នៅប្រទេសវៀតណាមមានស្រ្តីម្នាក់កើតជំងឺមហារីកពោះវៀនធំ។ អ្នកស្រី Mai មានវ័យ ៤០ឆ្នាំក្រោយដួលសន្លប់ហើយធ្វើរោគវិនិច្ឆ័យបានរកឃើញថា គាត់កើតជំងឺមហារីកពោះវៀនធំ។ ហើយវេជ្ជបណ្ឌិត Ha Hai Nam បាននិយាយជាមួយលោកស្រី Mai ហើយគាត់បានបញ្ជាក់ថា អ្នកស្រីមានជំងឺមហារីកអាចបណ្តាលមកពីគាត់ចូលចិត្តហូបជាញឹកញ៉ាប់គឺហូបសាច់ក្រក សាច់អាំង និងសាច់ក្រឡុកសាច់ជ្រូកអស់ពេល ១០ឆ្នាំ។
បើយោងតាមស្ថិតិរបស់អង្គការមហារីកពិភពលោក (Globocan) នៅក្នុងឆ្នាំ ២០២០ នៅវៀតណាមមានករណីថ្មីជាង ១៤.០០០ ករណី ហើយមានអ្នកស្លាប់ជាង ៧.៥០០ នាក់ដោយសារជំងឺមហារីកពោះវៀនធំ។ នេះជាក្តីព្រួយបារម្ភជំងឺជំងឺមហារីកកំពុងកើនឡើងនៅក្នុងក្រុមអាយុ ៣០ទៅ៤០ ហើយក៏មានក្រុមមនុស្សអាយុ ២០ឆ្នាំជាងដែរ។ ចំណែកនៅប្រទេសខ្មែរវិញ តាមក្រសួងសុខាភិបាលបានឱ្យដឹងថា អ្នកជំងឺមហារីកទទួលការព្យាបាលនៅមន្ទីរពេទ្យមានចំនួន ៣១ ៥១៨នាក់ កើនឡើង ៨៧,៤២% ក្នុងនោះអ្នកជំងឺ ១២៧នាក់បានទទួលមរណភាពផងដែរ។
តាមយោងតាមគេហំព័រ Vnexpress បានចុះផ្សាយថា តាមការសិក្សារបស់អ្នកវិទ្យាសាស្ត្របានបង្ហាញថា អ្នកហូបសាច់ក្រហម ឬសាច់កែច្នៃច្រើនដងក្នុងមួយសប្តាហ៍ ងាយបង្កហានិភ័យជំងឺមហារីកប្រព័ន្ធរំលាយអាហារយ៉ាងលឿន។ ការហូបសាច់ក្រហមត្រឹមតែ ១០០ក្រាមក្នុងមួយថ្ងៃអាចបង្កើនហានិភ័យនៃជំងឺមហារីក ១៧%។ ព្រោះនៅក្នុងសាច់នេះមានសារធាតុ Nitrates និង Nitrites អាចបំប្លែងទៅជាជំងឺបង្កមហារីកក្នុងខ្លួន។ តាមការសិក្សាមួយពីប្រទេសសិង្ហបុរីបានបញ្ជាក់ថា អាហារកែច្នៃសម្បូរទៅដោយជាតិស្ករ និងខ្លាញ់អាចផលិតសារធាតុ Methylglyoxal នាំឱ្យផលប៉ះពាល់ដល់ហ្សែនប្រឆាំងនឹងដុំសាច់និងបង្កើនហានិភ័យជំងឺមហារីក។
បើអ្នកចង់កាត់បន្ថយហានិភ័យជំងឺមហារីក ចូរធ្វើការផ្លាស់ប្តូរម្តងបន្តិចៗ ជាប្រចាំថ្ងៃដោយញ៉ាំបន្លែ ផ្លែឈើ គ្រាប់ធញ្ញជាតិឱ្យច្រើន រួចហើយចូរកំណត់ចំនួនសាច់ក្រហម និងជាពិសេសនិយាយថា”ទេ”ចំពោះសាច់កែច្នៃ។ ហើយអ្នកគួរបង្កើនការធ្វើលំហាត់ប្រាណ ១៥ទៅ៣០នាទីជាប្រចាំថ្ងៃ វាជួយឱ្យពង្រឹងប្រព័ន្ធរាងកាយដើម្បីប្រឆាំងជំងឺមហារីកឱ្យអ្នករស់នៅមានសុខភាពមានក្តីសុខផងដែរ៕ អត្ថបទដោយ៖ ទ្រ សុភាព