កាលពីយប់ថ្ងៃទី២៤ ខែធ្នូ ឆ្នាំ២០២២ កន្លងមកនេះ នៅក្នុងការប្រកួច Thai Fight កីឡារករធឿន ធារ៉ា បានប្រកួតឈ្នះ កីឡាករជើងខ្លាំងរបស់ថៃ ដោយធ្វើឱ្យកីឡាករ សៃ យុគ របួសបែបធំខ្លាំងពេក អាជ្ញាកណ្ដាលបញ្ឈប់ក្នុងទឹកទី១។ នេះគឺជាប្រវត្តិសាស្ត្រថ្មីមួយ និងជាជោគជ័យធំដែលកីឡាករគុនខ្មែរ ឡើងប្រកួតឈ្នះក៏ដូចជាទទួលបានខ្សែក្រវ៉ាត់ Thai Fight ព្រមទាំងពានរង្វាន់ពីស្តេចថៃ និងបានទទួលទឹកប្រាក់ចំនួន៤សែនបាត ផងដែរ។
គួរឱ្យដឹងផងដែលថា កីឡាករ ធឿន ធារ៉ា ត្រូវបានគេដឹងថាជាកូនសិស្សរបស់លោកគ្រូ អេ ភូថង ក៏ដូចជាកីឡាករក្នុងក្លិបប្រដាល់គុណខ្មែរអេភូថង ផងដែរ។ នៅក្នុងកិច្ចសម្ភាសដែលបានផុសនៅក្នុងផេករបស់ ក្លិបប្រដាល់គុណខ្មែរអេភូថង កីឡាករ ធឿន ធារ៉ា បាននិយាយថា “ពិតជាមានអារម្មណ៍ក្ដុលក្តួល ខ្លាំងមែនទែន នេះជាលើកទី១ដែលបានទទួលខ្សែក្រវ៉ាត់ ពិតជានឹកស្មានមិនដល់ ពេលឡើងប្រកួត មិននឹកស្មានថាអាចយកបានខ្សែក្រវ៉ាត់ទេ ដោយសារកីឡាករថៃ ជាកីឡាករល្អ វ័យចាស់ តែក្បាច់នៅល្អ។ រាល់ការប្រកួតតែងតែដាក់ក្ដីសង្ឃឹមឱ្យខ្លួនឯងថានឹងយកជ័យជម្នះឱ្យបាន តែមិននឹកស្មានថាខ្លួនឯងធ្វើបានល្អដល់ថ្នាក់នេះ។”
នេះជាជោគជ័យធំ នឹងជាមុខមាត់មួយសម្រាប់គុនខ្មែរ កីឡាករ ក៏ដូចជាប្រទេសកម្ពុជាទាំងមូលផងដែរ។ មួយវិញទៀត ក៏សូមសម្តែងការត្រេកអរ និងអរគុណចំពោះការខិតខំរបស់កីឡាករ ធឿន ធារ៉ា ក៏ដូចជាកីឡាករផ្សេងៗទៀត ដែលបានលើកមុខមាត់ និងបង្ហាញឱ្យបរទេសឃើញកាន់តែច្បាស់ពីសក្តានុពលរបស់គុនខ្មែរលើឆាកអន្តជាតិ៕
