មែរយើងមួយចំនួនធំ កំពុងតែពេញនិយមនឹងគ្រឿងស្រវឹងនេះ នាំឱ្យប៉ះពាល់ខួរក្បាលអត់ដឹងខ្លួនទេ។ តាមការស្រាវជ្រាវពីលោក John L loyd ហើយ John mitchinson ជាជំនាញផ្នែកខួរក្បាលបាននិយាយថា “ពេលអ្នកផឹកស្រា ឬជាតិអាកុលកម្រិតខ្លាំង រយៈពេលយូរ វាធ្វើឱ្យកោសិកាខួរក្បាលមានការលូតលាស់យឺតៗ ឬក៏ធ្វើឱ្យងាប់កោសិកាខួរក្បាលម្តងបន្តិចៗ ថែមទៀត។” នេះហើយធ្វើឱ្យការគិតរបស់អ្នកមិនសូវបានល្អប៉ុន្មានទេ ហើយអារម្មណ៍របស់អ្នកចេះតែស្មុកស្មាញលើរឿងដដែលៗ បន្ទាបពីងើបស្វាងស្រា។ តាមលោក Carina Ferreira-Borges បានសង្កត់ធ្ងន់ថា គ្រឿងស្រវឹងអាចបង្កើនហានិភ័យជំងឺមហារីកសុដន់របស់ស្ត្រី។ ព្រោះអ្នកផឹកស្រាបានផ្លាស់ប្តូរកម្រិតអរម៉ូនក្នុងរាងកាយ រួមទាំងអរម៉ូនភេទស្រី អ៊ឹស្ត្រូសែន។

ការផឹកស្រាមិនត្រឹមតែបំផ្លាញសុខភាពឱ្យកើតបញ្ហាខួរក្បាលនិងជំងឺមហារីនោះទេ តាមលោកវេជ្ជបណ្ឌិត ស៊ុំ សត្ថា ដែលជាវេជ្ជបណ្ឌិតឯកទេសជំងឺទឹកនោមផ្អែម បានប្រាប់មកចាបបៃតងវិញថា ធម្មតាទេ! សុរាមានកាឡូរីខ្ពស់ ដូចនេះបើទទួលទានក្នុងបរិមាណច្រើន អាចប្រឈមមុខនឹងការលើស, លើសអាស៊ីត, លើសខ្លាញ់និងលើសស្ករជាដើម។ ការលើសនេះហើយដែលអាចជម្រុញឱ្យបុគ្គលម្នាក់កាន់តែប្រឈមជាមួយនឹងការ កើតជំងឺទឹកនោមផ្អែមប្រភេទទី២ ថែមទៀត។

បន្ទាប់ពីផឹកគ្រឿងស្រវឹងហើយនោះ វានាំឱ្យរាងកាយយើងកាន់តែធ្លាក់ដុនដាបលើសដើម។ មានវេជ្ជបណ្ឌិតជាច្រើនបានហាមប្រាមមិនឱ្យផឹកស្រាលើសកម្រិត ព្រោះវាមិនត្រឹមតែបង្កឱ្យរាងកាយមានជំងឺមហារីកទេ សូម្បីការគិតក៏អន់ជាងមុនដែរ។ ទម្លាប់ទី២នោះ ការមិនធ្វើលំហាត់ប្រាណក៏ធ្វើខួរក្បាលខ្សោយដែរ។ បើអ្នកស្រ្តេសយូរកោសិកាខួរក្បាលរបស់អ្នកក៏បាត់បង់ វាធ្វើឱ្យអ្នកឆាប់ភ្លេចដូចគ្នា។ តាមលោកស្រីវេជ្ជបណ្ឌិតWendy Suzuki ជាអ្នកវិទ្យាសាស្ត្រផ្នែកប្រសាទ បានរកឃើញថា ការធ្វើលំហាត់ប្រាណ ពិតជាមានអត្ថប្រយោជន៍ជួយជម្រុញកោសិកាប្រសាទ ឬជួយបង្កើតកោសិកាខួរក្បាលថ្មីៗ។ វាមានមុខងារកែលម្អការយល់ដឹងបានល្អបំផុត។ ពេលរាងកាយរឹងមាំ អារម្មណ៍ក៏សប្បាយ ការគិតក៏ល្អដែរ។​

មានយុវជនរបស់យើងមួយភាគធំដែរ គ្រាន់តែបញ្ចប់សកលវិទ្យាល័យ ក៏បញ្ឈប់ការរៀនសូត្រ នាំឱ្យការគិតចុះខ្សោយតាមហ្នឹងវិញ។ បើយើងផឹកស្រា នាំឱ្យរាងកាយខ្សោយ និងគ្មានការរៀនសូត្រថែមទៀត តើខួរក្បាលយើង មានភាពឆ្លាតវៃទេ? គឺមិនអាចទេ។ ប៉ុន្តែយើងបន្តការរៀនសូត្រមានច្រើនផ្លូវណាស់ តាមបទពិសោធន៍អ្នកដទៃ ការនិយាយគ្នា និងទម្លាប់អានសៀវភៅជាដើម។ ការមានទម្លាប់អានសៀភៅ វាជួយជម្រួញការគិតរបស់អ្នក ក្នុងការដោះស្រាយបញ្ហាអ្វីមួយបានលឿន។ គ្រាន់តែអ្នកអានសៀវភៅមួយខែ ឬពីរអាទិត្យ មួយក្បាល ធ្វើឱ្យខួរក្បាលរបស់អ្នកឆ្លាតវៃខ្លាំងដែរ។ អ្នកកាន់តែអាន ក្បាលកាន់តែឆ្លាត និងអារម្មណ៍កាន់តែមុតស្រួចផងដែរ។ លោកJim Rohn បាននិយាយថា “ការអានសៀវភៅនេះ ជួយបង្កើនចំណោះដឹងដ៏មានតម្លៃសម្រាប់ជីវិតរបស់មនុស្ស៕

 អត្ថបទដោយ៖ ទ្រ សុភាព