តាមដំណឹងទីក្រុងសេអ៊ូលបានបញ្ជាក់ថា យ៉ាងហោចណាស់មនុស្ស ១៨នាក់បានស្លាប់ដោយសារភ្លើងឆេះព្រៃជាច្រើនកន្លែងនៅប្រទេសកូរ៉េខាងត្បូង។ ភ្លើងឆេះព្រៃដ៏កាចនេះ កាលថ្ងៃទី២៥ ខែមីនានេះ បង្ខំឱ្យអ្នកស្រុករាប់ពាន់នាក់ភៀសខ្លួនចេញពីផ្ទះសម្បែង និងអាជ្ញាធរបានផ្ទេរអ្នកទោសរាប់រយនាក់ចេញពីពន្ធនាគារផងដែរ។
បើគិតត្រឹមម៉ោង៥ ព្រឹកថ្ងៃពុធ ទី២៦នេះ យោងតាមមន្ត្រីរដ្ឋាភិបាលកូរ៉េខាងត្បូងបានឱ្យដឹងថា មានមនុស្ស ១៨នាក់បានស្លាប់ និង ១៩នាក់ទៀតរងរបួស ខណៈភ្លើងឆេះព្រៃបានឆាបឆេះតំបន់ភាគខាងត្បូងរបស់ប្រទេសកូរ៉េខាងត្បូង ចំពេលអាកាសធាតុស្ងួត និងខ្យល់បក់ខ្លាំង។
តាមលោក Lee Byung-doo ជាអ្នកជំនាញនៅវិទ្យាស្ថានជាតិវិទ្យាសាស្ត្រព្រៃឈើបាននិយាយថា ភ្លើងនៅ Uiseong មាន៦៨% កាន់តែធ្ងន់ធ្ងរដោយសារខ្យល់បកកាន់ខ្លាំង។ សូម្បីតែលោកប្រធានាធិបតីស្តីទី Han Duck-soo បានប្តេជ្ញាដាក់ពង្រាយឧទ្ធម្ភាគចក្រពន្លត់អគ្គីភ័យ និងដាក់បុគ្គលិកជើងគោកដើម្បីទប់ទល់ជាមួយនឹងភ្លើងឆេះ បណ្តាលមកពីខ្យល់បក់ខ្លាំង និងអាកាសធាតុស្ងួតពេក៕ អត្ថបទដោយ៖ ទ្រ សុភាព