១. រងកម្មពីតូច៖ លោក ម៉ាស កាលនៅក្មេងត្រូវបានក្មេងទំនើងតាមវ៉ៃរហូតដល់ថ្នាក់សន្លាប់មានឈាមស្រោចពេញខ្លួន។ ចំពោះបញ្ហានេះ លោក ម៉ាស គ្មានបានការលើកទឹកចិត្តពីឪពុកខ្លួននោះទេ ត្រូវបានឪពុកស្តីថាឱ្យថែមមួយជាន់ទៀត។ គាត់មានអារម្មណ៍តូចចិត្តខ្លាំង។ រឿងនេះធ្វើឱ្យគាត់ចេះតស៊ូដោយខ្លួនឯងតាំងពីតូច។

២.ឪពុកម្តាយគិតថា លោក ម៉ាស អាចជាមនុស្សជាថ្លង់៖ កាលនៅពី​ក្មេង លោក ម៉ាស ពេល​​សម្លឹង​មើលអ្វីមួយ​ពី​ចម្ងាយ ខណៈ​មនុស្ស​ផ្សេង​ទៀត​កំពុង​និយាយ​ជាមួយ​គាត់ គាត់អត់បានឮសម្លេងអ្វីទេ។ នេះ​ធ្វើ​ឱ្យ​ឪពុក​ម្ដាយ​របស់​គាត់​គិត​ថា គាត់អាចជាក្មេង​​ថ្លង់ផងដែរ។ នេះព្រោះគាត់ផ្តោតស៊ីជម្រៅក្នុងរឿងអ្វីមួយខ្លាំងពេក រហូតគាត់មិនបានចាប់អារម្មណ៍សម្លេងនិងសម្តីពីអ្នកផ្សេងនោះឯង។ គាត់មានសមត្ថភាពផ្តោតអារម្មណ៍ខ្លាំង។

៣. ខ្លាំងតាំងពីអាយុ ៩ឆ្នាំ៖ លោកម៉ាសមានសមត្ថភាពពិសេសតាំងពីគាត់នៅអាយុ ៩ឆ្នាំ​អាចរៀនសរសេរកូដ ហើយគាត់អាចបង្កើតហ្គេមមួយ មានឈ្មោះថា «Blastar» រួចគាត់លក់បានលុយចំនួន ៥០០ដុល្លារឯណោះ។

៤. ងប់អានសៀវភៅណាស់៖ នៅអាយុ ៩ឆ្នាំ លោក ម៉ាស ជាមនុស្សងប់ការអានសៀវភៅបំផុត អាចឡើងជក់ហើយអានមួយថ្ងៃ ១០ម៉ោងឯណោះ។ សៀវភៅគាត់អានភាគច្រើនជាសៀវភៅបែបវិទ្យាសាស្ត្រ និងសៀវភៅមនុស្សពេញវ័យអាន ជាសៀវភៅត្រូវប្រើការគិតកម្រិតខ្ពស់ ប៉ុន្តែលោក ម៉ាស មានសមត្ថភាពអាចអានវាបាន។

៥. ជិតលក់ក្រុមហ៊ុន​តេសឡា៖ នៅក្នុងឆ្នាំ ២០១៣ លោក ម៉ាស ស្ទើរតែលក់ក្រុមហ៊ុន Tesla ទៅក្រុមហ៊ុន Google ក្នុងតម្លៃ ១១ពាន់លានដុល្លារ នេះបើយោងតាមលោក ​​Ashlee Vance ជាអ្នកនិពន្ធសៀវភៅលោក Elon Musk: Tesla, SpaceX។ ពេលនោះព្រោះលោក Larry Page មិនបានឃើញពីអនាគតរបស់ Tesla ។

៦. លោក ម៉ាស ជាម្ចាស់រថយន្តរបស់លោក James Bond ។ នៅក្នុងឆ្នាំ ២០១៣ លោក ម៉ាស បានទិញឡានមុជទឹក Lotus Esprit ពីខ្សែភាពយន្ត ០០៧ The Spy Who Loved Me ក្នុងតម្លៃ ៨៦៦.០០០ដុល្លារ។ គាត់បាននិយាយ​ថា ​កាល​នៅ​ក្មេងខ្ញុំ​ចូលចិត្ត​មើល​រឿង​នេះ​ម្តង​ហើយ​ម្តង​ទៀត។ ហើយមានវគ្គមួយ ខ្ញុំពិតជាមានការភ្ញាក់ផ្អើលខ្លាំងណាស់នៅពេលឃើញលោក James Bond  អាចជិះឡានចូលទឹកដូចជានាវាមុជទឹកចឹង។

៧. នៅខែធ្នូ ឆ្នាំ២០០០ លោក ម៉ាស បានយកពេលវេលាខ្លះទៅក្រេបទឹកឃ្មុំជាមួយភរិយាចំនួនពីរសប្តាហ៍នៅប្រេស៊ីល រួចក៏បន្តទៅអាហ្រ្វិក គាត់បានឆ្លងជំងឺគ្រុនចាញ់ពេលគាត់ត្រឡប់មកដល់រដ្ឋកាលីហ័រញ៉ាវិញ គាត់ចាប់ផ្តើមធ្លាក់ខ្លួនធ្ងន់មែនទែន រហូតចូលសង្រ្គោះបន្ទាន់ និងប្រើពេល ៦ខែព្យាបាល។ នៅក្នុងហេតុការណ៍នេះ លោក ម៉ាស បានប្រាប់អ្នកសារព័ត៌មានថា ខ្ញុំឈឺលើកនោះ ខ្ញុំជិតអស់ជីវិត...។ នេះជាអាថ៌កំបាំងរបស់លោក អេឡូន ម៉ាស កម្រមានអ្នកដឹងរឿងទាំងអស់នេះគាត់ណាស់៕ អត្ថបទដោយ៖ ទ្រ សុភាព