១. គិតបំណុលផ្ទាល់ខ្លួន៖ មុនពេលសម្រេចចិត្តរៀបការ អ្នកទាំងពីរ គួរតែពិភាក្សាគ្នាឱ្យបានច្បាស់អំពីបញ្ហាផ្ទាល់ខ្លួន ដូចជារឿងបំណុលជាដើមថាតើស្វាមីឬភរិយាគាត់មានជាប់បំណុលណាមួយដែរឬទេ? បើមាន តើចំនួនប៉ុន្មាន? ហើយគាត់ពិតជាអាចរ៉ាប់រងដោយខ្លួនឯងបាន​ ដោយមិនប៉ះពាល់ដល់ស្ថានភាពគ្រួសារថ្មីថ្មោងនេះដែរឬទេ?

២. គិតពីលុយគ្រួសារ នរណាជាទុក?៖ មុនសម្រេចចិត្តរៀបការ អ្នកទាំងពីរ គួរតែពិភាក្សាគ្នាអំពីលុយដែលរកមកបានមកថាតើចំណាយក្នុងគ្រួសារ ស្វាមីឬភរិយាជាអ្នកចាត់ចែងចំណូលចំណាយ ទុកដាក់លុយកាក់។ ដូច្នេះការប្រើប្រាស់កុងធនាគាររួម​ សម្រាប់ចំណាយក្នុងគ្រួសារទាំងមូល ដូចជាថ្លៃអាហារ ទឹកភ្លើង សន្សំបម្រុងនិងរបស់របរក្នុងផ្ទះ ឬការសន្សំរួមក៏ជាជម្រើសមួយល្អសម្រាប់ដៃគូផងដែរ។

៣. គិតប្រភពចំណូល៖  មុនសម្រេចចិត្តរៀបការ ដៃគូគួរតែពិភាក្សាគ្នាថាអ្នកទាំងពីរនឹងរៀបចំប្រភពចំណូលដោយរបៀបណា? បើជាអ្នកធ្វើការទាំងពីរនាក់ ឬជាអ្នករកស៊ី តើគួរយកចំណូលដែលរកបានមកនោះ ទៅបែងចែកការចាយវាយសម្រាប់អ្វីខ្លះដែលមានប្រយោជន៍ឬវិនិយោគអ្វីបន្ថែមទេ? ដើម្បីបានចំណូលច្រើន ជួយឱ្យដៃគូបង្កើតគ្រួសារមួយមានសុភមង្គលផងដែរ។ 

៤. គិតពីគម្រោងថ្ងៃអនាគត៖ មុនសម្រេចចិត្តរៀបការជាមួយគ្នា​ ដៃគូត្រូវប្រាកដជាចង់បានផ្ទះ មានឡានជាទ្រព្យរួមហើយ។ ដូច្នេះដើម្បីសម្រេចបានគម្រោងអនាគតនេះជាមួយគ្នា ដៃគូគួរតែពិភាក្សាគ្នាថាគួរធ្វើបែបណាដើម្បីសម្រេចបាន ត្រូវរកស៊ីអ្វីឬបង្កើតចំណូលពីណាមកខ្លះ មានការសន្សំរយៈពេលប៉ុន្មានឆ្នាំរួមគ្នា ហើយប្តីឬប្រពន្ធមានទ្រព្យផ្ទាល់ខ្លួនដែរទេ មុនពេលចាប់ដៃគ្នារៀបការ បើមានគួរដាក់វិនិយោគរួមគ្នាឬយ៉ាងណា? ព្រោះក្នុងគ្រួសារមួយ ចង់រីកចម្រើនត្រូវគិតពីគម្រោងថ្ងៃអនាគតផងដែរ៕